ADZESUA 57
Sɛ Eyɛ Bɔn Kɛse Bi A, Ebɛnadze Na Ɔsɛ Dɛ Eyɛ?
Edɔ Jehovah paa, na eyɛ dza ibotum biara amma aannyɛ adze bi ma aannyɛ no yaw. Naaso ɔwɔ mu ara a, ibedzi mfomdo. Mfomdo a ibedzi anaa bɔn a ebɛyɛ no, bi no mu yɛ dur kyɛn bi. (1 Corinthfo 6:9, 10) Sɛ eyɛ bɔn bi a no mu yɛ dur anaa bɔn kɛse bi a, ɔno nnkyerɛ dɛ sɛ Jehovah nye wo tow nkwanta a, ɔapaa, kyerɛ dɛ, ɔronndɔ wo bio. Ɔnntse dɛm, mbom ɔayɛ krado dɛ ɔdze wo bɔn bɛkyɛ wo na ɔaaboa wo.
1. Ebɛnadze na ɔsɛ dɛ yɛyɛ ama Jehovah dze hɛn bɔn aakyɛ hɛn?
Sɛ hɔn a wɔdɔ Jehovah no hu dɛ wɔayɛ bɔn kɛse bi a, ɔyɛ a wodzi awerɛhow paa. Naaso asɛm bi a Jehovah aka akyerɛ n’asomfo no kyekye hɔn werɛ. Jehovah se: “Kaansa hom bɔn tse dɛ adaaben mpo a, ɔbɔhoa dɛ esukwankyɛba.” (Isaiah 1:18) Dza Jehovah reka nye dɛ, sɛ yefi hɛn akoma mu nu hɛnho a, ɔdze hɛn bɔn bɛkyɛ hɛn korakora. Ebɛnadze na yɛyɛ a ɔkyerɛ dɛ yeenu hɛnho? Dza yɛyɛ nye dɛ, yedzi bɔn a yɛayɛ no ho yaw, na yɛnnyɛ dɛm bɔn no bio. Afei, yɛpa Jehovah kyɛw dɛ ɔmfa bɔn a yɛayɛ no nkyɛ hɛn. Bio so, nsusui bɔn anaa suban a ɔmaa yɛkɛyɛɛ bɔn no, yɛbɔ mbɔdzen ara yɛ nsesa fi ho, na yɛyer hɛnho dze Jehovah ne mbra a no ho tsew no bɔ hɛn bra.—Kenkan Isaiah 55:6, 7.
2. Sɛ yɛyɛ bɔn a, ebɛn kwan do na Jehovah dua mpanyimfo no do boa hɛn?
Sɛ yɛyɛ bɔn kɛse bi a, Jehovah se ‘yɛmfrɛ asafo mu mpanyimfo’ no. (Kenkan James 5:14, 15.) Asafo mu mpanyimfo dɔ Jehovah, na Jehovah n’asomfo so da hɔn akoma do paa. Wonyim kwan a wobotum afa do aboa hɛn ma yɛnye Jehovah ntamu ebusuabɔ no aayɛ papa bio.—Galatiafo 6:1.
Ebɛnadze na mpanyimfo no yɛ dze boa obi a ɔayɛ bɔn kɛse bi no? Mpanyimfo beenu anaa baasa dze Kyerɛwnsɛm no bɔboa no ma oeehu siantsir a dza ɔyɛe no yɛ bɔn. Afei, wobotu no fo na wɔaakyerɛ no ndzɛmba a ɔsɛ dɛ ɔyɛ amma ɔaannkɛyɛ bɔn bio. Wobotum esi gyinae so dɛ wɔremma nyimpa no nnyɛ ndzɛmba ahorow bi wɔ asafo no mu kesi dɛ ɔnye Jehovah ntamu ebusuabɔ no bɛyɛ papa bio. Naaso sɛ obi yɛ bɔn kɛse bi na sɛ oeennu noho a, mpanyimfo no botu no efi asafo no mu mbrɛ ɔbɛyɛ a wɔbɔbɔ asafo no ho ban.
PƐNSAPƐNSA MU KƆ EKYIR
Ma yɛnhwɛ dza yebotum ayɛ dze akyerɛ dɛ, kwan a Jehovah fa do boa hɛn aber a yɛayɛ bɔn kɛse bi no, hɛn enyi sɔ paa.
3. Sɛ yɛka hɛn bɔn a, ɔboa hɛn ma yɛnye Jehovah ntamu yɛ papa bio
Bɔn biara a yɛbɛyɛ no haw Jehovah, ntsi sɛ yɛka bɔn a yɛayɛ no kyerɛ no a, ɔyɛ no kwan do. Ma yɛnkenkan Ndwom 32:1-5, na yensusu asɛmbisa yi ho:
-
Ebɛnadze ntsi na ɔyɛ papa dɛ yɛbɛka hɛn bɔn akyerɛ Jehovah, sen dɛ yɛdze besie?
Sɛ yɛka hɛn bɔn kyerɛ Jehovah na yɛsan so ka ho asɛm kyerɛ mpanyimfo no a, hɛnho bɔdwe hɛn. Ma yɛnhwɛ VIDEO yi, na yensusu asɛmbisa a odzi do no ho.
-
Wɔ video no mu no, ebɛnadze na mpanyimfo no yɛe dze boaa Canon ma ɔsanee baa Jehovah nkyɛn?
Sɛ yɛreka hɛn bɔn akyerɛ mpanyimfo no a, ɔnnsɛ dɛ yɛdze biribiara sie hɔn; wɔpɛ dɛ wɔboa hɛn. Ma yɛnkenkan James 5:16, na yensusu asɛmbisa yi ho:
-
Ebɛnadze ntsi na sɛ yɛammfa biribiara ennsie mpanyimfo no a, ɔbɛma wɔayɛ mberɛw ama hɔn dɛ wɔbɔboa hɛn?
Ka wo bɔn, ma mpanyimfo no nhu nokwar a ɔwɔ mu no nyinara, na gye mboa biara a Jehovah fi ɔdɔ mu dze bɛma wo no to mu
4. Sɛ wotu obi fi asafo no mu a, ɔboa
Sɛ obi yɛ bɔn kɛse bi, na ɔka dɛ ɔremmfa Jehovah ne mbra nnyɛ edwuma a, orunntum nntsena asafo no mu. Ɔba no dɛm a, wotu dɛm nyimpa no anaa woyi no fi asafo no mu, na yɛnye no mmbɔ anaa yɛnye no nnkasa mpo. Ma yɛnkenkan 1 Corinthfo 5:6, 11 na 2 John 9–11, na yensusu asɛmbisa yi ho:
-
Dɛ mbrɛ sɛ edze mbɔrkaw kakra fora mbɔr a, mbɔr no nyina kaw no, sɛ yɛnye obi a ɔayɛ bɔn kɛse bi wɔ asafo no mu na oennu noho no so bɔ a, ebɛn ɔhaw na obotum dze aba asafo no mu?
Hɔn a wotuu hɔn no, hɔn mu pii asan aba asafo no mu. Ɔwɔ mu dɛ ntsea a wɔdze maa hɔn no yɛ yaw dze, naaso aboa hɔn ma hɔn enyiwa aba hɔnho do. (Ndwom 141:5) Ma yɛnhwɛ VIDEO yi, na yensusu asɛmbisa a odzi do no ho.
-
Wɔ video no mu no, osian bɔn a Sandra yɛe no ntsi, wotuu no fii asafo no mu. Iyi sii dɛn boaa no?
Ebɛn kwan do na sɛ wotu obi fi asafo no mu a . . .
-
ɔhyɛ Jehovah ne dzin enyimnyam?
-
ɔma yehu dɛ Jehovah wɔ ntseasee na ɔdɔ hɛn?
5. Sɛ yenu hɛnho a, Jehovah dze hɛn bɔn kyɛ hɛn
Jesus yɛɛ mfatoho bi a ɔma yehu mbrɛ Jehovah tse nka aber a obi enu noho wɔ no bɔn ho no. Ma yɛnkenkan Luke 15:1-7, na yensusu asɛmbisa yi ho:
-
Ebɛnadze na dɛm asɛm yi ma ihu fa Jehovah ho?
Ma yɛnkenkan Ezekiel 33:11, na yensusu asɛmbisa yi ho:
-
Ebɛnadze na ɔbɛkyerɛ dɛ obi enu noho wɔ no bɔn ho ampaara?
Jehovah tse dɛ oguanhwɛfo bi a ɔdwen no nguan ho paa
BINOM KA DƐ: “Sɛ meyɛ bɔn na mekɛka kyerɛ mpanyimfo no a, musuro dɛ wobotu me efi asafo no mu.”
-
Sɛ obi tse nka dɛm a, ebɛn asɛm na ebɛka akyerɛ no?
DZA ESUA
Sɛ yɛyɛ bɔn kɛse bi na yefi hɛn akoma mu nu hɛnho ampaara na yesi hɛn bo dɛ yɛrennyɛ bio a, Jehovah dze bɛkyɛ hɛn.
Mbobɔdo
-
Sɛ yɛyɛ bɔn a, ebɛnadze ntsi na ɔsɛ dɛ yɛka ho asɛm kyerɛ Jehovah?
-
Ebɛnadze na ɔsɛ dɛ yɛyɛ ama Jehovah dze hɛn bɔn aakyɛ hɛn?
-
Sɛ yɛyɛ bɔn kɛse bi a, ebɛnadze ntsi na ɔsɛ dɛ yɛhwehwɛ mboa fi mpanyimfo no hɔ?
HWEHWƐ PII KA HO
Isaiah 1:18 ma yehu dɛ Jehovah wɔ ehumbɔbɔr paa. Hwɛ mbrɛ papa bi nyaa dɛm ehumbɔbɔr no do mfaso.
Sɛ wotu obi fi asafo no mu a, ebɛn kwan do na nyia woetu no no na asafo no nyina nya do mfaso?
“Ebɛnadze Ntsi Na Wotu Obi Fi Asafo No Mu A Ɔkyerɛ Ɔdɔ?” (Ɔweɔn-Aban, April 15, 2015)
Hwɛ kwan a ibotum afa do aboa obi a ɔnnyɛ Jehovah Dasefo no ma oeehu siantsir a wotu obi fi asafo no mu.
“Ana Jehovah Adasefo Yi Hɔn A Nkan No Wɔwɔ Hɔn Som No Mu No Akwa?” (Asɛm bi a ɔwɔ wɛbsaet do)
Kenkan asɛm a wɔato dzin “Nna Ɔwɔ Dɛ Mesan Ba Jehovah Nkyɛn” no, na hwɛ siantsir a owura bi a nna ɔatwe noho efi Jehovah ne nkyɛn no reka dɛ ɔyɛ Jehovah na ɔsanee twee no baa ne nkyɛn.
Bi A W'enyi Bɛgye Iyi So Ho
NSƐM A WƆTAA BISA
Ebɛnadze Nye Bible Adzesua A Jehovah Adasefo Nye Nkorɔfo Yɛ No?
Wɔ dɛm Bible adzesua a Jehovah Adasefo nye nkorɔfo yɛ yi mu no, ibotum dze Bible nkyerɛase biara a ewɔ no esũa adze. Ibotum afrɛ w’ebusuafo anaa w’anyɛnkofo binom mpo ma wɔaabɛka woho ma hom eesũa.
