LÉSON 57

É si ou fè roun péché grav ?

KOUTÈ SA

Menm si ou kontan Jéova ké tout ou tchò é menm si ou ka fè bokou éfòr pou pa fè roun bagaj ki pouvé fè li lapenn, détan ou ké fè bagaj ki pa bon. Mé i gen péché ki pi grav pasé ròt-ya (1 Corinthiens 6:9, 10). Si ou fè roun péché grav, pa bliyé ki Jéova toujou kontan ou. I lé pardonnen ou é i lé idé ou.

1. Kisa nou divèt fè pou Jéova pardonnen nou ?

Roun moun ki kontan Jéova gen gro lapenn lò i ka randé so kò kont i fè roun péché grav. Mé nou ka trapé konsolasyon annan sa promès-a Jéova fè nou : « Menm si zòt péché rouj, yé ké divini blan kou lanèj » (Isaïe 1:18). Si nou ka répanti ké tout nou tchò, Jéova ké pardonnen nou konplètman. Kouman nou ka montré nou répanti ? Si nou vréman ka rigrété sa nou fè, nou ké arété fè sa ki mové é nou ké sipliyé Jéova pou i pardonnen nou. Atò, nou ké fè tousa nou pouvé fè pou chanjé mové fason nou ka pansé-a ouben lésé vyé labitid ki mennen nou annan sa péché-a. Anplis di sa, nou ké éséyé viv soulon prensip Jéova-ya ki jis (li Isaïe 55:6, 7).

2. Kouman Jéova ka itilizé ansyen-yan pou idé nou lò nou ka fè roun péché ?

Si nou fè roun péché grav, Jéova ka di nou : « Aplé ansyen-yan annan asanblé-a » (li Jacques 5:14, 15). Ansyen-yan kontan Jéova é yé kontan sa-ya ki ka sèrvi l’. Yé adòk pou idé nou roukoumansé gen roun lanmityé ki fò ké Jéova (Galates 6:1).

Kouman ansyen-yan ka idé nou si nou fè roun péché grav ? Dé ouben trwa ansyen ké itilizé Labib-a pou montré nou poukisa sa nou fè pa bon. Yé ké bay nou osi bon konsèy ké ankourajman pou idé nou pa viré tonbé annan péché-a. Yé ké pitèt désidé ki nou pa pouvé fè sèrten bagaj annan asanblé-a pannan roun tan, jiktan nou roukoumansé gen roun rélasyon ké Jéova ki fò. Mé si roun moun ki fè roun péché grav pa lé répanti ? Pou sa moun-an pa détenn asou ròt-ya, ansyen-yan ké mété li dèrò di asanblé-a.

ANNOU FOUYÉ ANNAN LABIB-A

Annou wè kouman nou pouvé gen plis rékonésans pou fason Jéova ka idé nou lò nou fè roun péché grav.

3. Lò nou ka konfésé nou kò, sa ka idé nou géri

Lò nou fè roun péché, sa ka krazé tchò Jéova. A pou sa, nou divèt konfésé nou fot pou Jéova. Li Psaume 32:1-5, épi kozé asou sa késyon-an :

Pasé nou éséyé séré sa nou fè, poukisa i pi bon nou konfésé nou péché pou Jéova ?

Anplis di konfésé nou péché pou Jéova, nou ké santi nou kò pi byen lò nou ké doumandé ansyen-yan idé nou. Gadé VIDÉYO-a, épi kozé asou sa késyon-an :

VIDÉYO : « Jéova ka korijé sa-ya i kontan » (3:01)

Annan vidéyo-a, kouman ansyen-yan idé Canon routounen òbò Jéova ?

Nou divèt onèt ké ansyen-yan ; yé la pou idé nou. Li Jacques 5:16, épi kozé asou sa késyon-an :

Poukisa sa pi fasil pou ansyen-yan idé nou lò nou onèt ké yé ?

Konfésé ou péché, rété onèt ké ansyen-yan, épi lésé Jéova ki plen ké lanmou idé ou.

4. Kouman èskominikasyon-an ka idé nou

Roun moun ki fè roun péché grav é ki pa lé swiv prensip Jéova-ya ki jis pa pouvé rété annan asanblé-a ankò. Kou i èskominyé, nou pa divèt pasé tan ké li ni menm palé ké li ankò. Li 1 Corinthiens 5:6, 11 ké 2 Jean 9-11, épi kozé asou sa késyon-yan :

Kisa ki ka rivé lò ou ka mété lévir annan roun lapat ? Kouman roun péchèr ki pa lé répanti pouvé détenn asou asanblé-a ?

Bokou moun ki té èskominyé routounen annan asanblé-a apré roun tan. Poukisa ? Paské menm si sa rèd pou roun moun lò yé ka mété l’ dèrò di asanblé-a, a sa ki ka idé sa moun-an konprann ki sa i fè pa té bon (Psaume 141:5). Gadé VIDÉYO-a, épi kozé asou sa késyon-yan :

VIDÉYO : Annou soutni jijman Jéova ké tout nou tchò (9:28)

Kouman èskominikasyon-an idé Sonia ?

Kouman èskominikasyon-an...

ka bay non Jéova lònò ?
ka montré ki Jéova jis, rézonab ké plen ké lanmou ?

5. Jéova ka pardonnen nou lò nou ka répanti

Jézi té pran roun èkzanp pou idé nou konprann sa Jéova ka rousanti lò roun moun ka répanti. Li Luc 15:1-7, épi kozé asou sa késyon-an :

Kisa sa vèrsé-ya ka anprann nou asou Jéova ?

Li Ézéchiel 33:11, épi kozé asou sa késyon-an :

Kisa roun moun divèt fè pou montré i vréman répanti ?

Kou roun bèrjé, Jéova ka byen pran swen di so brébi.

I GEN MOUN KA DI : « Mo pa lé di ansyen-yan sa mo fè, pas mo pè yé mété mo dèrò di asanblé-a. »

Kisa ou té ké di roun moun ki ka pansé sa ?

SA NOU WÈ

Si nou fè roun péché grav, Jéova pouvé pardonnen nou. Pou i pouvé fè sa, nou divèt répanti ké tout nou tchò é nou divèt détèrminé arété fè sa ki mové.