Hali ni i bɛ Jehova kanu kosɛbɛ ani ko i bɛ ka i seko bɛɛ kɛ walasa i kana fosi kɛ min b’a dusu tiɲɛ, i bɛna filimako dɔw kɛ tuma dɔw la. Nka jurumu dɔw barika ka bon ni dɔw ye. (1 Kɔrɛntekaw 6:9, 10) Ni i ye jurumuba dɔ kɛ, kana a miiri ko Jehova tɛ i kanu bilen. I hakili to a la ko, a labɛnnen bɛ ka yafa i ma ani ka i dɛmɛ.

1. An ka kan ka mun de kɛ walasa Jehova ka yafa an ma?

Minnu bɛ Jehova kanu ni olu y’a ye ko u ye jurumuba dɔ kɛ, o bɛ u dusu kasi kosɛbɛ. Nka Jehova bɛ u dusu saalo ni a ka layidu ye, a ye min ta a ka mɔgɔw ye ko: “Hali ni aw ka jurumuw bilenna kosɛbɛ, u na jɛya i ko neje.” (Esayi 1:18) Ni an nimisara an ka jurumuw la ni kɔnɔnajɛya ye, Jehova bɛ yafa an ma pewu-pewu. An bɛ nimisa cogo jumɛn na? An bɛ nimisa kosɛbɛ an ka ko kɛlen na, an bɛ ko jugu kɛli dabila ani ka Jehova deli ni delilibaw ye a ka yafa an ma. O kɔ, miirina kolonw ani delinako kolon minnu ye an bila ka o ko jugu kɛ, an bɛ baaraba kɛ walasa ka olu bɔ an na. An bɛ an jija fana ka ɲɛnamaya kɛ ka kɛɲɛ ni Jehova ka sariyakolo saniyalenw ye.​—Esayi 55:6, 7 kalan.

2. Ni an ye jurumu kɛ, Jehova bɛ baara kɛ ni diinɛ maakɔrɔw ye cogo di ka an dɛmɛ?

Jehova ko ni an ye jurumuba dɔ kɛ, an ka “egilisi [​jɛkulu​] cɛkɔrɔbaw wele”, ni olu ye jɛkulu diinɛ maakɔrɔw ye. (Yakuba 5:14, 15 kalan.) O diinɛ maakɔrɔw bɛ Jehova kanu, u fana bɛ Jehova batobagaw kanu. U bɛ se ka an dɛmɛ cogo min na walisa an ka segin ka jɛɲɔgɔnya ɲuman don an ni Jehova cɛ kokura, u kalanna o kɛli la.​—Galasikaw 6:1.

Diinɛ maakɔrɔw bɛ an dɛmɛ cogo di ni an ye jurumuba dɔ kɛ? Diinɛ maakɔrɔ fila walima saba bɛ baara kɛ ni Bibulu ye walasa k’a jira an na kun min na an ka ko kɛlen ye ko jugu ye. U fana bɛ laadilikan jɔnjɔnw di an ma walisa ka an dɛmɛ an kana segin ka jurumu kɛ tuguni. Laala u bɛ dan bila an ka ko dɔw kɛli la jɛkulu kɔnɔ waati dɔ kɔnɔna na, fo ka taa fɔ ko an kɛnɛyara alako ta fan fɛ. Mɔgɔ min ye jurumuba kɛ, ni o tigi ma nimisa, diinɛ maakɔrɔw b’a gɛn walasa a kana nɔ jugu bila tɔw la jɛkulu kɔnɔ.

 DƆ FARA I KA DƆNNIYA KAN

3. Ka jɔ an ka hakɛw la ka u fɔ, o bɛ an dɛmɛ ka kɛnɛyali sɔrɔ

An bɛ jurumu o jurumu min kɛ, o bɛ Jehova dusu kasi. O la, a ka kan an ka jɔ an ka jurumu la ka a fɔ a ye. Zaburu 32:1-5 kalan, o kɔ aw ka baro kɛ nin ɲininkali kan:

• Mun na a bɛ fisaya an ma an k’an ka jurumuw kofɔ Jehova ye an kana a ɲini ka u dogo?

 4. Nafa minnu bɛ mɔgɔ gɛnni na

Ni mɔgɔ dɔ ye jurumuba dɔ kɛ ani ka ban ka tugu Jehova ka sariyakolow kɔ, o tigi tɛ se ka to jɛkulu kɔnɔmɔgɔw cɛma. A bɛ gɛn, an tɛ jɛɲɔgɔnya kɛ ni a tigi ye, hali an tɛ kuma a tigi fɛ yɛrɛ. 1 Kɔrɛntekaw 5:6, 11 ani 2 Yuhana 9-​11 kalan, o kɔ aw ka baro kɛ nin ɲininkaliw kan:

• Funun fɛn bɛ mun kɛ mugu nɔɔninen na? O cogo kelen na, ni an ye jɛɲɔgɔnya kɛ ni jurumukɛla ye min ma nimisa, o bɛ nɔ jumɛn bila jɛkulu la?

 BAKURUBAFƆLI

Ni an ye jurumuba dɔ kɛ nka ni an nimisara ni kɔnɔnajɛya ye ani ka an jija ka ko jugu kɛli dabila, Jehova bɛ yafa an ma.

Seginnkanni

• Mun na a bɛ fisaya an ma an k’an ka jurumuw kofɔ Jehova ye?

• An ka kan ka mun de kɛ walasa Jehova ka yafa an ma an ka jurumu kɛlenw kosɔn?

• Ni an ye jurumuba dɔ kɛ, mun na an ka kan ka diinɛ maakɔrɔw ka dɛmɛ ɲini?