Inaamwo ika ka fókkun tongei Jiowa me ka achocho le ttiisonuk ekkewe mettóch mi eletipengawa, nge fán ekkóch kopwe kan mwámmwáálliló. Iwe nge, a wor ekkóch tipis ra kon chou seni pwal ekkóch tipis. (1 Korint 6:9, 10) Ika ka féri eú tipis mi chou, chemeni pwe Jiowa a chúen tongeok me a mochen omusakoló me álisuk.

1. Met a lamot sipwe féri pwe Jiowa epwe omusaaló ach tipis?

Chókkewe mi tongei Jiowa ra letipechou atun ra mirititi pwe ra féri eú tipis mi chou. Nge a pwal oururu letiper án Jiowa ei pwon ngeni néún aramas: “Oua limengau ren tipis usun eman a limengau ren cha. Nge ngang üpwe limetikemi pwe oupwe limöch usun pwechepwechen sno.” (Aisea 1:18) Ika sia enletin aier, Jiowa epwe unusen omusakicheló. Ifa usun sipwe aier? Sipwe enletin niamamesini minne sia féri, úkútiw seni ena féffér mi ngaw, me tingorei Jiowa an epwe omusakicheló. Mwirin, sipwe achocho le ekkesiwili ach ekiek me féffér mi ngaw mi emmwenikich ngeni ena tipis, me sipwe achocho le etipeeú manawach ngeni án Jiowa kewe allúk mi limeliméch.​—Álleani Aisea 55:6, 7.

2. Ifa usun Jiowa a néúnéú ekkewe mwán mi ásimaw le álisikich atun sia féri tipis?

Ika sia féri eú tipis mi chou, Jiowa a erenikich ach sipwe “titi ekewe souakomwen mwichefel,” weween ekkewe mwán mi ásimaw. (Álleani James 5:14, 15.) Iir ra tongei Jiowa me néún kewe siip. Ra tongeni álisikich ach sipwe ririéchsefál ngeni Jiowa.​—Kalatia 6:1.

Ifa usun ekkewe mwán mi ásimaw repwe álisikich atun sia féri eú tipis mi chou? Rúúemén are úlúmén mwán mi ásimaw repwe néúnéú ewe Paipel le áwenakich. Repwe pwal awora ngenikich kapasen emmwen mi álilliséch me apéchékkúlakich pwe sisap férsefáli ena tipis. Eli repwe filatá ach sisap mwo féri ekkóch mettóch lón ewe mwichefel tori an a péchékkúlsefál ach riri ngeni Jiowa. Ika emén a féri eú tipis mi chou nge ese mochen aier, iwe ekkewe mwán mi ásimaw repwe atowu seni ewe mwichefel pwe ete etipetipa ekkewe ekkóch lón ewe mwichefel.

 KÚTTAFICHI

3. Ach pwári tipisich epwe álisikich le ririéchsefál ngeni Jiowa

Atun sia tipis, sia ámeteki letipen Jiowa, ina popun a lamot ach sipwe pwári ngeni ach we tipis. Álleani Kölfel 32:1-5, me mwirin pwóróusfengen wóón ei kapas eis:

• Pwata a éch ach sipwe pwár ngeni Jiowa ach kewe tipis, nge sisap fen aopaaló?

 4. Ifa álilliséchún ewe kkótun katowu?

Ika emén mi féri eú tipis mi chou ese mochen álleasochisi án Jiowa kewe allúk, iwe esap chúen tongeni chóni ewe mwichefel. Epwe katowu, me sisap chiechi ngeni are pwal mwo nge fós ngeni. Álleani 1 Korint 5:6, 11 me 2 Johannes 9-11, me mwirin pwóróusfengen wóón ei kapas eis:

• Usun án iis apwotáái pilawa, ifa usun ach chiechi ngeni emén ese mochen aier epwe etipetipa chón ewe mwichefel?

 MENLAPAN

Ika sia féri eú tipis mi chou, nge sia enletin mengiringir me mwirin, me sia úppós ach sisap férisefál, iwe Jiowa epwe omusaaló tipisich.

Enniwili

• Pwata a éch ach sipwe pwári ngeni Jiowa ach kewe tipis?

• Met a lamot sipwe féri pwe epwe musoló ach kewe tipis?

• Ika sia féri eú tipis mi chou, pwata a lamot ach sipwe kútta álillis seni ekkewe mwán mi ásimaw?