TOƁƁERE 57
Si tawii non on waɗii junuubu tiiɗuɗo ?
Hay si hiɗon yiɗi Yahuwah Alla moƴƴa e on etoto fota fii wota on mettin mo ɓernde, wonnde on faljay. Kono, junuubaaji goo no tiiɗi ɓuri goɗɗi (1 Korenti 6:9, 10). Si on waɗii junuubu tiiɗuɗo, annditee Yahuwah Alla accataa yiɗugol on. Himo hebilii yaafagol e wallugol on.
1. Ko honɗun haanuɗen waɗude fii no Yahuwah Alla yaafora en ?
Ɓee yiɗuɓe Yahuwah Alla yoomay si ɓe anndii ɓe waɗii junuubu tiiɗuɗo. Kono Yahuwah Alla multiray ɓe ndee fodoore nde o waɗannoo jamaa makko on : « Hay si junuubaaji mon ɗin no wa’i wa ko wojji, ɗi rawninte wa bufenri » (Isaaya 1:18). Si en tuubii e hoore nunɗal, Yahuwah Alla yaafoto en. Ko honno tuubirten ? E hoore ninsugol ko tiiɗi, en accay waɗugol ko boni e toroɗen Yahuwah Alla fii yo o yaafo en. Ɓawto ɗun en etoto moƴƴa waylugol miijooji men maa jikkuuji men waɗayɗi haa waɗen junuubu, e etoɗen wuurugol ko laaɓi no Yahuwah Alla faalira non (janngee Isaaya 55:6, 7).
2. Ko honno Yahuwah Alla huutorta ardotooɓe ɓen fii wallugol en si en waɗii junuubu ?
Si en waɗii junuubu tiiɗuɗo, Yahuwah Alla no daalani en ko yo en « noddu ardotooɓe moftal ngal » (janngee Yaaquuba 5:14, 15). Ardotooɓe ɓen no yiɗi Yahuwah Alla e rewooɓe mo ɓen. Hiɓe mari sifaaji moƴƴi fii wallugol en no moƴƴintiniren hakkunde men e Yahuwah Alla (Galaasi 6:1).
Ko honno ardotooɓe ɓen wallirta en si en waɗii junuubu tiiɗuɗo ? Ardotooɓe ɗiɗo maa tato huutoray Deftere Alla nden hollugol en ko waɗuɗen kon moƴƴaa. Ɓe jonnay en kadi waajuuji kelɗuɗi e ɓe wakkilina en fii wota en wattu ɗun. No gasa ɓe ɗuytay golle men ɗen ka moftal haa moƴƴintinen hakkunde men e Yahuwah Alla. Fii danndugol moftal ngal, ardotooɓe ɓen anndinay waɗuɗo junuubu tiiɗuɗo on o tawaaka e Seedeeɓe Yahuwah ɓen, si tawii ontigi tuubaali.
LUGGINEE
Ɓurten weltaade fii no Yahuwah Alla wallirta en non si en waɗii junuubu tiiɗuɗo.
3. Qirragol wallay en
Kala junuubu mo waɗuɗen mettay Yahuwah Alla. Ko ɗun waɗi, hiɗen haani qirritanaade mo. Janngee Zabuura 32:1-5 (VPFJ) e yewton fii ngal lanndal :
-
Fii honɗun hino moƴƴi qirritanaade Yahuwah Alla junuubaaji men ɗin edii yo en eto suuɗugol ɗi ?
Qirritanagol Yahuwah Alla junuubaaji men ɗin e ɗaɓɓugol ballal ardotooɓe ɓen wallay en no heɓiren ɓuttu. Fijinee VIDIO on e yewton fii lanndaale jokkituɗe ɗen.
-
Ko honno ardotooɓe ɓen walliri Kanon moƴƴintingol hakkunde makko e Yahuwah Alla ?
Hiɗen haani laaɓande ardotooɓe ɓen ; ko kamɓe waɗaa fii wallugol en. Janngee Yaaquuba 5:16 e yewton fii lanndal jokkitungal ngal :
-
Fii honɗun haray hino weeɓani ardotooɓe ɓen wallugol en si en laaɓanii ɓe ?
Qirritee junuubu mon on, laaɓanon ardotooɓe ɓen e jaɓon ballal Yahuwah Alla wondungal e giggol.
4. Ko honno yaltinirgol junuubankeejo ka moftal wallirta ?
Si goɗɗo waɗuɗo junuubu tiiɗuɗo jaɓaali ɗoftaade sariyaaji Yahuwah Alla ɗin, o tawetaake e moftal ngal. Haray o yaltinaama ; en jokkondirtaa e makko e en yewtidataa e makko. Janngee 1 Korenti 5:6, 11 e 2 Yuuhanna 9-11 e yewton fii ngal lanndal :
-
Wano lewen ƴurinirta farin non, ko honno jokkondirgol e waɗuɗo junuubu mo tuubaali battinirta moftal ngal ?
Yaltinanooɓe buy artuno ka moftal ɓawto ɗun. Hay si tawii ko ɓe wurtaanoo kon no sattannoo ɓe, ɗun walluno ɓe anndugol ko ɓe waɗunoo kon ko ko boni (Zabuura 141:5, VPFJ). Fijinee VIDIO on e yewton fii lanndal jokkitungal ngal.
-
Ko honno yaltinegol ka moftal walliri Sonia ?
Ko honno yaltinegol ka moftal...
-
teddinirta innde Yahuwah nden ?
-
hollirta Yahuwah Alla ko mo newaare e mo giggol ?
5. Yahuwah Alla yaafoto en si en tuubii
Annabi Iisaa huutorno misal fii wallugol en no faamiren no Yahuwah Alla wa’irta si goɗɗo tuubii. Janngee Luuka 15:1-7 e yewton fii ngal lanndal :
-
Ko honɗun ngal misal janni on fii Yahuwah Alla ?
Janngee Hazqi’iila 33:11 e yewton fii ngal lanndal :
-
Ko honɗun hollata goɗɗo tuubii tigi tigi ?
Wano ngaynaako, Yahuwah Alla no kippi moƴƴa fii rewooɓe mo ɓen.
WOƁƁE GOO NO WI’A : « Si mi haalanii ardotooɓe ɓen ko mi waɗi kon, ɓe yaltinay lan ka moftal. »
-
Ko honɗun haalanton goɗɗo miijortooɗo nii ?
RAWNOODE
Si en waɗii junuubu tiiɗuɗo e si en ninsii ɗun tigi tigi, e hiɗen anngisii accugol waɗugol ko boni, Yahuwah Alla yaafoto en.
Ndartannde
-
Fii honɗun hino moƴƴi qirranagol Yahuwah Alla junuubaaji men ɗin ?
-
Ko honɗun haanuɗen waɗude fii no junuubaaji men ɗin yaaforee ?
-
Si en waɗii junuubu tiiɗuɗo, fii honɗun hino haani lanndagol ardotooɓe ɓen ballal ?
TASKEE
Ndaaree no gorko anndiri yurmeende Yahuwah Alla nden wano holliraa non e nder Isaaya 1:18.
Ko honno yaltinegol ka moftal nafirta fow ?
« Fii honɗun yaltinegol ko huunde wondunde e giggol » (Suudu Aynirdu ndun, 15 awril 2015)
Anndee no siforanton mo wonaa Seedeejo Yahuwah ko woni yaltinegol ka moftal.
« Seedeeɓe Yahuwah ɓen no wikkoo ɓee ɓe wonaa hannde kadi Seedeeɓe ? » (Winndannde ka jw.org)
E nder taariika on « Miɗo haanunoo yiltaade e Yahuwah », ndaaree no gorko woɗɗitinooɗo goonga on no miijii ko Yahuwah Alla ɓanniti mo.
« Deftere Alla nden no wayla ngurndan » (Suudu Aynirdu ndun, 1 awril 2012)
