Bʉa bio quĩrĩã ɓʉmĩna Jeowara idjaɓa ĩjã quĩrĩã ɓʉ idjira, eɗauɗe ne cadjirua poya oida. Zocãrã cadjiruara ɓʉda, aɓa ɓʉmĩna jãʉ̃ cãyãbara biara cadjiruara ɓʉda (1 Corinto 6:9, 10). Quĩrãnebadua, bʉa cadjirua oɗamĩna Jeowaba waɗi quĩrĩã ɓʉda; idjia careba quĩrĩã ɓʉda idjaɓa poya quĩrãdoaida bʉ ne cadjirua oɗaba.

1. ¿Cãrẽda oɗida panʉ Jeowaba quĩrãdoamãrẽã dadji ne cadjirua?

Ẽberãba quĩrĩã ɓʉbʉrʉ Jeowara, ne cadjirua oibʉrʉ bio sopuabarida. Maʉ̃ba idjia careba quĩrĩã ɓʉda, maʉ̃ carea Jeowaba idji purua jarasia: “Bãrã ne cadjiruara purea ɓʉmĩna, torroa ɓaida nieve quĩrãca” (Isaías 1:18). Ẽberãba bio sopua ɓʉbʉrʉ idji ne cadjirua oɗa carea, Jeowaba poya quĩrãdoaida jãʉ̃ ne cadjirua. ¿Cãrẽda jara quĩrĩã ɓʉda ne cadjirua oɗa carea sopua ɓaida? Jãʉ̃ra jãwã jara quĩrĩã ɓʉda bio sopua ɓʉda ne cadjirua oɗa carea, waa oẽ́da ne cadjirua oɗara idjaɓa ʉ̃taa dji idida Jeowa quĩrãdoamãrẽã jãʉ̃ ne cadjirua. Maʉ̃ bʉrʉ esfuerzo oɗida panʉa dadji crĩcha awara oi carea idjaɓa ne cadjiruara igarai carea, maʉ̃ cãyãbara ĩjã oɗida Jeowaba jara ɓʉra (Leadua Isaías 55:6, 7).

2. ¿Dadjirãba ne cadjirua o panʉbʉrʉ Jeowaba sãwã careba ɓʉda djabarã wagabadarãneba?

Aɓaʉba ne cadjirua oibʉrʉ, Jeowaba jara ɓʉda cãrẽda oida ɓʉ, idjia jara ɓʉda “djabarã wagabadarãda trʉ̃ida ɓʉa” (Leadua Santiago 5:14, 15). Jeowaba ɓʉsida djabarã wagabadarãra Ãcõrẽ jaureɗeba. Maʉ̃ bẽrã ãdjirãba poya carebaɗida dadjirãba ne cadjirua oɗibʉrʉ wãya ara caita pananamãrẽã Jeowame (Galata 6:1).

¿Djabarã wagabadarãba sãwã poya carebaɗida dadjirãra ne cadjirua waiɓʉa oɗibʉrʉ? Umé wa ũbea ãdjirãnebemada carebaɗida dadjirãra Ãcõrẽ Beɗeaɗeba cawaɗamãrẽã cãrẽ cãrẽã dadjirãba oɗara bio biẽ́ ɓasida. Ãdjirãba sobiabibarida idjaɓa beɗea bia jaraɗida ẽberãba ne cadjiruara oɗa amaaba. Eɗauɗe bʉa ne cadjiruada oibʉrʉ, ãdjirãba poya jaraɗida bʉa ya naʉ̃ congregacioʉ̃ne ne oẽ́da wa ewari dãrã ne oẽ́ ɓaida aɓa bʉa wãya bia ɓabʉrʉɗaa. Baribʉrʉ ẽberãba ne cadjirua oɗaba idjia sopua crĩchaẽ́bʉrʉ idjia oɗa carea, dadji djabarã wagabadarãba idjira ãĩ jʉretabeɗida congregacioʉ̃nebemada wagaɗi carea dewara djabarãra.

 BIO CAWAƊIDA NAɄ̃ BEƊEAƊE

3. Dadjirãba jara panʉbʉrʉ dai ne cadjirua oɗaba poya carebaida dadjirãa

Ne baridua cadjirua dadjirãba o panʉra sobiabiẽ́ ɓʉda Jeowara, maʉ̃ bʉrʉ dadjirãba ne cadjiruada osiɗabʉrʉ jaraɗida panʉa. Leaɗapeɗa Salmo 32:1-5, beɗeaɗadua:

• ¿Cãrẽ cãrẽã bio biara ɓʉda jaraɗida Jeowaa dadjirãba ne cadjirua o panʉra idjaɓa cãrẽã biaẽ́ ɓʉda ne cadjirua mẽrãida?

 4. Congregacioʉ̃ne ɓʉda ãyã jʉretasiɗabʉrʉ biara ɓʉda jũmarã carea

Aɓaʉ djababa congregacioʉ̃nebemada ne cadjirua waiɓʉada oɗabʉrʉ idjaɓa Jeowa beɗea ĩjã quĩrĩãẽ́bʉrʉ poya ɓaẽ́da congregacioʉ̃ne. Maʉ̃ bẽrã jãʉ̃ ẽberãra biara ɓʉda ãyã jʉreta ɓeida, maʉ̃ne dadjirãba jãʉ̃ ẽberãme ãbaa poya ɓaẽ́da idjaɓa poya beɗeaẽ́da idjime. Leaɗapeɗa 1 Corinto 5:6, 11 idjaɓa 2 Juaʉ̃ 9-11, beɗeaɗadua:

• Jãma jara ɓʉ quĩrãca harina ẽsãbibari maãrĩ ɓʉba harinara jũma ẽsãbibarida, mãwãmĩna congregacioʉ̃nebema ẽberãba ne cadjirua oɗada, idjia sopua crĩchaẽ́bʉrʉ, ¿cãrẽã biara ɓʉda jãʉ̃ ẽberãme ãbaa ɓaẽ́da?

 JŨMA BEƊEAƊA

Dadjirãba ne cadjirua waiɓʉa o panʉmĩna, sopua pananibʉrʉ idjaɓa waa oɗaẽ́bʉrʉ, Jeowaba quĩrãdoaida dadji ne cadjiruara.

Cawaɗara

• Dadjirãba ne cadjirua osiɗabʉrʉ, ¿cãrẽã jaraɗida panʉda Jeowaa?

• ¿Cãrẽda oɗida panʉ Jeowaba quĩrãdoamãrẽã dadji ne cadjirua?

• Ne cadjirua waiɓʉa osiɗabʉrʉ, ¿cãrẽ cãrẽã beɗeaɗida panʉ djabarã wagabadarãme?