LEKSION 57
Ano ang Himuon Mo Kon Nakahimo Ka sing Mabug-at nga Sala?
Bisan pa palangga mo gid si Jehova kag nagatinguha ka nga likawan ang mga butang nga makapasubo sa iya, makasala ka gid kon kaisa. Pero, may pila ka sala nga malain ukon mabug-at gid. (1 Corinto 6:9, 10) Kon nakahimo ka sing mabug-at nga sala, tandai nga palangga ka gihapon ni Jehova, kag handa sia nga patawaron kag buligan ka.
1. Ano ang himuon naton para patawaron kita ni Jehova?
Nasubuan gid ang mga nagapalangga kay Jehova kon nakahimo sila sing mabug-at nga sala. Pero nakahatag sa ila sing paumpaw ang ginsiling ni Jehova sa iya katawhan: “Bisan pa ang inyo mga sala mapula, papution ini kaangay sang niebe.” (Isaias 1:18) Kon nagahinulsol gid kita, patawaron kita ni Jehova. Paano naton mapakita nga nagahinulsol kita? Bangod ginhinulsulan gid naton ang aton mga sala, ginalikawan naton ang paghimo sing malain kag ginapangabay ang pagpatawad ni Jehova. Dayon ginatinguhaan naton nga bag-uhon ang sala nga panghunahuna ukon batasan nga nagaresulta sa paghimo sang sala kag ginasunod naton ang mga sugo ni Jehova.—Basaha ang Isaias 55:6, 7.
2. Paano ginagamit ni Jehova ang mga gulang para buligan kita kon nakasala kita?
Kon nakahimo kita sing mabug-at nga sala, nagsiling si Jehova nga ‘magtawag kita sang mga gulang sang kongregasyon.’ (Basaha ang Santiago 5:14, 15.) Palangga sini nga mga gulang si Jehova kag ang mga nagaalagad sa iya. Kabalo sila kon paano kita buligan para mabalik ang aton maayo nga kaangtanan kay Jehova.—Galacia 6:1.
Paano kita ginabuligan sang mga gulang kon makahimo kita sing mabug-at nga sala? Duha ukon tatlo ka gulang ang mabulig sa aton, kag gamiton nila ang Biblia. Laygayan nila kita kag palig-unon para malikawan naton nga makasala liwat. Para maproteksionan ang kongregasyon sa malain nga impluwensia, ginasikway sang mga gulang sa kongregasyon ang isa nga nakahimo sang mabug-at nga sala kag wala nagahinulsol.
USISAA PA GID
Usisaon naton kon paano mo maapresyar pa gid ang bulig ni Jehova kon makahimo kita sing mabug-at nga sala.
3. Mabuligan kita kon isugid naton ang aton sala
Masubuan gid si Jehova kon makahimo kita sing sala, gani dapat naton ini isugid sa iya. Basaha ang Salmo 32:1-5, dayon binagbinaga ini nga pamangkot:
-
Ngaa mas maayo nga isugid naton kay Jehova ang aton mga sala imbes nga taguon ini?
Luwas nga isugid naton kay Jehova ang aton mga sala, mas maayo nga magpabulig man kita sa mga gulang. Tan-awa ang VIDEO, dayon binagbinaga ang masunod nga pamangkot.
-
Sa video, paano ginbuligan sang mga gulang si Canon nga magbalik kay Jehova?
Dapat naton isugid sa mga gulang kon ano ang matuod, kay handa sila nga buligan kita. Basaha ang Santiago 5:16, dayon binagbinaga ini nga pamangkot:
-
Ngaa mas mahapos kita buligan sang mga gulang kon isugid naton sa ila ang matuod?
Isugid ang imo sala, ihambal sa mga gulang kon ano ang matuod, kag batuna ang bulig ni Jehova
4.Ginapakitaan ni Jehova sing kaluoy ang mga nakasala
Kon ang isa nakahimo sing mabug-at nga sala kag indi na niya gusto sundon ang mga talaksan ni Jehova, ginasikway sia sa kongregasyon, kag wala kita nagapakig-upod sa iya. Basaha ang 1 Corinto 5:6, dayon binagbinaga ini nga pamangkot:
-
Pareho sang lebadura nga nagapaalsa sang tinapay, ano ang epekto sa kongregasyon kon nagapakig-upod gihapon kita sa nakasala nga wala nagahinulsol?
Bilang pag-ilog sa kaluoy ni Jehova sa mga indi perpekto nga nakasala, ginapangita kag ginabuligan sang mga gulang ang mga ginsikway sa kongregasyon. Madamo ang nakabalik sang ulihi sa kongregasyon bangod sa pagdisiplina sa ila. Bisan pa masakit, nakabulig ini sa ila nga marealisar nga sala ang ila ginhimo.—Salmo 141:5.
Paano ang pagpakig-angot ni Jehova sa mga nakasala nagapakita nga makatarunganon sia, maluluy-on, kag mapinalanggaon?
5. Ginapatawad kita ni Jehova kon nagahinulsol kita
Si Jesus naggamit sang ilustrasyon para maintiendihan naton ang ginabatyag ni Jehova kon nagahinulsol ang isa. Basaha ang Lucas 15:1-7, dayon binagbinaga ini nga pamangkot:
-
Ano ang ginatudlo sini sa imo parte kay Jehova?
Basaha ang Ezequiel 33:11, dayon binagbinaga ini nga pamangkot:
-
Ano ang dapat naton himuon nga nagapakita nga nagahinulsol kita?
Pareho sa manugbantay sang karnero, ginaatipan gid sing maayo ni Jehova ang iya mga alagad
KON MAGSILING ANG IBAN: “Nahadlok ’ko isugid ang akon sala sa mga gulang, kay basi sikwayon nila ako sa kongregasyon.”
-
Ano ang ihambal mo kon amo sini ang ginabatyag sang isa?
SUMARYO
Kon nakahimo kita sang mabug-at nga sala pero nagahinulsol gid kita kag determinado nga indi na maghimo sing malain, patawaron kita ni Jehova.
Rebyu
-
Ngaa mas maayo kon isugid naton ang aton mga sala kay Jehova?
-
Ano ang dapat naton himuon para patawaron kita sa aton mga sala?
-
Kon nakahimo kita sing mabug-at nga sala, ngaa dapat kita magpabulig sa mga gulang?
DUGANG NGA IMPORMASYON
Hibalua kon paano nabatyagan sang isa ka lalaki ang kaluoy ni Jehova nga mabasa sa Isaias 1:18.
Paano ginabuligan sang mga gulang ang mga nakahimo sang serioso nga sala?
Binagbinaga kon paano ginapakitaan sing gugma kag kaluoy ang mga nakasala nga wala nagahinulsol.
“Kon Paano Ginabuligan ang mga Ginsikway sa Kongregasyon” (Ang Lalantawan, Agosto 2024)
Sa eksperiensia nga “Dapat Ako Magbalik kay Jehova,” hibalua kon paano ginbuligan ni Jehova ang isa ka lalaki nga magbalik sa kamatuoran.
“Ang Biblia Nagapabag-o sang Kabuhi” (Ang Lalantawan, Abril 1, 2012)
Basi Manamian Ka Man
MGA PIRME GINAPAMANGKOT
Ano ang Pagtuon sa Biblia nga Ginatanyag sang mga Saksi ni Jehova?
Ang interactive nga programa nga ginatanyag sang mga Saksi ni Jehova libre lang, kag puede mo gamiton ang bisan ano nga translation sang Biblia nga gusto mo. Mahimo mo man hagaron ang imo bilog nga pamilya ukon ang bisan sin-o nimo nga abyan nga mag-upod sa imo.
