57 NU GÈ NÒ
Éé Ní Eo É Náa Be Ò Síì Agẹbá Pọ́lọ́ Ẹ́?
Sìgà tṍó òó láá sí pọ́lọ́, náa kal ló béè kọọ̀ ò palàge vùlè Jìhóvà vaá ò gé piigà bé eo kpóó sim tùlà naa gè naa nú e bè náa é bẽ́émáe. Sõò sìgà pọ́lọ́ palàge agabá èl sìgà. (1 Kọ́rìnt 6:9, 10) Be ò sí kà agẹbá pọ́lọ́, kẽ̀èa boo kọọ̀ Jìhóvà gáà òòà aa ló gè vùlè ni, à di kpènà ló gè ia ló vaá nvèè bá nè ni.
1. Éé ní eo é íè ge naa kọbé Jìhóvà ia ló nè ni ẽ́?
Gbò e bà vulè Jìhóvà ólò bã̀àgã̀ tṍó e bà nyímá kọọ̀ bà síè kà agẹbá pọ́lọ́. Sõò nú e Jìhóvà beè zìgà nè pá a gbò ólò nvèè va nyíé gbàà. A beè zìgà kọọ̀: “Náa kal ló béè kọọ̀ bọọ pọ́lọ́ kúmí do, nda é náa kọ á ẹẹ belí báà múú.” (Àìzáíà 1:18) Be è ọ́gá ló bẹẹ pọ́lọ́, Jìhóvà é ia ló nèi. Mósĩ́ deè ní eé láá zogè kọọ̀ è ọ́gà ẹ? Nyíéi é palàge bììlà ló pọ́lọ́ e síì naa ní eé ooà aa ló gè sí pọ́lọ́á vaá gbóó bàn Jìhóvà kọ á ia ló nèi. Tṍóá sõò, èé gbóó pììga boo gè nyaaná pọ́lọ́ tóm̀ bùlà àbèè láb ea beè naa kọ é sí pọ́lọ́á, vaá pììga boo gè gbóó tõó dùm ea gbááá ló gbò nòòkúù Jìhóvà.—Bugi Àìzáíà 55:6, 7.
2. Mósĩ́ deè ní e Jìhóvà ólò tú gbò kànen nvèèmà bá nèi tṍó e síì pọ́lọ́ ẹ́?
Jìhóvà kọ́ nèi kọọ̀ tṍó e síì agẹbá pọ́lọ́, é ‘kolí gbò kànen e bà di mm̀ bõ̀ònatõ̀ò.’ (Bugi Jém̀z 5:14, 15.) Gbò gbálà e Bàrì beè íbá lóí vulè Jìhóvà nè pá a gyóòlo. Bà sim tùlà ge nvèè bá nèi kọ é láá kpáá ié lé gbaa ló kilma ló Jìhóvà.—Gàlésìà 6:1.
Mósĩ́ deè ní e gbò kànen é nveè bá nèi be è síì agẹbá pọ́lọ́ ẹ́? Bàà àbèè taà neǹ kànen é tú Kpá Káí nvèèmà bá nèi kọ é mòn nú ea náa vaá nú e beè naaá à dú pọ́lọ́. Bàé síèi kpóó ló vaá nèi gbò lọ̀ọ̀gà bùlà ea é nveè bá nèi kọ é gá siná pọ́lọ́á. Bàé láá kọ é gá sí sìgà tóm mm̀ bõ̀ònatõ̀ò dọ̀ọ̀mà tṍó e bẹẹ gbaa ló kilma ló Jìhóvà é kpáá agaló. Gbò kànen ólò kpó nen ea sí kà agẹbá pọ́lọ́ vaá náa ọ́gá lọl mm̀ bõ̀ònatõ̀ò kọbé náa kyọ dõòna gbò.
KPÁÁ NÓ BỌ̀Ọ̀VẸ̀
Kpáá palàge nvèè ka ló bé e Jìhóvà ólò nvèè bá nèi tṍó e síì agẹbá pọ́lọ́ naa.
3. Ge kọ́ bẹẹ pọ́lọ́ ólò naa kọ é kpáá ié kà lé gbaa ló kilma ló Jìhóvà
Kọ̀láá kà pọ́lọ́ e síì ólò tọá ló Jìhóvà, vóà naa, à dú bíi kọ é kọ́ bẹẹ pọ́lọ́ nèe. Bugi Psalm 32:1-5, vaá ò gbóó aalai nakà bíbví:
-
Éé ní ea náa vaá à dú lé kọ é kọ́ bẹẹ pọ́lọ́ nè Jìhóvà tãa vó e gṍò ẽ?
Gbá ló gè kọ́ bẹẹ pọ́lọ́ nè Jìhóvà, èé íe dĩ̀ìnè ló bùlà be è gbĩ́ nvèè bá lọl bá gbò kànen. Bìlà VÍDIÒÍ, vaá ò gbóó aalai bíb ea nyoone.
-
Mm̀ vídiòá, mósĩ́ deè ní e gbò kànen beè nvèè bá nè Canon kọ á kpáá òòà kẽ dú ló Jìhóvà ẹ?
À dú bíi kọ é ló kà kà bel vaá kọ́ kọ̀láá kà nú ea beè naaá nè gbò kànen; bà di kpènà ló gè nvèè bá nèi. Bugi Jém̀z 5:16, vaá ò gbóó aalai nakà bíbví:
-
Éé ní ea náa vaá gè ló kà kà bel nè gbò kànen é náa kọ á valí vá ló gè nvèè bá nèi ẽ́?
Kọ́ o pọ́lọ́, ló kà kà bel nè gbò kànen, vaá ò tú nvèè bá ea aa bá Jìhóvà
4. Bé e gè kpó nen lọl mm̀ bõ̀ònatõ̀ò ólò nvèè bá naa
Beè nen ea sí kà agẹbá pọ́lọ́ náa zigà ge tõó boo gbò nòòkúù Jìhóvà, náa é láá gbaaá ná ló bõ̀ònatõ̀ò. Bàé kpóe lọl mm̀ bõ̀ònatõ̀ò, vaá née é zọnàe naaá nu àbèè ge ló bel daáẹ́ ló. Bugi 1 Kọ́rìnt 5:6, 11 nè 2 Jọ́ọ̀n 9-11, vaá ò gbóó aalai nakà bíbví:
-
Dì belí bé e nú ea ólò gbuuve fétúlú ólò gbuuve fétúlú naaá, mósĩ́ deè ní e gè zọ̀ nen ea sí pọ́lọ́ vaá náa ọ́gá naaá nu é láá kyọ̀gàlà bõ̀ònatõ̀ò ẽ?
Gã́bug nen e ba beè kpó va lọl mm̀ bõ̀ònatõ̀ò a kpáá òòa kẽ boo béè kọọ̀ kpọ̀té e ba beè nèva beè naa kọ bàá nyimá kọọ̀ nú e ba beè naanìè dú pọ́lọ́, náa kal ló béè kọọ̀ kpọ̀téá beè zọ̀ va. (Psalm 141:5) Bìlà VÍDIÒÍ, vaá ò gbóó aalai bíb ea nyoone.
-
Mm̀ vídiòá, mósĩ́ deè ní e gè kọọ̀ ba beè kpó Sonja lọl mm̀ bõ̀ònatõ̀ò beè nvèè bá nèe ẽ́?
Mósĩ́ deè ní e nòònù ge kpó nen lọl mm̀ bõ̀ònatõ̀ò . . .
-
nveè ka ló béè Jìhóvà ẹ?
-
zógè kọọ̀ Jìhóvà nyímá nu vaá à vùlèi é?
5. Jìhóvà ólò ia ló nèi tṍó e ọ́gà
Jíízọ̀s beè nè nu dòòle ló ea náa kọ é nyimá bé ea ólò tọá ló Jìhóvà naa tṍó e nen ọ́gá. Bugi Lúùk 15:1-7, vaá ò gbóó aalai nakà bíbví:
-
Éé ní e nakà nòòtẽ́í nóòmà ni ea kil ló Jìhóvà ẹ?
Bugi Èzíkiẹ̀l 33:11, vaá ò gbóó aalai nakà bíbví:
-
Éé ní ea dú bíi kọ é naa mm̀ gè zogè kọọ̀ è palàge ọgá ẹ́?
Jìhóvà ólò palàge ẹ̀b nú ea kil ló pá a naanà ból belí neǹ kùdẽe ló naanà ból
SÌGÀ GBÒ KỌ́Ọ̀: “Pọ̀ síím kọọ̀ be m̀ kọ́ pọ́lọ́ em beè sì nè gbò kànen, bàé kpóm lọl mm̀ bõ̀ònatõ̀ò.”
-
Éé ní eo é láá kọ́ nè nen ea kọ́ vó é?
NÚ E NI NÓ
Be è síì kà agẹbá pọ́lọ́, vaá è palàge ọgá ló vaá beeláfùl kọ née é síná pọ́lọ́á, Jìhóvà é ia ló nèi.
Ge Òòa Boo
-
Éé ní ea náa vaá à dú lé kọ é kọ́ bẹẹ pọ́lọ́ nè Jìhóvà ẹ?
-
Éé ní eé náa kọbé Jìhóvà ia ló bẹẹ pọ́lọ́ ẹ́?
-
Éé ní ea náa vaá à bọ́ló kọ é gbĩ́ nvèè bá lọl bá gbò kànen be è sí agẹbá pọ́lọ́ ẹ́?
KPÁÁ GBĨ́ TẼ́ LÓ
Ẹ̀b bé e Jìhóvà beè ié íb sàn nyíe ea di mm̀ kpá Àìzáíà 1:18 kilma ló ene kà gbálà naa.
Mósĩ́ deè ní e nòònù ge kpó nen lọl mm̀ bõ̀ònatõ̀ò ólò dọ̀ bélè nè kọ̀láá nen ea bãàa m-mé?
“Why Disfellowshipping Is a Loving Provision” (Kpá Tọ Kùdẽe Ló, April 15, 2015)
Nyimá bé eo é láá baatẽ́ nòònù ge kpó nen lọl mm̀ bõ̀ònatõ̀ò nè nen e bè náa ólò fã̀ Jìhóvà naa.
“Do Jehovah’s Witnesses Shun Those Who Used to Belong to Their Religion?” (Web article)
Mm̀ nòòtẽ́ ea kọ́ọ̀ “I Needed to Return to Jehovah,” nyimá bé e ene kà gbálà ea beè dọ̀ aa mm̀ bõ̀ònatõ̀ò beè mòn kọọ̀ Jìhóvà kpáá tuèe nvea ló naa.
