KUKWE JA TÖTIKARA 57
¿Ja mikadre ngite krubäte ngwane dre raba nemen bare?
Jehová tare krubäte mäkwe yebätä mäta ja di ngwen ñan mike ulire, yebiti ta ruäre ngwane mäkwe ja mikai ngite. Akwa ja mika ngite ruäre ye bäri käme mada ye kräke (1 Corintios 6:9, 10). Mäkwe ja mikadre ngite krubäte akwa mä täi tare Jehovakwe ye ngwen törö jai, niarata juto mä dimikakäre aune ngite diankäre ta mäbiti.
1. ¿Jehovakwe ngite diandre ta nibiti yekäre dre nuaindre?
Ni Jehová tarekä tä ja mike ngite krubäte tä gain jabätä ngwane, jata nemen ruin ulire krubäte ie. Akwa Jehovakwe kukwe käbämikani juta kwe ie nebiti tä ni ja mikaka ngite töi mike jäme: “Munta ja mike ngite ye rabai jondron tain trä kwrere akwa kwitai ngwen nieve kwrere” (Isaías 1:18). Nikwe ja töi kwitai ja brukwä tätebiti ngwane, Jehovakwe ngite diainkä täte nibiti. ¿Ja töi kwitata ye abokän dre gärätä? Ye abokän, jata nemen ruin ulire krubäte ja mika ngite yebätä, kukwe käme ye tuametreta aune bikata tidrä Jehovabätä ne kwe ngite diandre ta kwe nibiti. Ye bitikäre ja di ngwanta ja töi kwite o kukwe käme käkwe ni töi mikani ja mike ngite ye tuenmetre aune nüne kukwe metre Jehovakwe ye ererebätä (mäkwe ñäkä Isaías 55:6, 7 yebätä).
2. Nita ja mike ngite ngwane, ¿nitre umbre ji ngwanka yebiti Jehovata ni dimike ño?
Ni ja mikaka ngite krubäte yei Jehovata niere: “Nitre umbre ji ngwanka konkrekasionte ye munkwe kärä” (mäkwe ñäkä Santiago 5:14, 15 yebätä). Nitre kädekäni üai demebiti ne tä Jehová aune oveja Jehovakwe tarere. Niaratre ye tötikani ne kwe raba ni dimike ja keteta kwin Jehovabe (Gálatas 6:1).
¿Nita ja mike ngite krubäte ngwane nitre umbre ji ngwanka tä ni dimike ño? Kukwe nuainbare nikwe ye ñaka kwin ye niaratre nibu o nimä käkwe ni dimikai mike nüke gare jai Bibliabiti. Arato kukwe kwin niedi kwetre nie mäträkäre nibätä aune ni dimikai kwetre ne kwe nikwe ñaka ja mikadreta ngite. Aune raba sribi ruäre konkrekasionte ye denkä nikän, nemen ni rabadreta kwin ja üairebiti ngwane. Ni iti tä ja mike ngite krubäte aune ñan ja töi kwite ngwane, nitre umbre ji ngwanka tä kitekä kukwebätä, konkrekasion kriemikakäre.
JA TÖTIKE BÄRI NGUSETA
Nita ja mike ngite ngwane Jehovata dre nuainne ni dimikakäre, ye mike nüke gare kwin jai aune mike ütiäte jai.
3. Nita ja driere ye tä ni dimike nementa kwin
Nita ja mike ngite ye tä nemen tare Jehovai ye medenbätä nikwe drebätä ja mikani ngite ye ni rabadre mike gare ie. Ñäkädre Salmo 32:1-5 yebätä aune kukwe ne kädriedre jabe:
-
¿Ja driedre Jehovai ye ñobätä bäri kwin ükadre ye kräke?
Nikwe dre nuainbare ye nita mike gare Jehovai aune nikwe ja di käräi nitre umbre ji ngwanka ie ngwane ja rabaita ruin kwin nie. VIDEO mikadre ñärärä, biti kukwe ne kädriedre jabe:
-
¿Nitre umbre ji ngwanka käkwe Canon dimikani ño ne kwe jatadreta Jehová kokwäre?
Dre nakaninkä ye erere nikwe niedre nitre umbre ji ngwanka ie ye ütiäte krubäte, ñobätä ñan aune niaratre ye ni dimikaka. Ñäkädre Santiago 5:16 yebätä aune kukwe ne kädriedre jabe:
-
Nikwe ja driei bökän nitre umbre ji ngwanka ie ngwane, ¿rabai bäri nuäre kräketre ni dimikakäre raba ruin mäi? ¿Ñobätä?
Mäkwe ja mikani ngite ye mäkwe nie nitre umbre ji ngwanka ie aune Jehovakwe mä dimikai ye mäkwe ka ngäbiti.
4. Ni kitakata kukwebätä ye tä kukwe kwin mike bare ni jökrä kräke
Ni iti ja mikani ngite krubäte ñan tö Jehová kukwei mike täte ngwane, ñan raba nemen jankunu konkrekasionte. Aisete kitakata kukwebätä. Aune ni ñan tä nemena keteitibe ben aune ni ñan blite ben. Ñäkädre 1 Corintios 5:6, 11 aune 2 Juan 9-11 yebätä aune kukwe ne kädriedre jabe:
-
Levadura tä masa pankwe jökrä mike dime ye ben töbätä. Nikwe ja ketadre jankunu ni ja mikaka ngite ñan tö ja töi kwitai yebe, ¿ye raba kukwe blo mike bare konkrekasionbätä raba ruin mäi? ¿Ñobätä?
Nitre kwati nämäne kitaninkä kukwebätä ye nükaninanta konkrekasionte, ¿ñokänti nükaninta? Bäkänä, mäträbare bätätre ye ñan namani nuäre kräketre, akwa ye käkwe dimikani ja töi kwiteta (Salmo 141:5). VIDEO mikadre ñärärä, biti kukwe ne kädriedre jabe:
-
¿Sonia kitaninkä kukwebätä ye käkwe dimikani ño?
¿Ni kitakata kukwebätä yebiti...
-
... Jehová kä mikata ño ütiäte?
-
... Jehová ja ngwanka metre aune ni tare kwe ye bämikata ño?
5. Nita ja töi kwite täte ngwane Jehovata ngite juen ta nibiti
Ni iti tä ja töi kwite ngwane, kätä nemen ño Jehovabätä ye bämikakäre Jesukwe kukwe keteiti bämikani. Ñäkädre Lucas 15:1-7 yebätä aune kukwe ne kädriedre jabe:
-
¿Kukwe bämikani ne tä dre driere Jehovabätä nie?
Ñäkädre Ezequiel 33:11 yebätä aune kukwe ne kädriedre jabe:
-
¿Nikwe ja töi kwitani ye bämikakäre ni rabadre kukwe meden meden nuainne?
Pastor töita krubäte oveja kwebätä ye erere Jehová.
NITRE RUÄRE TÄ KUKWE NE NIERE: “Nitre umbre ji ngwanka ye jüräta nemen tibätä. Tikwe ja driedi ietre ngwane, ti kitaikä kukwebätä kwetre ruin tie”.
-
¿Ni iti töi kore yei mäkwe dre niedre?
¿DRE NIBI GARE MÄI?
Ja mikadre ngite krubäte, akwa ja töi kwitadre täte aune ja töi mikadre kwatibe ñaka nuainenta ngwane Jehovakwe ngite juain ta nibiti.
Ngwankäreta törö
-
¿Nikwe ja mikani ngite ye mikadre gare Jehovai ye ñobätä kwin?
-
¿Jehovakwe ngite diandre ta nibiti yekäre dre nuaindre?
-
Nikwe ja mikadre ngite krubäte ngwane, ¿ñobätä nikwe ja di kärädre nitre umbre ji ngwanka ie?
KUKWE MIKE GARE BÄRI JAI
Kukwe nieta Isaías 1:18 erere Jehová ni mikaka tuin bobre jai ye bämikani ño kwe ni iti ie ye tuin.
¿Ni kitakata kukwebätä köböire dre kwin tä nemen bare?
“Ni kitakata kukwebätä: yebiti ni tareta ye bämikata” (Ni Mikaka Mokre, 15 abril 2015)
Ñobätä ni iti kitakata kukwebätä ye mä raba mike gare ño ni ñan testiko ie ye mike gare jai.
“¿Nitre ñaka niena testiko Jehovakwe yebe nitre testiko Jehovakwe ñaka blite?” (Artículo jw.org)
Jehová nämäne ni iti ngwenta ja kokwäre namani ruin ie ye mike gare jai biografía “Nändreta Jehová kokwäre ye ti nämä ribere jai”.
“Biblia niaratre töi kwitani” (Ni Mikaka Mokre, 1 abril 2012)
Ne rabai tuen kwin mäi arato
KUKWE NGWANTARITA BÄRI
¿Ja tötika Bibliabätä drieta ni testiko Jehovakwe ye abokän ño?
Ni testiko Jehovakwe tä ni tötike ye ütiä kärä ñaka aune mä raba ja tötike Biblia jeñe mäkwe yebiti. Ne madakäre mä raba mä mräkä jökrä o ja ketamuko ye nübaire jabe ja tötike.
