LISON 57

Kisa ki pé endé’w si ou fè an péché ki grav ?

KOUTÉ AN

Menm si ou enmen Jéova anpil é ki ou ka fè éfò pou pa mété dlo an zié’y, délè ou kèy fè lérè. Men i ni péché ki pli grav ki dòt (1 Korentjen 6:9, 10). Si ou ka fè an péché ki grav, pa pansé Jéova pa enmen’w ankò. Toujou sonjé i paré padonnen’w épi endé’w.

1. Sa pou fè pou bénéfisié padon Jéova ?

Lè an moun ki enmen Jéova ka wouvè zié’y épi réyalizé i fè an péché ki grav i ka risanti an gwo lapenn. Men pwonmès-tala Jéova ka fè’y ka konsolé’y : « Menm si péché-zòt wouj, yo kèy viré vini blan kon lanèj » (Izayi 1:18). Si i ka ripanti kòy épi tout tjè’y, Jéova ka padonnen tousa i fè. Koumanniè nou ka ripanti kònou ? Nou ka rigrété tèlman sa nou fè, sa ka fè nou sispann fè sa ki mal épi sipliyé Jéova padonnen nou. Apré sa, nou ka fè tousa ki fo pou chanjé manniè wè-nou épi mové mès ki mennen nou adan péché-a, épi nou ka fè éfò pou viv silon lwa moral Jéova ki wo (li Izayi 55:6, 7).

2. Koumanniè Jéova ka sèvi sé ansien-an pou endé an moun ki péché ?

Jéova ka mandé an moun ki fè an péché grav : « Fòk i kriyé sé ansien lasanblé-a pou yo wè’y » (li Jak 5:14, 15). Sé ansien-an enmen Jéova épi tout sèvitè’y. Yo aprann ki manniè yo pé endé an moun ki péché pou i pé sa ritouvé bon rilasion épi Jéova (Galat 6:1).

Koumanniè lé zansien ka endé an krétjen ki fè an péché grav ? Épi Labib-la, dézoutwa ansien ka èsplitjé’y poutji sa i fè a pa bon. Yo ka ba’y osi yonn-dé konsèy pratik pou i pa rikoumansé. Épi i ni yonn-dé bagay yo pé ké kité’y fè adan lasanblé-a tout tan i pa ripran fòs èspiritièl. Si an krétjen ki fè an péché grav pa ka ripanti kòy, sé ansien-an kèy èskominié’y pou pwotéjé lasanblé-a di mové lenfliyans-li.

ANNOU PLI LWEN

Annou wè koumanniè Jéova ka endé nou lè nou fè an péché grav épi ki manniè nou pé montré’y plis rikonésans pou sa.

3. Konfésé kòw kèy pèwmèt ou viré vini zanmi Jéova

Lè nou ka péché, nou ka fann tjè Jéova. Kidonk, fòk nou dévwalé sa nou fè ba Jéova. Li Sòm 32:1-5 épi diskité kèsion-tala :

Poutji fòk nou di Jéova sa nou fè pito ki séré ?

Pou nou santi kònou bien, nou bizwen konfésé péché-nou ba Jéova épi osi mandé sé ansien-an endé nou. Gadé VIDÉWO-a épi diskité kèsion-an ka vini an.

VIDÉWO : « Jéova ka korijé moun i enmen » (3:01)

Koumanniè sé ansien-an endé Canon rivini a Jéova ?

Nou pou onnèt épi sé ansien-an ; yo la pou endé nou. Li Jak 5:16 épi diskité kèsion-tala :

Poutji sa pli fasil ba sé ansien-an endé nou si nou onnèt épi yo ?

Fòk ou konfésé péché’w, onnèt épi lé zansien épi asèpté Jéova endé’w.

4. Lèskominikasion sé an bon dispozision

An moun ki ka fè an péché grav épi ka rifizé suiv lwa Jéova pé pa rété adan lasanblé-a. Kidonk i èskominié ; nou pa ka frékanté’y, é nou pa ka palé ba’y non pli. Li 1 Korentjen 5:6, 11 épi 2 Jan 9-11, épi diskité sé kèsion-tala :

Kisa ka pasé lè ou ka mété lèvi adan an pat pou fè pen ? Ki lenfliyans an moun ki péché épi ki pa ka ripanti kòy pé ni asou lasanblé-a ?

An patjé moun ki té èskominié, viré vini adan lasanblé-a. Pétèt pinision-an ka fè mal, men i endé yo ritouvé larézon (Sòm 141:5). Gadé VIDÉWO-a épi diskité kèsion-an ka vini an.