KALANSEN 57

N’i ye jurumuba dɔ kɛ do?

A LAMƐN KAAN NIN NA

Hali n’i be Jehova kanu kosɔbɛ, ani i b’i jija walisa i kana koo si kɛ min bena a dusu tiɲɛ, o n’a ta bɛɛ, i bena fili tuma dɔw la. Nka, jurumu dɔw ka jugu ni dɔ wɛrɛw ye (1 Korɛntikaw 6:9, 10). N’i ye jurumuba dɔ kɛ, a to i hakili la ko Jehova bele b’i kanu. A labilanin lo ka yafa i ma ani k’i dɛmɛ.

1. An ka kan ka mun lo kɛ walisa Jehova ka yafa an ma?

Minw be Jehova kanu, n’u y’a faamu k’u ye jurumuba dɔ kɛ, u dusu be kasi kosɔbɛ. Nka Jehova ka layidu kuma nunu b’u dusu saalo: “Hali n’aw ka kojuguw wulenna i ko joli, u bena gwɛ i ko kɔɔri.” (Ezayi 1:18). N’an nimisara sɔbɛ la, Jehova bena yafa an ma pewu. Nka an b’a yira cogo di ko an nimisara? An ye koo jugu min kɛ, o tunkalɔn b’an minɛ fɔɔ an b’o koo jugu dabila, ani an be Jehova deli a ka yafa an ma. O kɔ, miiriya wala delinanko jugu minw y’an bila jurumu na, an b’an jija k’u bɔ an hakili la wala k’u dabila. An b’an jija fana k’an ka ɲɛnamaya kɛ ka kɛɲɛ ni Jehova ka sariyakolow ye.—Ezayi 55:6, 7 kalan.

2. N’an ye jurumu kɛ, Jehova be tɛmɛ diinan mɔgɔkɔrɔw fɛ cogo di k’an dɛmɛ?

N’an ye jurumuba dɔ kɛ, Jehova ko an ka “Krista ka jama ɲamɔgɔw wele.” (Zaki 5:14, 15 kalan). Diinan mɔgɔkɔrɔw be Jehova kanu ani u b’a sagokɛlaw fana kanu. U ye fɔrɔmasɔn sɔrɔ walisa u ka se ka jurumukɛla dɛmɛ a ka jɛnɲɔgɔnya kɛ ni Jehova ye kokura.—Galatikaw 6:1.

Diinan mɔgɔkɔrɔw b’an dɛmɛ cogo di n’an ye jurumuba dɔ kɛ? An ye min kɛ, diinan mɔgɔkɔrɔ fila wala saba bena basigi Bibulu kan k’a ɲɛfɔ an ye fɛɛn min kama o ye koo jugu ye. U bena ladili nafamanw di an ma fana walisa k’an dɛmɛ an kana ben o jurumu na tugun. N’a sɔrɔ u be se k’a fɔ an ye ko an tɛ se k’an seen don tugun kafo ka koo dɔw la wagati dɔ kɔnɔ. Ni balima dɔ ye jurumuba kɛ ani a ma nimisa, diinan mɔgɔkɔrɔw bena a tigi gwɛn ka bɔ kafo kɔnɔ walisa ka kafo latanga.

A ƝINI KA DƆ LƆN TUGUN

Jehova b’an dɛmɛ n’an ye jurumuba dɔ kɛ. An k’a filɛ cogo min na an be se k’a waleɲuman lɔn kosɔbɛ o kosɔn.

3. N’an b’an ka jurumu fɔ, o b’an lafiya

N’an ye jurumu kɛ, o be Jehova dusu tiɲɛ. O kama a ka ɲi an k’an ka jurumu fɔ a ye. Zaburuw 32:1-5 kalan. Ani, a’ ye baro kɛ ɲiningali nin kan:

Mun na an ka ɲi k’an ka jurumuw fɔ Jehova ye sanni k’a ɲini k’u dogo?

N’an b’an ka jurumuw fɔ Jehova ye ani o kɔ an be dɛmɛ ɲini diinan mɔgɔkɔrɔw fɛ, o b’an lafiya. A’ ye VIDEWO filɛ. O kɔ, a’ ye ɲiningali nin kɛ ani ka baro kɛ o kan:

VIDEWO: “Jehova be mɔgɔ min kanu, a b’o tigi kolo” (3:01)

Diinan mɔgɔkɔrɔw ye Canon dɛmɛ cogo di a kɔsegira Jehova ma?

An ka kan k’an kɔnɔ gwɛ diinan mɔgɔkɔrɔw ye. U be yen walisa k’an dɛmɛ le. Zaki 5:16 kalan. O kɔ, a’ ye ɲiningali nin kɛ ani ka baro kɛ o kan:

N’an b’an kɔnɔ gwɛ diinan mɔgɔkɔrɔw ye, mun na o bena nɔgɔya u ma ka se k’an dɛmɛ?

I ka jurumu fɔ, i kɔnɔ gwɛ diinan mɔgɔkɔrɔw ye, ani Jehova be dɛmɛ min lase i ma ni kanuya ye, sɔn o la

4. Ka jurumukɛla gwɛn ka bɔ kafo kɔnɔ, mun na nafa b’o la?

Ni mɔgɔ dɔ ye jurumuba kɛ ani a t’a fɛ ka Jehova ka sariyakolow labato, a tɛ se ka to kafo kɔnɔ tugun. U b’a gwɛn ka bɔ kafo kɔnɔ, ani an tɛ jɛn n’a ye wala ka kuma n’a ye yɛrɛ. 1 Korɛntikaw 5:6, 11 ani 2 Zan 9-11 kalan. O kɔ, a’ ye ɲiningali nunu kɛ ani ka baro kɛ u kan:

Burufunufɛn be mun lo kɛ mugu nɔɔninin na? Jurumukɛla min tɛ nimisa, ale be se ka nɔɔ juman lo to kafomɔgɔw kan?

Minw tun gwɛnna ka bɔ kafo kɔnɔ, u caaman kɔsegira ka na. Mun na do? Sabu hali n’o kololi ma kɛ dusudiyako ye u fɛ, u labanna k’a faamu k’u ye min kɛ, o ye koo jugu lo ye (Zaburuw 141:5). A’ ye VIDEWO filɛ. O kɔ, a’ ye ɲiningali nin kɛ ani ka baro kɛ o kan:

VIDEWO: Jehova ka kitikow lafasa ni kantigiya ye (9:28)

U kɛtɔ ka Sonia gwɛn ka bɔ kafo kɔnɔ, o y’a nafa cogo di?

Ka jurumukɛla gwɛn ka bɔ kafo kɔnɔ, . . .

mun na o be bonya la Jehova tɔgɔ kan?
mun na o b’a yira ko Jehova tilennin lo ani ko kanutigi Ala lo?

5. N’an nimisara, Jehova be yafa an ma

Ni jurumukɛla dɔ nimisara, o koo be min kɛ Jehova la, Yezu ye ntalen kuma dɔ fɔ walisa k’an dɛmɛ k’o faamu. Luka 15:1-7 kalan. O kɔ, a’ ye ɲiningali nin kɛ ani ka baro kɛ o kan: