ISAMBILILO 57
Finshi Mufwile Ukucita nga Mwacita Ulubembu Ulukalamba?
Nangu ca kuti mwalitemwa sana Yehova kabili mulesha na maka ukucita ifishingamukalifya, inshita shimo kuti mwalufyanya. Na lyo line imembu shimo shilaba ishikalamba ukucila shimbi. (1 Abena Korinti 6:9, 10) Nga mwacita ulubembu ulukalamba, muleibukisha ukuti Yehova acili alimutemwa, akamwelela kabili akalamwafwa.
1. Finshi tufwile ukucita pa kuti Yehova atwelele?
Abatemwa Yehova balomfwa sana ububi nga bacita ulubembu ulukalamba. Lelo ifyo Yehova alaile abantu bakwe filabasansamusha. Abalaile ukuti: “Imembu shenu nelyo shakashika ce, shikabuuta tuutu kwati butonge.” (Esaya 1:18) Nga twalapila ukufuma panshi ya mutima, Yehova akatwelela. Finshi tulingile ukucita pa kulanga ukuti natulapila? Pa mulandu wa kuti tulomfwa sana ububi pa fyo twacitile, tufwile ukwesha na maka ukukanabwekeshapo ukucita ifyabipa ifyo twacitile, kabili tufwile no kulomba Yehova ukuti atwelele. Na kabili tulingile ukulaesha na maka ukukanatontonkanya nelyo ukucita ifyabipa ifyalengele tubembuke. Tulingile no kuibikilishako ukulacita ifyo Yehova afwaya.—Belengeni Esaya 55:6, 7.
2. Bushe Yehova abomfya shani baeluda ukutwafwa nga twabembuka?
Yehova atweba ukuti nga twacita ulubembu ulukalamba, tufwile ‘ukwita abakalamba ba cilonganino.’ (Belengeni Yakobo 5:14, 15.) Baeluda balitemwa Yehova ne mpaanga shakwe. Balibasambilisha ifya kutwafwa pa kuti tube ifibusa fya kwa Yehova na kabili.—Abena Galatia 6:1.
Bushe baeluda batwafwa shani nga twacita ulubembu ulukalamba? Baeluda babili nelyo batatu kuti batulungika ukubomfya Amalembo. Na kabili kuti batweba ifyo tulingile ukucita no kutukoselesha pa kuti tatubembwike na kabili. Nalimo kuti batulesha ukucitako ifintu fimo mu cilonganino ukufikila bucibusa bwesu na Yehova bwakosa na kabili. Nga ca kuti umuntu nacita ulubembu ulukalamba kabili talefwaya ukulapila, baeluda balamutamfya pa kuti bacingilile icilonganino.
SAMBILILENI NA FIMBI
Ishibilenipo na fimbi pa kuti muletasha pa fyo Yehova atwafwa nga twacita ulubembu ulukalamba.
3. Nga tatufishile ulubembu tucitile tulaba ifibusa fya kwa Yehova na kabili
Ulubembu lonse ulo twacita lulakalifya Yehova, kanshi tulingile ukumweba. Belengeni Amalumbo 32:1-5, lyena lanshanyeni ici cipusho:
-
Mulandu nshi cacindamina ukweba Yehova ulubembu tucitile, ukucila ukufisa?
Nga twaeba Yehova ulubembu tucitile e lyo twaeba na baeluda ukuti batwafwe, tulomfwako bwino. Tambeni VIDIO, lyena lanshanyeni icipusho cakonkapo.
-
Muli vidio twatamba, bushe baeluda ba-afwile shani ba Canon ukubwelela kuli Yehova?
Tatufwile ukulatiina baeluda kabili tufwile ukubeba ifishinka fyonse pantu babelako ukutwafwa. Belengeni Yakobo 5:16, lyena lanshanyeni ici cipusho:
-
Bushe baeluda kuti cabangukila shani ukutwafwa nga ca kuti twabeba ifishinka fyonse?
Mulelanda ulubembu mwacitile, mulelondolwela baeluda ifishinka fyonse, kabili mulekonka ifyo Yehova amusalapula
4. Bushe ukutamfya umuntu kuti kwamwafwa shani kabili kuti kwa-afwa shani aba mu cilonganino?
Nga ca kuti umuntu acita ulubembu ulukalamba kabili akaana ukukonka amafunde ya kwa Yehova ayalungama, tafwile ukuba mu cilonganino. Kanshi balamutamfya mu cilonganino, kabili tatulingile ukula-angala nankwe nelyo ukulanda nankwe. Belengeni 1 Abena Korinti 5:6, 11 na 2 Yohane 9-11, lyena lanshanyeni ici cipusho:
-
Bushe filya icitutumushi cilenga umufuba watutumuka, fyalingana shani ne fyo ukwangala no muntu uushifwaya ukulapila kwingalenga aba mu cilonganino baba ne mibele yabipa?
Abengi abatamfiwe balibwela mu cilonganino pa mulandu wa kuti balibasalapwile. Nangu ca kuti balyumfwile ububi ilyo babatamfishe, calilengele bailuka ukuti ifyo bacitile fyalibipile. (Amalumbo 141:5) Tambeni VIDIO, lyena lanshanyeni ifipusho fyakonkapo.
-
Bushe filya ba Songe abo twacitamba muli vidio batamfiwe fyabafwile shani ukubwelela mu cilonganino?
Bushe ukutamfya umuntu mu cilonganino . . .
-
kulenga shani abantu bacindika Yehova?
-
kulanga shani ukuti Yehova taumina kumo, lelo aliba no kutemwa?
5. Yehova alatwelela nga twalapila
Yesu alilandile icilangililo icilenga twaishiba bwino ifyo Yehova omfwa umuntu nga alapila. Belengeni Luka 15:1-7, lyena lanshanyeni ici cipusho:
-
Bushe ifili pali ili ilembo filemusambilisha finshi pali Yehova?
Belengeni Esekiele 33:11, lyena lanshanyeni ici cipusho:
-
Cinshi icacindama ico tulingile ukucita pa kuti tulange ukutila natulapila?
Nga filya kacema acita, Yehova na o alasakamana impaanga shakwe
ABANTU BAMO BATILA: “Nga naeba baeluda ulubembu ncitile kuti bantamfya mu cilonganino.”
-
Finshi mwingeba umuntu uwalanda ifi?
IFYO MUSAMBILILE
Nga twacita ulubembu ulukalamba e lyo twalapila ukufuma panshi ya mutima kabili tatubwekeshepo ukucita ifyabipa, Yehova akatubelela uluse.
Ukupitulukamo
-
Cinshi cawamina ukweba Yehova nga twacita ulubembu?
-
Finshi tufwile ukucita pa kuti Yehova atwelele?
-
Nga twacita ulubembu ulukalamba, mulandu nshi tulingile ukwebela baeluda ukuti batwafwe?
ISHIBILENIPO NA FIMBI
Moneni ifyo Yehova aelelele umwaume umo nga fintu Baibolo ilanda pali Esaya 1:18.
Bushe ukutamfya umuntu kulenga shani ena na ba mu cilonganino ukunonkelamo?
Belengeni pa kuti mumone ifyo mwingalondolwela uushili Nte umulandu kwabela ukutamfya umuntu uushilapila mu cilonganino.
“Bushe Inte sha kwa Yehova Balataluka Abo Balepepa Nabo Kale?” (Icipande ca pa jw.org)
Belengeni ilyashi ilitila “Nalingile Ukubwelela Kuli Yehova,” pa kuti mumone icalengele umwaume umo uwafumine mu cine eshibe ukuti Yehova alefwaya abwelele kuli ena.
“Baibolo Ilaalula Abantu” (Ulupungu lwa kwa Kalinda, April 1, 2012)
Nalimo Kuti Mwatemwako ne fi
AMEPUSHO ABANTU BEPUSHA SANA
Bushe Isambililo lya Baibolo E Cinshi?
Amasuko ku mepusho pe sambililo lya Baibolo ilyabula ukulipilisha.
