ˈKö ˗kë ꞊dhɛ Zoova ˗dhɔ ˗yö kwa ˗kë ꞊dedewo ˈö ˈkwa kwa ˈgü dɔ ˗ni ˈgü ˈˈgbɩɩ˗ kö kwa ˈdho˗ ˗a ˗shiödhɛwɔn kë, ˈwɔn ꞊mɔɔn˗ ˗bha ˈö zë kwa ˗gɔ ˈˈtʋ̈ŋ ˈbhaa ˗nu ˈka. ˈˈKɛɛ ˈwɔn yaa ˈbhaa ˗nu ˗wo ꞊gbɔɔnsü ꞊dedewo ˈö ˈwo ˗ʒiö ˗a ˈka ˗a ˈbhaa ˗nu ˗ta. (1 Kodhɛngtö 6:9, 10) Kö ˈü ˈwɔn yaa ꞊gbɔɔnsü kë, ˈya ˗dho kë ü ˈgü ꞊dhɛ ü ˗dhɔ yö ˈti ˗dho Zoova kë ˈzüdho. Ü ˗bhawɔn ˈto ˗sü waa ü ˗takun ˗dhɔ ˗ya ˈgü ˈˈtʋ̈ŋ ꞊gban ˈka.

1. ˈBha ˈwɔn yaa kë, ü ˗dho ˗a kë ꞊dhɛ kö Zoova ˗yö ü ˗bhawɔn ˈto?

Mɛn ˗nu ˈö Zoova ˗dhɔ ˗yö ˗an ˗kë, ꞊waa˗ yö ꞊dhɛ ˈwa ˈwɔn yaa ꞊gbɔɔnsü kë, ˗wëë ˗yö ˗bɔ ˗an ˗ta. ˈˈKɛɛ pë ˈö Zoova ˗ya ˈˈplüün bho ö ˗dhɔkëmɛn ˗nu ˗dhɛ, ꞊waa˗ man ˗yö ˗an ˗zogban. ˗Ya ˗pö: « ˈKö ˗kë ꞊dhɛ ka ˗bha ˈwɔn yaa ˗nu ˗wo ꞊dhɛ pë ˈˈɲan ˗zaɔndhö ˈdhö, ˗wo ˗dho kë ˈˈpuu ꞊dhɛ mënŋga ˈdhö.» (Isaïe 1:18) ꞊Wa ˈgo wo ˗bha ꞊sɔŋ yaa ˈgü, Zoova ˗yö ˗an ˗bhawɔn ˗to ˈpapadhö. ˈˈKɛɛ ˈmën ˈwo˗ ˗dhɛ ˗go ö ˗bha ꞊sɔŋ yaa ˈgü ˗sü? ˗Go ö ˗bha ꞊sɔŋ yaa ˈgü ˗sü ˈnën ˗tɔ ˈwɔn yaa ˈü˗ ˗kë ˗a ˗bha ˗mën ü ˈka ˗sü ˈö ˈü ˗kan ˗a ˗bha, ˈö ˈü ꞊bhɛɛ Zoova ˗dhɛ kö ˗yö ü ˗bhawɔn ˈto. ꞊Ya ˈgo mü ˈzü ˗a ˗mɛn ˗yö ö ˈgü ˗dɔ ˈˈgbɩɩ˗ ˈö ˗kan ö ˗bha ˗zotadhe waa ö ˈˈtakɔ ˗nu ˈwo dho ˗a ˈka ʒiaan yaa ˗ta bhë ˗an ˗bha, ˈö pë ꞊gban ˈˈpɛpɛ ˗kë kö ˈö Zoova ˗bha ˈtɔŋ˗ ˈˈslʋ̈ʋ̈slʋ̈ ˗nu bhë ˗an ˗ya ꞊bhlëë ˈgü.—Isaïe 55:6, 7 ˗wo pö.

2. Kö ˈkwa ˈwɔn yaa kë, Zoova ˗yö ˗bɔ mɛn zii ˗nu ˗ta ˈö kwa ˗takun ˗kɔ ˗kë ꞊dhɛ?

Mɛn ˈö ˈwɔn yaa ꞊gbɔɔnsü ˗kë, Zoova ˗ya ˗pö ‹˗a ˗mɛ ˗yö ˈˈdhiʋ̈ ˗sü ˗Zlan ˗bha ˈkɔdhigümɛ ˗nu ˈka ˗mɛ ˗nu [ɛɛnˈˈ mɛn zii ˗nu] ˗dhɛ.› (Zakö 5:14, 15 ˗wo pö.) Zoova waa˗ gbamɛn ˗nu ˗dhɔ ˗yö mɛn zii ˗nu ˈwo ˈˈdhʋ̈ ˗an ˗kë. ˗Kɔ ˈwo ˗dho kwa ˗takun ˗a ˈka kö ˗mlɛɛn ˈö kwaa Zoova kwa ꞊zinŋgü ˗yö kë ˗së ˈzü, ˗a ˈˈslö ˗yö ˗an ˗gɔ.—Gadhatö 6:1.

Mɛn ˈö ˈwɔn yaa ꞊gbɔɔnsü ˗kë, mɛn zii ˗nu ˗wa ˗takun ˗kɔ ˗kë ꞊dhɛ? Mɛn zii do ɛɛnˈˈ ꞊plɛ ˗wo ˗bɔ Biblö ˗ta ˈö ˈwo˗ ˗zɔn ˗a ˗dhɛ ꞊dhɛ pë ˈö˗ ˗kë bhë ˗yö ˈyaa˗. ˗Gleŋ ˗nu ˈwo ˗dho ˗a ˗takun kö ˈya ˗dho ˈwɔn yaa suu ˈö ˈˈdhʋ̈ ˗a kë ˈzü, ˗wa ˗zɔn ˗a ˗dhɛ. ˗Wo ˗dho ˗a ꞊kiɛɛ ˈˈkaan˗ yö ˈbhaa ˗nu ˈö ˈwo ˗zlanwokɔdhi ˈgü ˗an kë ˗sü ˗bha ˈö dho ˈö yö ˗a ˈka ˈˈtʋ̈ŋ ˈö waa ˗Zlan ˗an ꞊zinŋgüdhɛ dho baaˈˈ ˗a ˈka bhë ˗a ˗bha. ˈˈKɛɛ ˗a ˗mɛn yö ˈti ˈˈwɩ ˗a ˗bha kö ˈö ˈˈkan ö ˈˈtakɔ yaa ˈö bhë ˗a ˗bha, ˗wo ˗dho ˗a bho kwa kpö ˈgü, ˗yö kë ˈˈdhʋ̈ kö ˗a ˈˈtakɔ yaa ˈö bhë ˈya ˗dho ˗zlanwokɔdhi ˈgüdhɛ shiʋ̈ˈˈ.

 ˗KAA ˈˈPIƲ̈ ˈPƆN

3. Kö ˈkwa ˈˈdhe bho kwa ˗bha ꞊sɔŋ yaa ˗nu ˗ta, kwaa ˗Zlan kwa ꞊zinŋgüdhɛ ˗yö ˗kë ˗së ˈzü.

Kö ˈkwa ˈwɔn yaa kë, ˗yö ˗mën Zoova ˈka ꞊dedewo. ˈDhɛ ˈö ˈˈdhʋ̈ kwa dua ˗mü kö ˈkwa˗ blɛɛˈˈ ˗a ˗dhɛ. ˗Ka Psaume 32:1-5 ˗an ˗wo pö, kö ˈka dhɛɛˈˈ ˈö yö ˗a ˗yɔ mɛɛnˈˈ:

• ˈMën ˗kë ˈö ˗së kö ˈkwa ˈˈdhe bho ˈwɔn yaa ˈö ˈkwa˗ ˗kë ˗a ˗ta Zoova ˗dhɛ kö ˈkwa ˗dho ˗a ˗bin?

 4. ˈWɔnyaakëmɛn ˗bho kwa kpö ˈgü ˗sü ꞊trɔɔn ˗së ˗nu ˗wo ꞊va.

Mɛn ˈö ˈwɔn yaa ꞊gbɔɔnsü ˗kë ˈö ˈyaa ˈˈwɩ ˗dhioo ˗nu ˈwo ˗gban Zoova ˗bha ˈtɔŋ˗ ˗nu ˗ta ˗an ˗ya ꞊bhlëë ˈgü ˗sü ˗bha, ˗a dua ˈyaa ˗mü kö ˗yö ˈto ˗zlanwokɔɔdhö. ꞊Ya kë ˈˈdhʋ̈ ˗wa ˗bho kwa kpö ˈgü, ˈö ˈkwaa ꞊nënŋ ˗a ˗bha, ɛɛnˈˈ ˈö ˈkwaa ˈˈwɩ ˗a ˈˈpiʋ̈ ˗ʒiaanwo. ˗Ka 1 Kodhɛngtö 5:6, 11 waa 2 Zan 9-11 ˗an ˗wo pö, kö ˈka dhɛɛˈˈ ˈö yö ˗a ˗yɔ mɛɛnˈˈ:

• Kö ˗wo ˈˈsɛkɛ ˈnën ˈdɛdɛ ˗da ˈbluu˗ ˗böö ˈˈpiʋ̈, ˗a ˈbluu˗ ˗böö ˗yö ˗kë ꞊dhɛ? Mɛn ˈö ˈwɔn yaa ˗kë ˈö ˈyaa ˈˈwɩ ˗a ˗bha ˈö ˈgo ö ˗bha ꞊sɔŋ yaa ˈgü, ˗ya ˈto ˗zlanwokɔdhi ˈgü, ˗mën ˈö˗ ˈˈtakɔ dho ˗a kë ˗zlanwokɔdhi ˈka?

 ˗A ˈDHƐ TO KWA ˈˈƝAAN

Kö ˈkwa ˈwɔn yaa ꞊gbɔɔnsü kë, kö ˗yö kë kwa ˗dhɛ ˈyaa˗ ꞊dedewo kö ˈkwa ˈˈkan ˗a ˗bha, Zoova ˗dho kwa ˗bhawɔn ˈto.

˗Zobuödhe

• ˈKwa ˈwɔn yaa kë ˈmën ˗kë ˈö ˗së kö ˈkwa˗ blɛɛˈˈ Zoova ˗dhɛ?

• ˗Mën ˈö ˈkwa ˗dho ˗a kë kö Zoova ˗yö kwa ˗bhawɔn ˈto?

• Kö ˈkwa ˈwɔn yaa ꞊gbɔɔnsü kë, ˈmën ˗kë ˈö kwa dua ˈdhö ˗mü kö ˈkwa ˗takundhe ˗dhɛ mɛn zii ˗nu ˗gɔ?