Йәһүәне нисек кенә ныҡ яратһаң да һәм уны нисек кенә көйәләндермәҫкә тырышһаң да, ваҡыт-ваҡыт һин барыбер хаталанырһың. Әммә ҡайһы бер гонаһтар башҡа гонаһтарға ҡарағанда етдиерәк (1 Коринфтарға 6:9, 10). Әгәр ауыр гонаһ ҡылһаң, шуны иҫтә тот: Йәһүә һинән ситләшмәй, ул һине ярата. Ул һине кисерергә һәм һиңә ярҙам итергә әҙер.

1. Йәһүә беҙҙе кисерһен өсөн, нимә эшләргә кәрәк?

Йәһүәне яратҡан кешеләр, ауыр гонаһ ҡылғанын аңлағас, бик ныҡ үкенә. Әммә уларҙы Йәһүәнең үҙ халҡына әйткән бындай һүҙҙәре йыуата: «Гонаһтарығыҙ ал ҡыҙыл туҡыма кеүек булһа ла, улар ҡарҙай аҡ булып китер» (Ишағыя 1:18). Ысын күңелдән тәүбә итһәк, Йәһүә беҙҙе тулыһынса кисерә. Тәүбә итеү нимәнән күренә? Тәүбә иткән кеше гонаһ ҡылғанына бик ныҡ үкенә, насар эш ҡылыуҙан туҡтай һәм, Йәһүәгә ялбарып, ғәфү итеүен һорай. Ул шулай уҡ гонаһҡа килтергән уйҙарҙан һәм ғәҙәттәрҙән арына һәм Йәһүәнең саф нормалары буйынса йәшәр өсөн бар көсөн һала. (Ишағыя 55:6, 7-не уҡы.)

2. Йәһүә өлкәндәр аша нисек ярҙам итә?

Етди гонаһ ҡылһаҡ, беҙгә, Йәһүә ҡушҡанса, йыйылыш өлкәндәренән ярҙам һорарға кәрәк. (Яҡуб 5:14, 15-те уҡы.) Өлкәндәр Йәһүәне һәм уның һарыҡтарын ярата. Улар беҙгә Йәһүә менән мөнәсәбәттәребеҙҙе яңынан торғоҙорға ярҙам итер өсөн яҡшы өйрәтелгән (Галаттарға 6:1).

Ауыр гонаһ ҡылһаҡ, өлкәндәр беҙгә нисек ярҙам итер? Изге Яҙма ярҙамында ике йә өс өлкән беҙгә ҡылған эшебеҙ Алла ҡарашында ни өсөн дөрөҫ түгел икәнен аңлатыр. Улар шулай уҡ беҙҙе рухландырыр һәм, бүтән гонаһ ҡылмаҫҡа ярҙам итер өсөн, кәрәкле кәңәштәр бирер. Беҙ рухи яҡтан һауығып еткәнсе, өлкәндәр мәсихселәрҙең ҡайһы бер эштәрендә ҡатнашыуыбыҙҙы сикләргә мөмкин. Әгәр етди гонаһ ҡылған кеше тәүбә итмәй икән, өлкәндәр, башҡа ҡәрҙәштәрҙе зыянлы йоғонтонан һаҡлар өсөн, уны йыйылыштан сығара.

 КҮБЕРӘК БЕЛ

3. Гонаһты таныу рухи яҡтан һауығырға ярҙам итә

Беҙ ҡылған һәр ҡайһы гонаһ Йәһүәнең күңелен әрнетә. Шуға күрә үҙ гонаһыбыҙҙы иң тәүҙә уға асыҡтан-асыҡ һөйләп бирергә кәрәк. Зәбур 32:1—5-те уҡы һәм яуап бир:

• Ни өсөн гонаһыбыҙҙы йәшереп йөрөгәнсе, уны Йәһүә алдында таныу яҡшыраҡ?

 4. Йыйылыштан сығарыу ниндәй файҙа килтерә?

Әгәр ауыр гонаһ ҡылған кеше Йәһүә нормалары буйынса йәшәргә теләмәһә, ул йыйылышта ҡала алмай. Уны йыйылыштан сығаралар, һәм беҙ уның менән һәр ҡайһы бәйләнеште өҙәбеҙ һәм һөйләшмәйбеҙ. 1 Коринфтарға 5:6, 11 һәм 2 Яхъя 9—11-ҙе уҡы һәм ошо һорауға яуап бир:

• Әҙ генә әсетке лә бөтә ҡамырҙы әсетә. Был миҫалдан күренеүенсә, тәүбә итмәгән гонаһ ҡылыусы менән аралашыу йыйылышҡа ниндәй йоғонто яһарға мөмкин?

 ТӨП ФЕКЕР

Етди гонаһ ҡылһаҡ, әммә, ысын күңелдән тәүбә итеп, хаталарыбыҙҙы ҡабатламаҫҡа тырышһаҡ, Йәһүә беҙҙе кисерер.

Ҡабатлау

• Ни өсөн Йәһүә алдында гонаһыбыҙҙы таныу беҙҙең өсөн файҙалы?

• Йәһүә беҙҙе кисерһен өсөн, нимә эшләргә кәрәк?

• Етди гонаһ ҡылһаҡ, ни өсөн өлкәндәрҙән ярҙам һорау мөһим?