JOKWA 57

Yete̱na o boli bobe bonde̱ne̱

OKA

To̱ná o to̱ndino̱ Yehova jita o mabolano̱ pe̱ me̱se̱ ná o si bwese̱ mo̱ ndutu, o me̱nde̱ po̱ngo̱ mawuse̱ ponda iwo̱. Nde myobe mō̱ me bonde̱ne̱ buka mine̱. (1 Korinto 6:9, 10) Yete̱na o boli bobe bonde̱ne̱, bia ná Yehova a dia te̱ nde a to̱ndi wa; a le̱le̱m o lakise̱ wa na o jongwane̱ wa.

1. Nje jangame̱nno̱ bola ná Yehova a lakise̱ biso̱ e?

Ba bena ba to̱ndi Yehova ba mabwa ndutu jita ponda ba maso̱ṅtane̱no̱ ná ba boli bobe bonde̱ne̱. Nde din dikaki Yehova a bolino̱ tumba lao di malo̱ko̱ babo̱: “To̱ myobe mańu mi be̱ nde na beletete ka maya, mi me̱nde̱ sanga ka mbo̱m.” (Yesaya 1:18) Yete̱na jate̱le̱ na mbale̱, Yehova a me̱nde̱ lakise̱ biso̱ ná bambam. Ne̱ni di mate̱le̱no̱ e? Di mombwe̱ na mbale̱, jese̱le̱ o bola bobe, di so̱so̱me̱ye̱ pe̱ Yehova ná a lakise̱ biso̱. Ombusa nika di mabola me̱se̱ o tukwa mo̱nge̱le̱ na bede̱mo ba bobe bena ba tute̱le̱ biso̱ o bola bobe, nde di po̱ngo̱ pe̱ miwe̱n o die̱le̱ longe̱ lasu kaponda bete̱sedi ba bosangi ba Yehova.—Langa Yesaya 55:6, 7.

2. Ne̱ni Yehova a mabolane̱no̱ batudu o jongwane̱ biso̱ ke̱ di boli bobe e?

Di boli te̱ bobe bonde̱ne̱, Yehova a malangwea biso̱ ná di “bele̱ batudu ba mwemba.” (Langa Yakobo 5:14, 15.) Batudu ba to̱ndi Yehova na mido̱ngi mao. Ba dongame̱n o jongwane̱ biso̱ ná di po̱ngulane̱ mulatako masu na Yehova.—Galatia 6:1.

Ne̱ni batudu ba mongwane̱no̱ moto nu boli bobe bonde̱ne̱ e? Batudu baba to̱ balalo ba me̱nde̱ bolane̱ Bibe̱l o lee̱ mo̱ ońola nje lambo a bolino̱ leno̱ bobe. Ba me̱nde̱ pe̱ bola mo̱ malea ma bwam o jongwane̱ mo̱ ná a si ko̱ pe̱ o bobe. Be ná ba no̱ngo̱ bedomsedi ná a titi pe̱ ná a bola mambo mō̱ o mwemba natē̱ a ja bwam o mbad’a mudī. Yete̱na moto a boli bobe bonde̱ne̱ nde a banga jate̱le̱, batudu ba mapanga mo̱ o bebokedi ná ba tate mwemba.

ALA O NJIBA

Bata so̱ṅtane̱ ne̱ni Yehova a mongwane̱no̱ biso̱ yete̱na di boli bobe bonde̱ne̱.

3. Puse̱le̱ la myobe di mongwane̱ biso̱ o ja bwam

Di boli te̱ bobe, di mabwese̱ Yehova ndutu; e te̱nge̱n so̱ ná di puse̱le̱ bobe basu ombo’ao. Langa Myenge 32:1-5, nde lo kwaleye pe̱ ońola min myuedi:

Ońola nje yeno̱ bwam ná di puse̱le̱ bobe basu omboa Yehova o mulopo ma keka wuta mo̱ e?

Ombusa biso̱ puse̱le̱ myobe masu omboa Yehova, jangame̱n pe̱ wasa jongwane̱ la batudu, ná di senge bwam. Ombwa SINIMA, nde lo kwaleye pe̱ ońola myuedi mi mabupe̱.

SINIMA: “Sango [Yehova] a mako̱kise̱ nu ńena a to̱ndino̱” (3:01)

Ne̱ni batudu bongwane̱no̱ Canon o timba na Yehova e?

Jangame̱n be̱ mbale̱ na batudu di langwea pe̱ babo̱ mambo me̱se̱; ebol’abu ye nde ná bongwane̱ biso̱. Langa Yakobo 5:16, nde lo kwaleye pe̱ ońola min myuedi:

Ońola nje yeno̱ batudu lambo di wam o jongwane̱ biso̱ yete̱na je mbale̱ e?

Puse̱le̱ bobe bo̱ngo̱, be̱ mbale̱ na batudu, wemeye pe̱ jongwane̱ la ndolo la Yehova

4. Panga la moto o bebokedi le muse̱ṅ

Yete̱na moto nu boli bobe bonde̱ne̱ a bangi o bupe̱ bete̱sedi ba Yehova, a titi pe̱ ná a be̱ elong’a mwemba. A mapangabe̱ nde, di titi pe̱ ná di be̱ mundenge na mo̱ to̱ kwalisane̱ mo̱. Langa 1 Korinto 5:6, 11 na 2 Yohane 9-11, nde lo kwaleye pe̱ ońola min myuedi:

Ka nje te̱ esasange e mabolano̱ ná m’bo̱ndo̱ mu wule̱, nje pe̱ mundenge na mubole̱ bobe nu bangi jate̱le̱ mweno̱ ná mu wana oteten a mwemba e?

Bato jita bena ba pangabe̱ ba timbi o mwemba ombusa ponda, ebanja be beko̱kisedi bongwane̱ babo̱ o so̱ṅtane̱ ná ba boli bobe, to̱ná be tano̱ sese. (Myenge 141:5) Ombwa SINIMA, nde lo kwaleye pe̱ ońola myuedi mi mabupe̱.

SINIMA: Sue̱le̱ mbako a Yehova na jemea (9:28)

Ne̱ni pangabe̱ la Sonia longwane̱no̱ mo̱ e?

Ne̱ni panga la moto o bebokedi . . .

di mabolano̱ dina la Yehova edube e?
di malee̱no̱ ná Yehova a te̱m ná sim e pe̱ ndolo e?

5. Yehova a malakise̱ biso̱ yete̱na jate̱le̱

Yesu a bolane̱ eyembilan e mongwane̱ biso̱ o so̱ṅtane̱ ne̱ni Yehova a masengano̱ ke̱ moto ate̱le̱. Langa Lukas 15:1-7, nde lo kwaleye pe̱ ońola min myuedi: