LEKSIYON 57
Komosta Kon Makahimo Kag Seryosong Sala?
Bisag gihigugma nimo pag-ayo si Jehova ug naningkamot kang dili mobuhat ug bisan unsa nga makapasakit sa iyang kasingkasing, usahay masayop gyod ka. Pero naay mga sala nga mas seryoso. (1 Corinto 6:9, 10) Kon makahimo kag seryosong sala, hinumdomi nga gihigugma gihapon ka ni Jehova; andam siyang mopasaylo ug motabang nimo.
1. Unsay kinahanglan natong himoon aron pasayloon ta ni Jehova?
Kadtong nahigugma kang Jehova maguol pag-ayo dihang ilang makita nga nakahimo silag seryosong sala. Pero mahupay sila sa gisaad ni Jehova sa iyang katawhan: “Bisan tuod ang inyong mga sala hayag-pula, kini papution sama sa niyebe.” (Isaias 1:18) Kon sinsero tang maghinulsol, bug-os tang pasayloon ni Jehova. Unsaon nato paghinulsol? Basolan nato pag-ayo ang atong nahimo mao nga hunongon na nato ang pagbuhat ug daotan ug hangyoon nato si Jehova nga pasayloon ta. Dayon maningkamot tang bag-ohon ang sayop nga panghunahuna o binuhatan nga maoy hinungdan nga nakahimo tag sala, ug maningkamot pod ta nga magkinabuhi subay sa hinlo nga mga sukdanan ni Jehova.—Basaha ang Isaias 55:6, 7.
2. Sa unsang paagi gamiton ni Jehova ang mga ansiyano sa pagtabang nato dihang makasala ta?
Kon makahimo tag seryosong sala, si Jehova miingon nga “magtawag [tag] mga ansiyano sa kongregasyon.” (Basaha ang Santiago 5:14, 15.) Kining tinudlo nga mga lalaki nahigugma kang Jehova ug sa iyang mga karnero. Gitudloan sila kon unsaon ta pagtabang aron mabalik ang atong maayong relasyon kang Jehova.—Galacia 6:1.
Unsaon ta pagtabang sa mga ansiyano kon makahimo tag seryosong sala? Gamiton sa duha o tulo ka ansiyano ang mga teksto sa Bibliya aron ipakita kon nganong sayop ang atong nahimo. Hatagan pod ta nilag praktikal nga mga sugyot ug tambag aron dili na nato mabuhat ang maong sala. Limitahan tingali nila sa pipila ka panahon ang atong pagpakigbahin sa ubang kalihokan sa kongregasyon hangtod nga molig-on pag-usab ang atong espirituwalidad. Aron maproteksiyonan ang kongregasyon sa makadaot nga mga impluwensiya, ipalagpot sa mga ansiyano si bisan kinsa nga nakahimog seryosong sala nga dili mahinulsolon.
TUN-IG DUGANG
Palaloma ang imong apresasyon sa paagi ni Jehova sa pagtabang kanato dihang makahimo tag seryosong sala.
3. Ang pagtug-an makatabang nga mabalik ang atong maayong relasyon kang Jehova
Masakitan si Jehova sa bisan unsang sala nga atong mahimo, mao nga angay lang nga ato ning itug-an kaniya. Basaha ang Salmo 32:1-5, ug dayon hisgoti kini nga pangutana:
-
Nganong maayo nga atong itug-an kang Jehova ang atong mga sala imbes itago kini?
Gawas nga itug-an nato kang Jehova ang atong mga sala, mahupayan pod ta dihang mangayo tag tabang sa mga ansiyano. I-play ang VIDEO, ug dayon hisgoti ang mosunod nga pangutana:
-
Sa video, giunsa pagtabang sa mga ansiyano si Canon aron makabalik siya kang Jehova?
Kinahanglang magmatinud-anon ta sa mga ansiyano. Andam silang motabang nato. Basaha ang Santiago 5:16, ug dayon hisgoti kini nga pangutana:
-
Nganong mas sayon para sa mga ansiyano ang pagtabang kanato kon matinud-anon ta nila?
Itug-an ang imong sala, magmatinud-anon sa mga ansiyano, ug dawata ang mahigugmaong tabang ni Jehova
4. Kon sa unsang paagi makatabang ang pagpalagpot
Kon ang usa nga nakahimog seryosong sala dili mosunod sa mga sukdanan ni Jehova, dili na siya puwedeng mahimong bahin sa kongregasyon. Siya ipalagpot, ug dili na ta makig-uban niya o bisan makig-estorya niya. Basaha ang 1 Corinto 5:6, 11 ug 2 Juan 9-11, ug dayon hisgoti kini nga pangutana:
-
Sama nga ang lebadura makapatubo sa minasa, sa unsang paagi ang pagpakig-uban sa dili mahinulsolong nakasala makaapektar sa kongregasyon?
Daghang napalagpot ang mibalik sa kongregasyon sa ulahi kay ang disiplina, bisag sakit, nakatabang nilang makita nga sayop ang ilang nahimo. (Salmo 141:5) I-play ang VIDEO, ug dayon hisgoti ang mosunod nga pangutana:
-
Niini nga video, sa unsang paagi nakatabang kang Sonja ang pagpalagpot?
Sa unsang paagi ang kahikayan sa pagpalagpot . . .
-
nagpasidungog sa ngalan ni Jehova?
-
nagpakita nga si Jehova rasonable ug mahigugmaon?
5. Pasayloon ta ni Jehova kon maghinulsol ta
Si Jesus migamit ug ilustrasyon nga motabang natong masabtan kon unsay bation ni Jehova dihang maghinulsol ang usa ka tawo. Basaha ang Lucas 15:1-7, ug dayon hisgoti kini nga pangutana:
-
Unsay gitudlo niini kanimo bahin kang Jehova?
Basaha ang Ezequiel 33:11, ug dayon hisgoti kini nga pangutana:
-
Unsay importanteng himoon aron mapamatud-an nato nga tinuod gyod tang naghinulsol?
Samag magbalantay, gimahal pag-ayo ni Jehova ang iyang mga karnero
ANG UBAN MOINGON: “Nahadlok ko nga kon itug-an nako sa mga ansiyano ang akong sala, mapalagpot ko.”
-
Unsay imong isulti sa usa ka tawo nga mibati ana?
SUMARYO
Kon nakahimo tag seryosong sala pero nagbasol ta pag-ayo ug determinado nga hunongon ang pagbuhat ug daotan, pasayloon ta ni Jehova.
Review
-
Nganong maayo nga itug-an nato kang Jehova ang atong mga sala?
-
Unsay kinahanglan natong himoon aron mapasaylo ang atong mga sala?
-
Kon nakahimo tag seryosong sala, nganong angay tang mangayog tabang sa mga ansiyano?
SUSIHA
Tan-awa kon sa unsang paagi naeksperyensiyahan sa usa ka lalaki ang kaluoy ni Jehova nga gihisgotan sa Isaias 1:18.
Sa unsang paagi ang kahikayan sa pagpalagpot makahatag ug kaayohan sa tanan nga apektado?
“Kon Nganong ang Pagpalagpot Usa ka Mahigugmaong Kahikayan” (Ang Bantayanang Torre, Abril 15, 2015)
Sayra kon unsaon nimo pagpatin-aw ngadto sa dili Saksi ang kahikayan sa pagpalagpot.
“Likayan ba sa mga Saksi ni Jehova ang Ilang mga Isigkamagtutuo Kanhi?” (Web article)
Sa estorya nga “Kinahanglan Kong Mobalik Kang Jehova,” sayra kon nganong ang usa ka lalaki nga mibiya sa kamatuoran mibati nga gikabig siyag balik ni Jehova.
“Ang Bibliya Makabag-o sa Kinabuhi” (Ang Bantayanang Torre, Abril 1, 2012)
Basin Ganahan Pod Ka
KOMON NGA MGA PANGUTANA
Unsa ang Bible Study Program nga Gina-offer sa mga Saksi ni Jehova?
Sa libreng interactive program nga gina-offer sa mga Saksi ni Jehova, puwede nimong gamiton ang bisan unsang bersiyon sa Bibliya. Puwede nimong paapilon ang tibuok pamilya o mga amigo o amiga.
