તમે યહોવાને ખૂબ પ્રેમ કરો છો અને તેમને દુઃખી ન કરવા બનતું બધું કરો છો. પણ માણસ માત્ર ભૂલને પાત્ર. કોઈ વાર તમે પણ ભૂલ કરી બેસશો. અમુક ભૂલો કદાચ વધારે મોટી હશે. (૧ કોરીંથીઓ ૬:૯, ૧૦) જો તમારાથી કોઈ મોટી ભૂલ થઈ જાય, તો યાદ રાખો કે યહોવા હજીયે તમને પ્રેમ કરે છે. તે તમને માફ કરવા અને મદદ કરવા તૈયાર છે.

૧. કોઈ મોટી ભૂલ કરી બેસીએ ત્યારે, યહોવાની માફી મેળવવા શું કરવું જોઈએ?

યહોવાના ભક્તો કોઈ મોટી ભૂલ કે પાપ કરી બેસે છે ત્યારે ખૂબ દુઃખી થઈ જાય છે. પણ યહોવાના આ વચનથી તેઓને પુષ્કળ દિલાસો મળે છે: “ભલે તમારાં પાપ લાલ રંગનાં હોય, તોપણ એ બરફ જેવા સફેદ થઈ જશે.” (યશાયા ૧:૧૮) જો આપણે દિલથી પસ્તાવો કરીશું, તો યહોવા પૂરી રીતે માફ કરશે. પણ આપણને પસ્તાવો છે એવું કઈ રીતે બતાવી શકીએ? દિલથી અફસોસ કરીએ, ખોટાં કામો છોડી દઈએ અને યહોવા પાસે માફીની ભીખ માંગીએ. પછી આપણે જેના લીધે પાપમાં પડ્યા હતા, એ ખોટા વિચારો કે આદતો બદલવા ખૂબ મહેનત કરીએ અને યહોવાનાં ધોરણો પ્રમાણે જીવવા પૂરી કોશિશ કરીએ.—યશાયા ૫૫:૬, ૭ વાંચો.

૨. આપણે કોઈ પાપ કરી બેસીએ ત્યારે, વડીલો દ્વારા યહોવા કઈ રીતે મદદ કરે છે?

આપણે કોઈ મોટું પાપ કરી બેસીએ ત્યારે, યહોવા “મંડળના વડીલોને બોલાવવા” કહે છે. (યાકૂબ ૫:૧૪, ૧૫ વાંચો.) વડીલો યહોવાને અને તેમના ભક્તોને ખૂબ પ્રેમ કરે છે. તેઓ જાણે છે કે આપણને કઈ રીતે મદદ કરવી. એટલે યહોવા સાથે આપણો સંબંધ ફરી મજબૂત કરવા તેઓ જરૂરી મદદ કરશે.—ગલાતીઓ ૬:૧.

જો આપણે કોઈ મોટું પાપ કરી બેસીએ, તો વડીલો કઈ રીતે મદદ કરે છે? બે કે ત્રણ વડીલો આપણી મુલાકાત લેશે. તેઓ બાઇબલની મદદથી આપણી ભૂલ સમજાવશે. તેઓ આપણને અમુક સલાહ-સૂચનો પણ આપશે, જેથી ફરી એ પાપ ન કરી બેસીએ. તેઓ ચાહે છે કે યહોવા સાથે આપણો સંબંધ ફરી મજબૂત થાય. પણ તેઓ કદાચ નિર્ણય લે કે એવું થાય ત્યાં સુધી આપણે મંડળનાં અમુક કામોમાં ભાગ નહિ લઈ શકીએ. જો એક વ્યક્તિ મોટું પાપ કર્યા પછી પસ્તાવો ન કરે, તો વડીલો તેને મંડળથી દૂર કરશે, એટલે કે બહિષ્કૃત કરશે. એમ કરવાથી મંડળનાં બીજાં ભાઈ-બહેનો પર એ વ્યક્તિની ખરાબ અસર નહિ પડે.

 વધારે જાણો

૩. પાપ કબૂલ કરવાથી યહોવા સાથે આપણો સંબંધ ફરી મજબૂત થશે

આપણે કોઈ મોટું પાપ કરી બેસીએ ત્યારે યહોવાને બહુ દુઃખ થાય છે. એટલે આપણે તેમની આગળ પોતાનું પાપ કબૂલ કરવું જોઈએ. ગીતશાસ્ત્ર ૩૨:૧-૫ વાંચો. પછી આ સવાલની ચર્ચા કરો:

• પોતાનું પાપ છુપાવવાને બદલે કેમ યહોવા આગળ એને કબૂલ કરવું જોઈએ?

 ૪. બહિષ્કૃતની ગોઠવણથી કયા ફાયદા થાય છે?

જો કોઈ વ્યક્તિ મોટું પાપ કરે, પસ્તાવો ન કરે અને ખોટા માર્ગેથી પાછી ન ફરે, તો શું? એવી વ્યક્તિને બહિષ્કૃત કરવામાં આવે છે. તેની સાથે આપણે હળતા-મળતા નથી. અરે, તેની સાથે વાત પણ કરતા નથી. ૧ કોરીંથીઓ ૫:૬, ૧૧ અને ૨ યોહાન ૯-૧૧ વાંચો. પછી આ સવાલની ચર્ચા કરો:

• થોડું ખમીર બાંધેલા આખા લોટને ફુલાવે છે. એવી જ રીતે, પાપ કર્યું હોય અને પસ્તાવો કર્યો ન હોય એવી વ્યક્તિ સાથે હળીશું-મળીશું તો, એની મંડળ પર કેવી અસર પડશે?

 આપણે શીખી ગયા

જો આપણાથી કોઈ મોટું પાપ થઈ જાય, તો દિલથી પસ્તાવો કરીએ અને એવી ભૂલ ફરી ન કરવાનો પાકો નિર્ણય લઈએ. એમ કરીશું તો યહોવા આપણને માફ કરશે.

તમે શું કહેશો?

• યહોવા આગળ કેમ પોતાનાં પાપ કબૂલ કરવાં જોઈએ?

• યહોવા આપણાં પાપ માફ કરે એ માટે શું કરવું જોઈએ?

• આપણે કોઈ મોટું પાપ કરી બેસીએ ત્યારે કેમ વડીલોની મદદ લેવી જોઈએ?