Ə ma kɛ Zehova wɛlikaa yɛ́ kpɔ kɛnɛ ə lɛɛ ya kɛ mɛni kəlee kɛi ə gɛ hó pa mɛni ta kɛ yii a nwana ma ə ma kɛ tii ya pɛli ə́ lan a lowai taɠaa, kəlaa landuwɔtaɠaa kaa laa gaa a nɛŋɛn gɛnɛ (Korɛntə dɔlɔɔ 6:​9, 10). Ya nɛŋɛn gɛnɛ həɠə ɉukɔlɔn yɛ́ ma yili hwəi pai gɛi ə́ wɛli ə kpɛɛ Zehova ɓa ; ə́ kili lɛɛ ɉu yɛ́ ma Zehova a ə́ maahwaalɛɛ ə lɛɛ ə́ kpɔnmaa tɛɛ ə́ pɔ.

1. Lə ɓə maanɛɛ gu gɛ ə gɛ Zehova ə gu maahwaalɛɛ ?

Nuai Zehova wɛlikaa diɛ kpɔn kɛnɛ da ɲaakaa diɛ ma daa nɛŋɛn gɛnɛ həɠə yili a hee di hu kpɔ kɛnɛ ə lɛɛ ə di maawɛli. Kəlaa mɛnii ŋɛi Zehova ə mo matoo nua diɛ a di hwaŋalɔ yai ə kɛ ma : “ Akɛ ka kɛ nɛŋɛn gbɔluɔ yɛ ɲama a kwələ yɛ yeehunwɔ ” (Esai 1:18). Gwa gu pulu tɔɔ kpɔ a neelee gu kɛ nɛŋɛn ma Zehova a gu maahwaalɛɛ. Gwa gu pulu tɔɔ ləi gu kɛ nɛŋɛn ma ? Pələi gwa gu pulu tɔɔ la gu kɛ nɛŋɛn ma bələ ka : nɛŋɛn gu ɉəɠə a hee gu hu kpɔ kɛnɛ gu gu hɔn maahwalən ə lɛɛ gu nɛɛmaa hwə Zehova ɓa ə gɛ ə gu maahwaa lɛɛ. Gwa mɛni kəlee kɛ gu gu kiliŋahiɛ pələɠaa maahwalən da duwɔɠaa kpɔ gɛ guɔ too nɛŋɛn tii hu gu di lɛɛ laa, ə lɛɛ gwa mɛni kəlee kɛ guɔ hiɛ a Zehova ŋɔ tɔn-nwooɠaa (Esai 55:​6, 7).

2. Gwa nɛŋɛn ɉəɠə Zehova a tɛɛ ləi kalaɉonŋaa kɔwɔi yɛ kpɔnmaa tɛɛ gu pɔ ?

Zehova a kɛ guɔ gwa nɛŋɛn gɛnɛ həɠə “ gu gbɔn ɉu nua kpeakpea təli yili [mukulaa ɓaa kalaɉonŋaa] ” (Ɉakə 5:​14, 15). Kalaɉonŋaa da Zehova wɛlila kɛ ə lɛɛ diɛ matoo nua wɛlilakɛ. Gwa nɛŋɛn ɉəɠə pələi gwa tɛɛ la ə gɛ nɛɛlaa ə pənə ə kɛ gwa Zehova ni gu lowai, kalanɉonŋaa maakwɛliɛi yili kɛ pələ ɓa (Galatə 6:1).

Gwa nɛŋɛn gɛnɛ həɠə kalaɉonŋaa da kpɔnmaa tɛɛ ləi gu pɔ ? Kalaɉon veelɛ awala kɛtii haaɓa da gu liɛwoo kɛ a Biblə ŋɔ wookpuɔɠaa. Da kpaaləɠaa lɛ guɔ pələi gwa tɛɛ la ə gɛ gu ho pənə gu too nɛŋɛn tii hu. Da pɛli di kɛ guɔ ə lɛɛ la ɉu gwa Zehova ni guɔ nɛɛlaa hu yɛ pənə yɛ wala-wala gu ho nii pai mɛnitaɠaa kɛi galangbɔn ɉu. Nuta a nɛŋɛn gɛnɛ həɠə awala gɛ ho bulu tɔɔ gɛ nɛŋɛn ma kalaɉonŋaa da maanu laakulɔ galangbɔn ɉu ə gɛ galangbɔn ɉu nua takpɛliɠaa di ho pa hwilɛn ɓɔɔ ŋa.

 Ə́ WƆ MƐNIKƆLƆNŊAA DA PƐLƐ MA

3. Gwa hwaa gu hɔn ma yili a gɛ nɛɛlaa ə pənə ə kɛ gwa Zehova ni gu lowai

Nɛŋɛn nɔpee gwa ɉəɠə, gwa ɉəɠə Zehova ɓa yili ɓa maanɛɛ gu nɛɛmaa hwə ma. Maatɛnɛ 32:​1-5 ɓo, ə lɛɛ ka lono kɛ gɛɛmaalən ŋɛi mɛi :

• Lə mɛni ɓa gwa nɛŋɛn gɛnɛ həɠə maanɛɛ gu hwaa gu hɔn ma Zehova ɲɛi ɓa hɛn ni gɛ gu gu hɔn noo ?

 4. Nui hwa bulu tɔɔ gɛ nɛŋɛn ma naakulɔ mɛni galangbɔn ɉu pulu mɛinɛɛɠaa

Nui a nɛŋɛn gɛnɛ həɠə awala kɛ gɛi ho hiɛ a Zehova ŋɔ tɔn-nwooɠaa hwa pɛli lɛɛi galangbɔn ɉu. Da maanu laakulɔ galangbɔn ɉu. ə lɛɛ gwa diɛ ni gu hwa kea hiɛ gee pululaa kɛ ə ma kɛ kpɛli lono ɓə hwa kɛ gu lowai. Korɛntə dɔlɔɔ 5:​6, 11 da Ɉaan veelɛnaa 9-​11 ɓo Ɉɛɓɛ yili ninɛ hu, ə lɛɛ ka lono kɛ gɛɛmaalən ŋɛi mɛi :

• Yɛ pələi lɔ lopɛɛin tɛ hɛn a lopɛɛin tɛ la, nui awala kɛ gɛi ho bulutɔɔ gɛ nɛŋɛn ma pɔɔ ləkɛɛ ɓə a pɛli nɛɛi galangbɔn ma ?

 YII GU GALAN

Gwa nɛŋɛn gɛnɛ həɠə yili ə gu lii too pulu kpɔ a neelee, ə lɛɛ gu mɛni kəlee kɛ gu gu pulutɔɔ mɛni ɲɔnwɔn tii ɓa Zehova a gu maahwaa lɛɛ.

Nɛɛ ə́ kili pɔ

• Gwa nɛŋɛn ɉəɠə lə mɛni ɓa mɛni lɛlɛɛ ɓaa gu gu hɔn mo Zehova ɓa ?

• Gwa nɛŋɛn ɉəɠə lə ɓə maanɛɛ gu gɛ ə gɛ Zehova ə gu maahwaa lɛɛ ?

• Gwa nɛŋɛn gɛnɛ həɠə lə mɛni ɓa maanɛɛ gu kalaɉonŋaa di wɔ kpɔnmaa kwɛli ?