Amin pe keleng atendu Jahwe janah usahakenndu la ngelakoken kai si erban Jahwe kecewa, mon-mon banci saja banndu kesalahen. Tapi lit piga-piga kesalahen si lebih serius asangken kesalahen si deban. (1 Korinti 6:9, 10) Adi lakokenndu kesalahen si serius, ingetlah tetap nge keleng ate Jahwe kam. Nggit Ia ngampuni kam ras nampati kam.

1. Kai si perlu silakoken gelah ampuni Jahwe kita?

Adi lit kalak si engkelengi Jahwe tapi ngelakoken dosa serius, pasti sedih kel akapna. Tapi banci malem atena adi ingetna janji Jahwe man umatNa: “Amin gia dosa-dosa kena megara bagi dareh, iban pagi mbentar bagi salju.” (Jesaya 1:18) Adi tuhu-tuhu kita robah, banci kita iampuni Jahwe. Kai si perlu silakoken? Arus kita menyesal, dung e lanai silakoken kai si salah, janah sipindo pengampunen arah Jahwe. Kenca si e, ula nai siukuri kai si salah janah arus sitadingken kebiasan si banci erban kita ngelakoken dosa e. Janah siusahaken ngikutken standar Jahwe si bersih.​—Baca Jesaya 55:6, 7.

2. Uga Jahwe nggunaken pertua-pertua guna nampati kita sanga silakoken dosa serius?

Adi silakoken dosa serius, ipindo Jahwe gelah ‘sidarami pertua-pertua bas runggun.’ (Baca Jakup 5:14, 15.) Pertua-pertua e keleng atena Jahwe bage pe kalak si ngelayani Jahwe. Pertua pe enggo iajari uga carana nampati kita gelah banci rembak ka mulihi ras Jahwe.​—Galati 6:1.

Uga pertua-pertua nampati kita adi silakoken dosa serius? Dua ntah pe telu pertua nggunaken Pustaka si Badia guna nampati kita ngangkai maka enggo salah kel perbahanenta e. Bereken kalak e saran ras nasehat gelah lanai mulihi silakoken kesalahen e. Banci saja iputusken kalak e, lit piga-piga si lanai banci silakoken bas runggun ngayak mulihi ka paguh hubungenta ras Jahwe. Tapi adi lit kalak si ngelakoken dosa serius janah la ia robah, ipedarat pertua-pertua ia arah runggun nari guna ngelindungi runggun arah pengaruh si la mehuli.

 PELAJARI TERBAGESEN

3. Adi siakui dosata, banci kita rembak mulihi ras Jahwe

Adi silakoken dosa, dosa kai pe e, e erban Jahwe sedih. Emaka perlu siakui dosata man baNa. Bacalah Masmur 32:1-5, kenca si e bahas penungkunen enda:

• Kai gunana adi siakui dosata man Jahwe janah la sibuniken?

 4. Kai gunana adi kalak si la nggit robah ipedarat arah runggun?

Adi lit kalak si ngelakoken dosa serius janah la ia nggit ngikutken standar Jahwe, lanai ia banci jadi bagin runggun. Ipedarat ia arah runggun nari. Janah la kita nggit bergaul ras ia, ngerana pe kita la banci. Bacalah 1 Korinti 5:6, 11 ras 2 Johanes 9-11, kenca si e bahas penungkunen enda:

• Sitik ragi banci erban tepung si enggo iaduk jadi kembang. Bage ka pe, kai pengaruhna adi kalak si la ertobat bergaul denga ras turang senina bas runggun?

 KESIMPULEN PELAJAREN ENDA

Adi silakoken dosa serius tapi tuhu-tuhu kita robah janah siusahaken lanai ngelakoken kai si salah, pasti ampuni Jahwe kita.

Kai si Enggo Sipelajari?

• Kai gunana adi siakui dosata man Jahwe?

• Kai si perlu silakoken gelah ampuni Jahwe dosata?

• Adi silakoken dosa serius, engkai maka perlu sipindo penampat pertua?