Jehovah it mahmahin Pasian’ lungsim a liamsak thei thute pelh ding na hanciam hang, khat veivei ciangin mawhna bawl khathei ding hi teh. Ahih hangin, mawhna pawlkhat pen adang sangin lianzaw thei hi. (1 Korin 6:9, 10) Tua bang mawhna lian na bawlkhak ciangin zong Jehovah in nang hong it lai veve a, na mawhna hong maisak nuamin hong huh nuam lai hi, cih phawk den in.

1. Jehovah’ mawhmaisakna i ngah nadingin bang i hih ding kisam a hiam?

Jehovah a itte in mawhna lian a bawlkhak ciangun khasia mahmah uh hi. Ahih hang, “Na mawhnate uh puansan a bat hangin vuk bangin hong ngo ding hi,” cih Jehovah’ kamciamna hangin lungmuanna ngah uh hi. (Isaiah 1:18) Lungsim takpi tawh kisikkik leng, Jehovah in i mawhna hong maisiangsak ding hi. Koi bang danin kisikkik i hiam? Mawhna i bawlkhakte adingin nakpi takin khasia-in, mawhna bawlkik nawn lo-in Jehovah kiangah mawhmaisakna i ngen hi. Tua khit teh, mawhna hong bawlsak thei a hoih lo ngaihsutnate le gamtatnate kikhelin Jehovah ii a siangtho tehna banga nungta dingin nakpi takin i hanciam hi.​—Isaiah 55:6, 7 sim in.

2. Mawhna i bawlkhak cianga hong huh dingin Jehovah in upate koici zat a hiam?

Mawhna lian i bawlkhak ciang, “pawlpi upate sam” dingin Jehovah in hong hilh hi. (James 5:14, 15 sim in.) Upate in Jehovah le a nasemte it uh hi. Jehovah tawh i kizopna a hoihkik nadingin zong hong huh thei uh hi.​—Galati 6:1.

Mawhna lian i bawlkhak ciangin upate in koi bangin hong huh uh a hiam? Upa nih ahih kei leh thum in Lai Siangtho bulphuhin thu hong hilh ding uh hi. Mawhna i bawlkik loh nadingin thuhilhnate le tha piaknate hong nei ding uh hi. Pasian’ thu lamah i cidamkik dongin Khristian nasepna pawlkhatah kihel lo dingin hong ciangtan thei uh hi. Mawhna a bawl mi khat a kisikkik kei leh a lauhuai thuzawhnate pana pawlpi a kepcing nadingun pawlpi panin amah hawlkhia ding uh hi.

 ZON BEH INLA, MUH BEH IN

3. Mawhna pulakna in Pasian thu lamah hong cidamkiksak

Mawhna i bawlkhak sialin Jehovah’ lungsim liamsak ihih manin mawhna i pulak ding kisam hi. Late 32:1-5 sim in. Tua khit teh hih dotna kikum un:

• Mawhna seelcip lo-in Jehovah kiangah bang hangin i pulak ding kisam a hiam?

 4. Hawlkhiatna in huhna khat hi

Mawhna lian a bawl khat in Jehovah’ tehnate a zuih nop kei leh pawlpi sungah om thei lo ding hi. Amah kihawlkhia ding a, amah tawh kikhawl nawn lo-in, i hopih nawn kei hi. Korin Masa 5:6, 11 le 2 Johan 9-11 sim in. Tua khit teh hih dotna kikum un:

• Silngo in annel lompi a pawmsak mah bangin a kisikkik lo mawhna a bawl mi khat tawh kikholhna in pawlpi koici siasak thei a hiam?

 TOMLAKNA

Mawhna lian i bawlkhak hang, lungsim takpi tawh khasia-in mawhna bawl nawn lo dingin khensat leng Jehovah in i mawhna hong maisak ding hi.

Kikupkikna

• Jehovah kiangah mawhna i pulak ding bang hang kisam a hiam?

• Mawhmaisakna i ngah nadingin bang i sep ding kisam a hiam?

• Mawhna lian i bawlkhak ciangin bang hang upate kiangah huhna i nget ding kisam a hiam?