Menmsi ou enmé Jéova onlo toubònman é kè ou ka fè tousa ou pé pou ou pa fè-y lapenn, fò ou sav kè délè ou ké fè érè. Men ni sèwten péché ki pi grav ki dòt (1 Korentyen 6:9, 10). Si ou fè on péché ki grav, pa mèt an tèt a-w kè Jéova pa enmé-w ankò. Sonjé osi kè i vlé padonné-w é kè i vlé édé-w.

1. Ka fò-nou fè pou Jéova padonné-nou ?

Lè on moun enmé Jéova, tchè a-y ka fann lè i ka rann-li kont kè i fè on péché ki grav. Men Jéova ka konsolé-y grasa pwomès-lasa : « Menmsi péché a zòt kon twèl wouj, yo ké vin blan kon lanèj » (Izayi 1:18). Si i sensè lè i ka rèpanti-y, Jéova ké padonné-y poudèbon. Kijan on moun ka montré kè i ka rèpanti-y ? Konm i ka règrété vréman sa i fè, i ka arété fè sa ki pa bon, é i ka sipliyé Jéova pou i padonné-y. Aprésa, i ka woté tout vyé lidé ki té an lèspri a-y, é i ka lagé tout vyé labitid i té ni é ki pousé-y a péché. Anplisdisa, i ka fè éfò pou suiv prensip a Jéova anrapò èvè sa ki byen é sa ki mal (li Izayi 55:6, 7).

2. Kijan Jéova ka sèvi èvè sé ansyen-la pou édé on moun ki fè on péché ?

Mi sa Jéova ka di anrapò èvè on moun ki fè on péché ki grav : « Fò i kriyé sé ansyen a lasanblé-la owa a-y » (li Jak 5:14, 15). Sé ansyen-la enmé Jéova é yo enmé timouton a-y osi. Yo ni sé kalité-la ki fo la pou édé on moun ki fè on péché wouvin bon bon zanmi èvè Jéova (Galat 6:1).

Kijan sé ansyen-la ka édé on krétyen ki fè on péché ki grav ? Dé ou twa ansyen ka sèvi èvè Labib pou montré-y poukwa sa i fè la pa bon. É anplisdisa, yo ka ba-y déotwa konsèy ki itil pou i pa woutonbé adan menm péché-la ankò. Pétèt yo ké mandé-y pa fè sèwten biten adan lasanblé-la, jistan i wouvin bon bon zanmi èvè Jéova. Si on krétyen fè on péché ki grav é i pa ka rèpanti-y, sé ansyen-la ka èskominyé-y. Konsa, yo ka pwotéjé sélézòt moun-la ki adan lasanblé-la, pou mové konpòwtasyon a moun-lasa pa aji asi yo.

 AN-NOU FOUYÉ PI FON

3. Lè nou ka di sa nou fè, sa ka édé-nou wouvin bon zanmi èvè Jéova

Lè nou ka péché, sa ka fè Jéova lapenn. Alò sa toutafè nòwmal kè nou di-y sa nou fè. Li Sòm 32:1-5 é fè on ti kozé asi kèsyon-lasa :

• Pisimé nou di Jéova ki péché nou fè olyé nou éséyé kaché sa. Poukwa ?

 4. Lè yo ka èskominyé on moun, poukwa sa ka pòté bon biten ?

Si on moun fè on péché ki grav é i ka rèfizé suiv prensip a Jéova, i pé pa rété adan lasanblé-la. Yo ka èskominyé-y. Kifè, nou pa ka frékanté-y é nou pa ka palé ba-y nonplis. Li 1 Korentyen 5:6, 11 é 2 Jan 9-11, é fè on ti kozé asi sé kèsyon-lasa :

• Lè ou ka mèt lèven adan on pat, ka ki ka pasé ? Lè on péchè pa ka rèpanti-y, kijan sa pé aji asi lasanblé-la ?

 ON TI RÉZIMÉ

Si nou fè on péché ki grav é kè nou ka règrété sa nou fè la poudèbon, é si anplisdisa, nou byen désidé a arété fè sa ki mal, Jéova ké padonné-nou.

Ka ou woutyenn

• Poukwa sé on bon biten lè nou ka di Jéova ki péché nou fè ?

• Ka fò-nou fè pou Jéova padonné péché an nou ?

• Si nou fè on péché ki grav, poukwa fò-nou mandé sé ansyen-la édé-nou ?