Dawa ngani namumutan mong marhay si Jehova asin pinagmamaigutan mong likayan na makagibo nin ano man na makakapamundo sa saiya, masasala ka talaga kun minsan. Pero may mga kasalan na mas magabat kisa sa iba. (1 Corinto 6:9, 10) Pero tandaan na pag nakagibo ka nin magabat na kasalan, dai buot sabihon kaiyan na dai ka na namumutan ni Jehova; handa siya na patawadon asin tabangan ka.

1. Ano an dapat tang gibuhon para patawadon kita ni Jehova?

An mga namumuot ki Jehova namumundong marhay pag narealisar ninda na nakagibo sinda nin magabat na kasalan. Pero nararanga sinda kan pangako ni Jehova sa mga lingkod niya: “Dawa pa an mga kasalan nindo kakulor nin iskarlata, papapution iyan na garo niyebe.” (Isaias 1:18) Kun sinsero an satong pagsulsol, lubos na papatawadon kita ni Jehova. Paano ta maipapahiling na nagsusulsol kita? Huling pinagbabasulan tang marhay an nagibo tang kasalan, ipupundo ta na iyan asin makikimahirak kita ki Jehova na patawadon kita. Dangan hihinguwahon tang baguhon an sala tang kaisipan o mga paggawi na nagin dahilan kan nagibo tang kasalan, asin hihinguwahon tang mamuhay kauyon kan banal na mga pamantayan ni Jehova.—Basahon an Isaias 55:6, 7.

2. Paano ginagamit ni Jehova an mga elder para tabangan kita pag nakagibo kita nin kasalan?

Kun nakagibo kita nin sarong magabat na kasalan, sinasabi sa sato ni Jehova na “apudon . . . an kamagurangan kan kongregasyon.” (Basahon an Santiago 5:14, 15.) An nombradong mga lalaking ini namumutan si Jehova saka an saiyang mga karnero. Kuwalipikado sinda na magtabang sa sato para maibalik an satong relasyon ki Jehova.—Galacia 6:1.

Paano kita tinatabangan kan mga elder pag nakagibo kita nin magabat na kasalan? Tatabangan kita kan duwa o tulong elder gamit an Kasuratan para ipahiling sa sato kun taano ta sala an satong ginibo. Matao man sinda nin mga suhestiyon asin giya na makakatabang sa sato para malikayan na magkasala giraray. Tibaad magdesisyon sinda na dai nguna kita puwedeng magpartisipar sa partikular na mga aktibidad sa kongregasyon sagkod na dai pa kita nagigin makusog giraray sa espirituwal. Para protektaran an kongregasyon sa maraot na mga impluwensiya, itinitiwalag kan mga elder an siisay man na nakagibo nin magabat na kasalan asin dai nagsusulsol.

 ARAMON PA

3. An pagtuga kan satong kasalan makakatabang para maibalik an satong relasyon ki Jehova

Nakukulgan si Jehova pag nakakagibo kita nin ano man na kasalan, kaya tama sanang magtuga kita sa saiya. Basahon an Salmo 32:1-5, dangan pag-ulayan an hapot na ini:

• Imbes na itago an nagibo tang kasalan, taano ta makakarahay sa sato kun itutuga ta iyan ki Jehova?

 4. Kun paano nakakatabang an pagtitiwalag

Kun an nagkasala habong magsunod sa mga pamantayan ni Jehova, dai na siya puwedeng magin parte kan kongregasyon. Itinitiwalag siya asin dai na kita makikiiba-iba o makikipag-ulay sa saiya. Basahon an 1 Corinto 5:6, 11 asin 2 Juan 9-11, dangan pag-ulayan an hapot na ini:

• Kun paanong pinapausbog kan lebadura an masa nin harina, paano puwedeng maapektaran kan dai nagsusulsol na parakasala an kongregasyon?

 SUMARYO

Kun nakagibo kita nin magabat na kasalan pero pinagbabasulan ta talaga iyan asin determinadong ipundo an maraot na gibo, papatawadon kita ni Jehova.

Rebyu

• Taano ta para sa ikakarahay niyato kun itutuga ta ki Jehova an satong mga kasalan?

• Ano an kaipuhan tang gibuhon para mapatawad an mga kasalan ta?

• Pag nakagibo kita nin magabat na kasalan, taano ta dapat kitang magpatabang sa mga elder?