PARLAJARAN 57

Aha do na Porlu Hubahen Anggo Huhorjahon Dousa na Banggal?

PADALAN

Halani holong uhurta bani Jahowa, lang ra hita mambahen pusok uhur-Ni. Tapi sipata, ongga do hita mambahen na salah janah dong do na mangkorjahon dousa na banggal. (1 Korint 6:9, 10) Anggo ihorjahon ham dousa na banggal, sihol do Jahowa mangurupi ham ase mubah halani holong uhur-Ni bamu, janah ra do Ia manasap dousamu.

1. Aha do na porlu ibahen hita ase isasap Jahowa dousanta?

Halani holong uhurta bani Jahowa, tontu pusok do uhurta anggo ihorjahon hita dousa na banggal. Hassi pe sonai, ihatahon Jahowa do, “Age pe gerger dousanima songon daroh, gabe putih do bahenon-Ku ai songon salju.” (Jesaya 1:18) Ra do Jahowa manasap dousanta anggo tongon-tongon hita manosali ai. Halani ai, ulang be ihorjahon hita dousanta ai janah pindo ma hasasapan ni dousa bani Jahowa. Marusaha ma hita mambahen hamubahon ibagas pingkiran ampa parlahounta. Janah marusaha ma homa hita mandalankon harosuh ni Jahowa.—Basa Jesaya 55:6, 7.

2. Sonaha sintua boi mangurupi anggo ihorjahon hita dousa na banggal?

Anggo ihorjahon hita dousa na banggal, iparentahkon Jahowa do hita ase ‘mandilo sintua i kuria’. (Basa Jakobus 5:14, 15.) Holong do uhur ni sidea bani Jahowa ampa bani ganup halak i kuria. Ibotoh sidea do sonaha carani mangurupi hita ase boi dohor use pakon Jahowa.—Galatia 6:1.

Sonaha ma sintua boi mangurupi hita? Dong do holi dua atap tolu sintua na patorangkon hun Bibel mase salah na ihorjahon hita ai. Ibere sidea do homa podah sonaha ase hita lang be mangkorjahon dousa ai. Sipata, ibahen sidea do haputusan anggo hita lang boi mandapot bagian i partumpuan ronsi dear use parhasomananta pakon Jahowa. Tapi dong do na maningon ipecat atap ipabali hun kuria anggo lang ra ia mubah. Tujuanni ase ulang ibahen ia pengaruh na lang dear bani na legan.

PARLAJARI ROH BAHATNI

Ulas hita ma sonaha Jahowa mangurupi hita mambahen hamubahon anggo ihorjahon hita dousa na banggal. Anggo irimangi hita ai, lambin martarima kasih ma hita bani Jahowa.

3. Porlu do hita mangakui dousanta ase boi iurupi

Anggo ihorjahon hita dousa, gabe borit ma uhur ni Jahowa. Halani ai, sihol do Ia ase iakui hita dousanta hu Bani. Basa ma Psalmen 32:1-5, janah ulas ma sungkun-sungkun on:

Pandapotmu, na ija do dearan, iakui hita dousanta bani Naibata atap ipasip-sip hita ai?

Leganni ai, porlu do homa ijumpahi hita sintua ase boi sidea mangurupi hita. Tonton ma VIDEO, dob ai ulas ma sungkun-sungkun on.

VIDEO: “Ipinsang Jahowa do na Hinaholongan-Ni” (3:01)

Bani video ai, sonaha ma sintua mangurupi si Canon ase boi marhasoman use pakon Jahowa?

Maningon jujur do hita mansaritahon ganup bani sintua ase boi sidea mangurupi hita. Basa ma Jakobus 5:16, janah ulas ma sungkun-sungkun on:

Anggo jujur hita bani sintua, mase lambin urah sidea mangurupi hita?

Akui ma dousamu, jujur ma bani sintua, janah jalo ma pangurupion humbani Jahowa

4. Gunani pengaturan pemecatan

Anggo dong sahalak Saksi na mangkorjahon dousa na banggal janah lang ra ia mubah, gabe ipecat ma ia hun kuria. Halani ai, lang boi be hita marhasoman atap pe marsahapi pakonsi. Basa ma 1 Korint 5:6, 11 pakon 2 Johannes 9-11, janah ulas ma sungkun-sungkun on:

Bibel mangkatahon anggo ragi boi do mambahen kambang ganup adonan. Jadi, aha do pengaruhni anggo hita marhasoman pakon halak na ipecat?

Bahat do halak na gabe pusok uhurni halani ipecat hun kuria. Tapi halani ipecat, gabe sadar ma sidea domma salah pambahenanni ai. Ujungni, gabe ra ma sidea mulak use hu kuria. (Psalmen 141:5) Tonton ma VIDEO, dob ai ulas ma sungkun-sungkun on.