ISHOMO RYA 57
Ni enki eki oshemerire kukora wakora ekibi c’amani?
N’obu ori kukunda Yehova obyihire aha mutima kandi okagezaho kutaho amani kugira ngu oyerinde kukora ebiri kubasa kumushasha, hine obu ori kubasa kugwa omu kicumuro otakigenderire. Konka ebicumuro bimwe nibiba biri eby’amani kukira ebindi. (1 Abakorinso 6:9, 10) Wakora ekibi c’amani guma oyijuke ku Yehova ari kuba acakukunda. Naba ayetegwire kukusaasira n’okukukwasa.
1. Ni enki eki tushemerire kukora kugira ngu Yehova atusaasire?
Abari kukunda Yehova ku bari kutekateka aha kibi c’amani eki bakozire nibagira obusaasi bwingi. Konka nibatunga okuhumurizibwa batekateka aha kiraganiso eki Yehova yahire abahereza beye. Nikigira ngu: ‘Ebibi byanyu n’obu birabe nibitukura biryayera nk’orubare.’ (Isaaya 1:18) Ku turi kwehana tubyihire aha mutima Yehova natusaasira. Ni enki ekishemerire kutuma twayehana? Twashasha ahabw’ebibi ebi tukozire nikituma twashaba Yehova embabazi kandi twerinda kushuba kukora enshobe eyi twaba tukozire. Bwanyima, nitutaho amani kugira ngu tuhindure emitekatecere yitu mibi, kandi tureka emibereho eri kutuma twakora ebibi, tugezaho kubaho turi kugendera aha misinge ya Yehova ehikirire.—Shoma omuri Isaaya 55:6, 7.
2. Ni bata oku Yehova ari kukoresa abazehe kugira ngu batukwase twaba tukozire ekibi?
Twakora ekibi c’amani Yehova natushaba kweta abazehe b’ekibina. (Shoma omuri Yakobo 5:14, 15.) Abo bashija abatirweho nibakunda Yehova hamwe n’entama zeye. Nibaba bijwize ebiri kushabwa kugira ngu batukwase kugaruka kugira obunywani burungi na Yehova.—Abagalatia 6:1.
Ni bata oku abazehe bari kutukwasa twaba tukozire ekibi c’amani? Abazehe babiri ninga bashatu nibatukwasa bakoresize Ebyahandikirwe. Nambwenu, nibatugambira ebintu ebi turi kubasa kukora bikatugaruramu amani kandi bikatukwasa kwerinda kushuba kukora ekibi. Nibabasa kutuzibira kwekwatanisa omu bikorwa bimwe na bimwe by’omu kibina, kuhisya twashuba kuba ge omu by’omwika. Kugira ngu abazehe barinde ekibina ebiri kubasa kukishisha nibabinga omuntu okozire ekibi akanga kwehana.
YEGA BYINGI
Yereka ku nosima Yehova obyihire aha mutima ahabw’okuba natukwasa twaba tukozire ekibi c’amani.
3. Kwatura ebibi byitu nibituma twakira omu by’omwika
Ku turi kukora ekibi Yehova nashasha. Obwe rero, tushemerire kukimwaturira tubyihire aha mutima. Shoma omuri Zaaburi ya 32:1-5, rero muganire ahari eki kibuzo:
-
Ahabw’enki kiri kirungi kwaturira Yehova ebibi byitu omu mwanya g’okubimushereka?
N’obu twakwaturira Yehova ebibi ebi tukozire nituhumurizibwa twarondera obuyambi aha bazehe. Zana VIDIYO, rero muganire ahari eki kibuzo.
-
Nk’oku wakireba omuri vidiyo, ni bata oku abazehe bakwasize Canon kugarukira Yehova?
Tushemerire kugambira abazehe ebintu byona tutari kubashereka ahabw’okuba nibaba bari kwenda kutukwasa. Shoma omuri Yakobo 5:16, rero muganire ahari eki kibuzo:
-
Ahabw’enki kugambira abazehe byona tutari kubashereka kiri kubakwasa kutuha obuyambi obu turi kwetenga?
Yatura ebibi byawe, obigambire abazehe otari kubashereka, kandi oyikirize obuyambi obu Yehova arakuhe.
4. Omugasho g’okubinga omuntu okozire ekibi omu kibina
Omuntu okozire ekibi c’amani kandi akanga kukuratiza emisinge ya Yehova naba atacari omwe aha b’omu kibina. Nabingwa omu kibina kandi nituba tutacayekwatanisa na we n’obu kwakuba okugamba na we. Shoma omu 1 Bakorinso 5:6, 11 n’omuri 2 Yohaana 9-11, rero muganire ahari eki kubuzo:
-
Ni bata oku kwekwatanisa n’omuntu otari kwehana biri kubasa kushisha ekibina, nk’oku ekitumbisa kiri kuzimbisa omugati?
Abingi omu babingirwe bakahika aho bagaruka omu kibina ahakuba n’obu batungire ekihano kikabashasha, kikatuma bahindura emitwarize yabo. (Zaaburi 141:5) Zana VIDIYO, rero muganire ahari ebi bibuzo.
-
Nk’oku wakireba omuri vidiyo, ni bata oku okubingwa omu kibina cakwasize Sonja?
Ni bata oku entebekanisa y’okubinga omuntu omu kibina eri . . .
-
kutuma izina rya Yehova ryahimbisibwa?
-
eri kwereka ku Yehova ari kutukunda?
5. Yehova natusaasira twayehana tubyihire aha mutima
Yesu akakoresa ecokureberaho ekiri kutukwasa kushoborocerwa oku Yehova ari kwehurira omuntu yayehana. Shoma omuri Luka 15:1-7, rero muganire ahari eki kibuzo:
-
Mbwenu shi ebyo nibikwegesa ki ahari Yehova?
Shoma omuri Ezekieli 33:11, rero muganire ahari eki kibuzo:
-
Okwehana nibitwariramu enki?
Yehova nafa aha ntama zeye nk’oku omurisa ari kukikora
ABANTU ABAMWE NIBAGAMBA NGU: “Nintina kugambira abazehe ebibi ebi nkozire ahabw’okuba bakahika bari kumbinga omu kibina.”
-
Ni enki eki ori kubasa kugambira omuntu oyine eyo mitekatecere?
EMPINYE
Ku turi kukora ekibi c’amani kikatushasha, kandi tukamaririra kutashuba kukikora, Yehova natusaasira.
Wayega ki?
-
Ni guha mugasho g’okwaturira Yehova ebibi byitu?
-
Ni enki eki tushemerire kukora kugira ngu tusaasirwe ebibi byitu?
-
Ahabw’enki tushemerire kurondera obuyambi aha bazehe twakora ekibi c’amani?
CONDOZA
Reba oku omushija omwe yayerebire embabazi za Yehova nk’oku kiri kugambwa omuri Isaaya 1:18.
Ni bata oku entebekanisa y’okubinga omuntu okozire ekibi omu kibina eri kugasira buri omwe omu kibina?
Reba oku ori kubasa kushobororera omuntu otari Omuhamya wa Yehova ebikwatirine n’okubinga omuntu okozire ekibi c’amani omu kibina.
“Mbehi Abahamya ba Yehova niberinda omuntu owabire ari omu dini yabo?” (Enkuru y’ahari intaneti)
Omu nkuru eri kugamba ngu, “Nkaba ninyenda kugarukira Yehova,” reba enshonga ahabw’enki omushija owabire yarugire omu mazima yahurire ari kwenda kugarukira Yehova.
“Bibuli nehindura amagara g’abantu” (Omunara g’Omurinzi, 1 Okwakana, 2012)
