Tò wò ding Yéhova abui o vaa fe mengul na te a wog olun ai wò, da yi kui abog zing na o bò bivus, ve minsem mizing mi ne ngul abui aloro é mi mivòk (1 Kòrinti 6:9, 10). Nge o bò nsem o ne ngul abui, te wò tsog na Yéhova a ding ki fe wò; a ne avol ya dzu ai a vòli wò.

1. Dzé hm wò yeane bò asu yi na Yéhova a dzu wò

É ba bese ba ding Yéhova be bele nnemena mintié éyòng ba yem na be he bò nsem o ne ngul. Ve ba nòng nvòlen ai é ngaaga Yéhova nyina: “Tò minsem miaan mi ne évele ane meki, mia yi bò afûm ane sut” (Yésaya 1:18). Nge ba singi minsem miaba ai nnem waba ose, Yéhova a dzu bò. Akia afé ba singi minsem? Mot a singi éyòng a mem nsem woé, abog té a nga ve mengul asu yi na a dzogè mbòen abé, a nga kogelen fe ai Yéhova na a dzu nyè. Amvus té a nga ve mengul asu yi na a tséndé mintsogen ai bebé mefulu be he tindi nyè na a sem, ai a memena a nga ve mengul asu yi na a nying ane metebega me Yéhova me ne (Langʼa Yésaya 55:6, 7).

2. Akia afé Yéhova a belen ai bemvendé asu yi na be vòli é mot a he bò ngul nsem?

Asu é mot a he bò nsem o ne ngul, Yéhova a dzo na “a loégé bemvendé ya akonda” (Langʼa Yakòbus 5:14, 15). Bemvendé ba ding Yéhova ai mintomba mié. Be bele mefulu ma yeane asu yi na be vòli é mot a he sem na a dugen bi mbembe élat ai Yéhova (Galati 6:1).

Akia afé bemvendé ba vòli é kristen é he bò ngul nsem? Ai zen ya Bibel, bemvendé bebè nge belè ba timi nyè asu dzé é dzom a he bò é ne abé. Ba ve fe nyè melebega ma vòli nyè na te a dugen bò akia nsem té. Ba yi fe bò tegè nyè bare ve mimbege mizing a akonda ntié ba yanga na a dugen tòbò mvòè mfaa ya nsisim. Nge kristen zing ya é he bò ngul nsem ya singi ki nsem woé, bemvendé ba yi nyè telé a feng asu yi na te a kalen é bot bevòk mbe mbòen woé.

 TUENE FAG

3. A mem nsem woé a vòli wò na o dugen bi mbembe élat ai Yéhova

Éyòng bia sem, bia ve Yéhova nnem mintié, asu té ndò a ne nfi na o mem nsem woé abe nyè. Langʼa Salmen 32:1-5 ai yalen a nsili hi:

• Asu dzé a ne mbeng na bi mem minsem miaan abe Yéhova aloro na bi dzeng na bi sòli miè?

 4. Amu dzé a ne mbeng na be telé é mot a singi ki minsem mié a feng

É mot a he bò nsem o ne ngul, a yi ki fe na a tong betebega be Yéhova a seki dzam tòbò akonda. Éyòng ba télé kan mot té a feng, bia wulu ki fe ai nyè nge a lèè ai nyè. Langʼa 1 Kòrinti 5:6, 11 ai 2 Yohannes 9-11, ai yalen minsili mi tsaa mi:

• Dzé ya kare kui éyòng ba bamen ékòsang ai ovuk be man mam? Dzé é ne dzam kui éyòng é mot a ben singi minsem mié a nying fufulu ai bot ya akonda?

 OBALBAS

Nge bi he bò ngul nsem, bi singi fe wò ai nnem waan ose bi nòng fe ntsigen na bia yi ki fe bò akia dzam té, Yéhova a yi bi dzu.

Dzé bia baala

• Asu dzé a ne mbeng na bi mem minsem miaan abe Yéhova?

• Dzé bi ne dzam bò asu yi na Yéhova a dzu bia minsem miaan?

• Nge bi bò nsem o ne ngul, asu dzé bia yeane dzeng nvòlen abe bemvendé?