FARKARKOR 57
Roi Na Wafrur ya Fafisu Wafrur Sasar Ḇeba
Waswar kaku Yahwe I kwar ma swewar kaku fa wamewer wafrur roi imarisen ḇa na, rarirya mboi na wafrur sasar kaker. Sasar ono naba syadi ro sasar ḇesena. (1 Korintus 6:9, 10) Inja wafrur sasar ḇeba ido, waswarepen Yahwe ima iswar Au kaker. Imarisen byuk ampun ḇe Au ma imarisen isaramper Au.
1. Rosai na kofrur kaku insama Yahwe byuk ampun ḇe ko?
Snonggaku ḇeswar Yahwe I na sesanekar fafisu sifawi sifrur sasar ḇeba kwar. Ḇape, na sismai sneprei rofyor siwasya roi Yahwe ikofen ḇe kawasa Ḇyesi: ”Sasar mgoḇena namnis ra rik yano, nari yafrur na fa napyoper raris salju.” (Yesaya 1:18) Kombror kaku ro sasar koḇena ido, Yahwe nari byuk ampun ḇe ko. Moḇsa kofasnai marandor koḇena rai? Kofafko kaku faro sasar kofrur kwar ro ḇepon na, ma kofrur kaḇer awer na. Oso wer ido, fandun fa kor ampun ro Yahwe I. Raimnai, kosewar fa kofadwer kakara ḇesasar koḇena ma kenem ḇeḇye ḇa ḇefnai fa kofrur sasar ani. Ma kosewar fa kokenem raris Yahwe farkankin ḇesren Ḇyena.—Kowasya Yesaya 55:6, 7.
2. Rariso Yahwe ḇye penatua sya fa sifnoḇek ko fafisu kofrur sasar ḇeba?
Kofrur sasar ḇeba ido, Yahwe danun ḇe ko fa ’kor penatua jemaat’ sya. (Kowasya Yakobus 5:14, 15.) Penatua ansine sima siswar Yahwe I ma domba Ḇyesi. Sismai akurfasnai kwar ḇekur moḇ sifnoḇek ko insama kona wis ḇepyum kaḇer kuker Yahwe I.—Galatia 6:1.
Rosai na penatua sya sifrur fa sifnoḇek ko fafisu kofrur sasar ḇeba? Penatua ri suru ḇaido kyor nari skobuk mnuk-mnuk ro Refo fa nfasnaiḇair roi kofrur na nama sasar nairi. Sbuk wos anun kako ḇe ko ma sikofenḇair rosai na kofrur kaku insama kofrur kaḇer sasar anya ḇa. Imbude na sikofenḇair ḇe ko fa kuf fararur ḇesren ono ro sidang wer ḇa isof ro wis koḇena kuker Yahwe I napyum kaḇer resari. Snonggaku oso ifrur sasar ḇeba ma imewer imbror ido, nari penatua sya sisasyar i ro sidang fa skadaunwarek naek srar sya ro awyae ḇeḇye ḇa na.
SWEWAR KAKU WER
Nari kawos roi ḇefnoḇek ko fa koḇesyowi kaku fafnoḇek ro Yahwe I fafisu kofrur sasar ḇeba.
3. Fandun fa kokofen bos sasar koḇena
Sasar kofrur nakam nafrur fa Yahwe sneri iduf. Inja fandun fa kokofen bos sasar koḇena yoḇ I. Kowasya Mazmur 32:1-5, raimnai kawos fakfuken ine:
-
Kokofen bos sasar koḇena yoḇ Yahwe I ma kosewar fa kokram na ḇa kada, payamyum rosai nari kosmai ya?
Kokofen sasar koḇena faro Yahwe I monda ḇa, ḇape na kor fafnoḇek ro penatua sya kako. Kofrur roi ine ido, na kosmai sneprei. Komam VIDIO, raimnai kawos fakfuken na.
-
Ro vidio insanja, rariso penatua sifnoḇek Canon i fa kyaḇer ḇe Yahwe I?
Penatua sya simarisen sifnoḇek ko. Inja kawos yoḇ si ido, fandun fa kokofen bos ma kawos na fa nasnai ḇe si. Kowasya Yakobus 5:16, raimnai kawos fakfuken ine:
-
Rosai ḇefnai fa na napyan ḇe penatua sya fa sifnoḇek ko rofyor kokofen kaku sasar koḇena yoḇ si?
Wakofen bos sasar Bena, wawos na fa nasnai ḇe penatua sya, ma wun fafnoḇek ḇefo kuker sawarwar ro Yahwe I
4. Payamyum ro sisasyar snonggaku ḇefrur sasar ya
Rofyor snonggaku oso ifrur sasar ḇeba bo imewer isouser Yahwe parenta Ḇyena ido, nari dakkuf fararur ḇesren ro sidang ya wer ḇa. Nari sisasyar i ro sidang, ma kopok koḇebati ḇaido kawos kuker i wer ḇa. Kowasya 1 Korintus 5:6, 11 ma 2 Yohanes 9-11, raimnai kawos fakfuken ine:
-
Raris roi sbukiḇaren terigu na fa napisen kam, snonggaku oso imewer imbror ro sasar ḇyena ma ḇyebati kaker kuker naek srar ro sidang ido rosai na ḇejadi ya?
Ḇebor sisasyar si kwar, ḇarpur mura skaḇer wer. Rosai ḇefnai fa skaḇer wer? Fafisu sisasyar si nanya, roi nane nafrur si fa sesanekar. Mura, sifawi kaku roi sifrur na nsasar. (Mazmur 141:5) Komam VIDIO, raimnai kawos fakfuken na.
-
Ro vidio insanja, rariso Sonya ismai payamyum rofyor sisasyar i bur sidang ya?
Rofyor sisasyar snonggaku ḇefrur sasar ro sidang, rariso roi ine . . .
-
dun sanandik faro snonsnon Yahwe rai?
-
fyasnai Manseren Yahwe ima inapes ma isawarwar?
5. Kombror ro sasar koḇena ido na Yahwe byuk ampun ḇe ko
Yesus byuk wos sarḇer oso fa byukifnoḇek ko insama kofawi moḇ Yahwe ḇyaḇir raya fafisu snonggaku oso imbror ro sasar ḇyena. Kowasya Lukas 15:1-7, raimnai kawos fakfuken ine:
-
Ro fawar anine, rosai wafarkor ḇekur Yahwe I?
Kowasya Yehezkiel 33:11, raimnai kawos fakfuken ine:
-
Kombror ro sasar koḇena ido, rosai na kofrur kaku ya?
Raris manfarandows oso, Yahwe iswar kaku domba-domba Ḇyesi
SIA SOḆE: ”Imbe yakofenḇair sasar yena ḇe penatua sya, mboi yamgak na sisasyar aya ro sidang.”
-
Rosai na wakofen ḇe snonggaku ḇekara rarirya?
FARKARKOR ḆYENA
Fafisu kofrur sasar ḇeba mboi kofafko kaku kwar ma kosewar fa komnai kofrur roi ḇeḇye ḇa anya ido, Yahwe nari byuk ampun ḇe ko.
Waswarepen Kaḇer
-
Kokofen bos sasar koḇena faro Yahwe ido, payamyum rosai na kosmai ya?
-
Rosai na kofrur kaku insama Yahwe byuk ampun ḇe ko?
-
Kofrur sasar ḇeba ido, rosai ḇefnai fa kor fafnoḇek ro penatua sya?
SWEWAR NABOR WER
Raris wos ro Yesaya 1:18 ya, mam snon oso ḇyaḇir Yahwe sawarwar Ḇyena.
Sisasyar snonggaku oso bur sidang ido, payamyum rosai na sismai ya?
”Nyan Saswar Iso Sisasyar Snonggaku Oso Bur Sidang” (Syap Baryas 15 April 2015)
Mam nyan fa wakofenḇair ḇe snonggaku eḇe Saksi Yahwe ḇa sya roi ḇefnai fa sisasyar snonggaku ḇefrur sasar ro sidang.
Wamarisen Ido Mam Ine Kako
FAKFUKEN RO KAWASA KAM
Moḇsa Saksi-Saksi Yahwe Sya Farkarkor Refo Sena Isnai Rai?
Bisa bepake Refo rosai monda fa wafarkor Refo ḇeyor ḇaḇyak ḇa kuker Saksi-Saksi Yahwe sya. Wamgak awer fa wor kina karyer Bansya kam ḇaido bati Besya fa sakso.
