LECCIÓN 57
Que pasa se cometes un pecado grave?
Aínda que queres moito a Xehová e te esforzas por evitar calquera cousa que lle podería facer dano, de vez en cando farás algo que está mal. Pero algúns erros ou pecados son máis graves ca outros (Gálatas 5:19-21). Se cometes un pecado grave, recorda que Xehová non deixou de quererte e que está disposto a perdoarte e axudarche.
1. Que debemos facer para que Xehová nos perdoe?
Os que aman a Xehová séntense moi tristes cando se dan conta de que cometeron un pecado grave. Pero alíviaos saber o que Xehová lle prometeu ó seu pobo: “Aínda que os vosos pecados fosen coma o granate, coma a neve branquexarán” (Isaías 1:18). Se nos arrepentimos de corazón, Xehová perdoaranos por completo. Como nos arrepentimos? Debemos lamentar profundamente o que fixemos. Iso impúlsanos a deixar de facer o que está mal e a rogarlle a Xehová que nos perdoe. Ademais, debemos esforzarnos por cambiar os pensamentos ou hábitos que nos levaron a ese erro e intentar vivir de acordo coas limpas normas de Xehová (le Isaías 55:6, 7).
2. Como nos axuda Xehová mediante os anciáns cando pecamos?
Se cometemos un pecado grave, Xehová dinos que falemos cos anciáns da congregación (le Santiago 5:14, 15). Estes irmáns nomeados aman a Xehová e as súas ovelliñas, e están capacitados para axudarnos a recuperar a nosa amizade con el (Gálatas 6:1).
Como nos axudan os anciáns se comentemos un pecado grave? Dous ou tres anciáns usarán os consellos da Biblia para mostrarnos por que non está ben o que fixemos. Tamén nos darán ánimo e consellos prácticos que nos axudarán a non cometer de novo ese erro. Poida que durante algún tempo lle poñan un límite ás actividades nas que podemos participar coa congregación ata que volvamos a estar ben en sentido espiritual. Para protexer a congregación de influencias que lle poidan facer dano, os anciáns expulsan a calquera que cometa un pecado grave e non se arrepinta.
AFONDA MÁIS
Fai máis forte o teu aprecio pola axuda que nos dá Xehová se cometemos un pecado grave.
3. Contar o que fixemos axúdanos a estar mellor
Calquera pecado que cometemos aféctalle a Xehová. Por iso o correcto é que llo confesemos a el. Lede Salmo 32:1-5 e logo comentade esta pregunta:
-
Por que é bo para nós que lle confesemos os nosos pecados a Xehová en vez de intentar ocultalos?
Ademais de confesarlle os nosos pecados a Xehová, sentimos alivio cando lles pedimos axuda ós anciáns. Poñede o VÍDEO e logo comentade esta pregunta:
-
Como axudaron os anciáns a Canon a volver a Xehová?
Os anciáns están aí para axudarnos. Por iso debemos ser sinceros e honrados con eles. Lede Santiago 5:16 e logo comentade esta pregunta:
-
Por que ós anciáns lles será máis fácil axudarnos se somos sinceros con eles?
Confesa o teu pecado, sé sincero cos anciáns e acepta a amorosa axuda de Xehová
4. Como axuda a expulsión
Se unha persoa que cometeu un pecado grave non quere seguir as normas de Xehová, non pode seguir formando parte da congregación. Esa persoa é expulsada, e nós deixamos de xuntarnos con ela e incluso de falarlle. Lede 1 Corintios 5:6, 11 e 2 Xoán 9-11 e logo comentade esta pregunta:
-
Igual que o lévedo fermenta o pan, como lle afectaría á congregación xuntarse con alguén que cometeu un pecado grave e non se arrepinte?
Moitos que foron expulsados, co tempo, acabaron volvendo á congregación. Aínda que a disciplina que recibiron foi dolorosa, axudoulles a darse conta de que o que fixeran estivo mal (Salmo 141:5). Poñede o VÍDEO e logo comentade esta pregunta:
-
Como lle axudou a expulsión a Sonja?
De que xeito a expulsión...
-
honra o nome de Xehová?
-
demostra que Xehová é razoable e cariñoso?
5. Xehová perdóanos cando nos arrepentimos
Xesús usou un exemplo para axudarnos a entender como se sente Xehová cando unha persoa se arrepinte. Lede Lucas 15:1-7 e logo comentade esta pregunta:
-
Que che ensina isto sobre Xehová?
Lede Ezequiel 33:11 e logo comentade esta pregunta:
-
Que importante paso temos que dar para demostrar que estamos arrepentidos?
Igual que a un pastor, a Xehová impórtanlle moito as súas ovelliñas
HAI QUEN DI: “Teño medo de que os anciáns me expulsen se lles conto o que fixen”.
-
Que lle dirías a alguén que se sente así?
RESUMO
Se cometemos un pecado grave pero nos arrepentimos de corazón e estamos decididos a deixar de facer o que está mal, Xehová vainos perdoar.
Repaso
-
Por que é bo para nós que lle confesemos os nosos pecados a Xehová?
-
Que debemos facer para que Xehová perdoe os nosos pecados?
-
Por que deberiamos buscar a axuda dos anciáns se cometemos un pecado grave?
INVESTIGA
Mira como un home puido ver a misericordia de Xehová que se describe en Isaías 1:18.
Como pode a expulsión beneficiar a tódalas partes implicadas?
“Por que a expulsión é unha mostra de amor?” (La Atalaya, 15 abril 2015)
Aprende como podes explicarlle a alguén que non é testemuña de Xehová o que implica a expulsión.
“Evitan as testemuñas de Xehová o contacto cos que xa non pertencen á súa relixión?” (Artigo web)
No relato “Necesitaba volver a Xehová”, aprende como un home que se apartara da verdade sentiu que Xehová quería que volvese onda el.