ZAJ KAWM 57
Yog Koj Ua Txhaum Loj Lawm Koj Yuav Ua Li Cas?
Txawm peb hlub Yehauvas heev thiab tsis xav ua mob nws siab los muaj tej thaud peb yuav ua yuam kev thiab ua txhaum. Muaj tej zaum yuav txhaum me me xwb tiam sis muaj tej zaum yuav txhaum loj. (1 Kauleethaus 6:9, 10) Yog koj ua txhaum loj lawm los nco ntsoov tias Yehauvas yeej tseem hlub koj. Nws yuav zam txim rau koj thiab yuav pab koj.
1. Peb yuav tau ua li cas Yehauvas thiaj yuav zam txim rau peb?
Thaum cov uas hlub Yehauvas ua txhaum loj, lawv yeej tu siab kawg. Tiam sis lawv tsis tag kev cia siab vim Yehauvas cog lus rau nws cov neeg tias, “Txawm yog nej tej kev txhaum yuav liab cuag ntshav los kuv yuav ua kom dawb paug li daus.” (Yaxayas 1:18) Yog li ntawd, txawm hais tias peb ua txhaum loj los Yehauvas yeej yuav zam txim rau peb yog hais tias peb tu siab rau peb tej kev txhaum, tso peb tej kev txhaum tseg, tig rov los ua zoo, thiab thov Yehauvas zam peb lub txim. Peb kuj yuav tau rau siab hloov peb txoj kev xav phem los sis tus cwj pwm phem uas coj peb mus ua txhaum thiab ua peb lub neej raws li Yehauvas txoj cai dawb huv.—Nyeem Yaxayas 55:6, 7.
2. Yehauvas siv cov txwj laus los pab peb li cas thaum peb ua txhaum?
Thaum peb ua txhaum loj, Yehauvas hais kom peb mus cuag ‘cov txwj laus uas saib cov ntseeg.’ (Nyeem Yakaunpaus 5:14, 15.) Cov txwj laus hlub Yehauvas thiab Nws cov neeg. Lawv yog cov uas Yehauvas cob qhia los pab kom peb rov muaj kev sib raug zoo nrog Nws.—Kalatias 6:1.
Cov txwj laus yuav pab peb li cas thaum peb ua txhaum loj? Ob tug los sis peb tug txwj laus yuav tuaj pab peb. Lawv yuav muab Vajtswv Txoj Lus los qhuab ntuas peb thiab pab kom peb tsis txhob rov mus ua txhaum ntxiv. Tej zaum kuj muaj tej yam hauv lub koom txoos uas cov txwj laus yuav txwv tsis pub peb ua mus txog thaum uas peb txoj kev ntseeg rov ruaj khov dua. Tiam sis tus uas ua txhaum loj thiab tsis kam tso nws txoj kev txhaum tseg, cov txwj laus yuav muab nws rho tawm hauv lub koom txoos. Lawv ua li ntawd xwv lawv thiaj tiv thaiv tau cov uas nyob hauv lub koom txoos kom tsis txhob mus ua txhaum li nws.
KAWM NTXIV
Kawm kom koj to taub Yehauvas tej kev cai zoo, koj thiaj paub ris Nws txiaj ntsig rau tej uas nws pab koj thaum koj ua txhaum loj.
3. Thaum peb lees kev txhaum ces yuav pab tau peb rov muaj kev sib raug zoo nrog Yehauvas
Thaum peb ua txhaum, yuav ua rau Yehauvas tu siab. Yog li ntawd, thaum peb ua txhaum lawd, yeej tsim nyog peb mus lees txim rau Nws. Nyeem Phau Ntawv Nkauj 32:1-5 thiab tham txog lo lus no:
-
Vim li cas thiaj zoo rau peb lees peb tej kev txhaum rau Yehauvas thiab tsis txhob muab zais?
Tsis yog peb lees txim ntawm Yehauvas xwb. Yuav kom peb muaj kev kaj siab, peb yuav tau mus cuag cov txwj laus pab peb thiab. Saib zaj YEEB YAJ KIAB thiab tham txog lo lus no:
-
Cov txwj laus pab tus kwv tij hauv zaj yeeb yaj kiab no li cas, nws thiaj rov los teev tiam Yehauvas?
Cov txwj laus xav pab peb xwb. Yog li, peb yuav tau qhia qhov tseeb kom tag rau cov txwj laus. Nyeem Yakaunpaus 5:16 thiab tham txog lo lus no:
-
Vim li cas thiaj yooj yim dua rau cov txwj laus pab peb yog hais tias peb tsis zais dab tsi ntawm lawv?
Lees koj txoj kev txhaum, qhia kom tag rau cov txwj laus, tsis txhob zais siab, thiab cia Yehauvas pab koj
4. Vim li cas qhov uas muab tus ua txhaum loj rho tawm hauv lub koom txoos pab tau nws thiab sawv daws
Yog hais tias muaj ib tug ua txhaum loj tiam sis nws tsis kam tso nws txoj kev txhaum tseg thiab tsis kam ua li Yehauvas txoj cai ces yuav tau muab nws rho tawm hauv lub koom txoos. Peb ua tsis tau dab tsi nrog nws thiab nrog tsis tau nws tham lawm. Nyeem 1 Kauleethaus 5:6, 11 thiab 2 Yauhas 9-11 ces tham txog lo lus no:
-
Zoo ib yam li ib qho keeb me me ua tau rau lub ncuav su, cov uas pheej mus nrog tus uas raug rho tawm lawm ua ke, yuav ua tau li cas rau lawv?
Muaj ntau tus uas raug rho tawm lawd kuj rov qab los rau hauv lub koom txoos. Qhov uas lawv raug rho tawm ntawd yeej nyuaj kawg rau lawv tiam sis kuj ua rau lawv thim xav thiab tig rov los ua zoo. (Phau Ntawv Nkauj 141:5) Saib zaj YEEB YAJ KIAB thiab tham txog lo lus no:
-
Hauv zaj yeeb yaj kiab no, qhov uas Paj Ntsa raug rho tawm pab tau nws li cas?
Ua li cas qhov uas muab tus ua txhaum loj rho tawm . . .
-
ho yog hwm Yehauvas lub koob lub npe?
-
ho qhia tias Yehauvas yog tus Vajtswv uas ncaj ncees thiab hlub nws cov neeg?
5. Yehauvas zam peb lub txim thaum peb tig rov los ua zoo
Yexus siv ib zaj lus piv txwv los pab kom peb to taub zoo tias Yehauvas zoo siab npaum li cas thaum ib tug neeg hloov dua siab tshiab thiab tig rov los ua zoo. Nyeem Lukas 15:1-7 thiab tham txog lo lus no:
-
Zaj lus piv txwv no qhia li cas txog Yehauvas?
Nyeem Exekees 33:11 thiab tham txog lo lus no:
-
Yog peb hloov dua siab tshiab thiab tig rov los ua zoo lawm tiag, peb yuav tau ua li cas?
Yehauvas saib xyuas nws cov neeg zoo ib yam li tus neeg yug yaj saib nws pab yaj
IB TXHIA HAIS TIAS: “Kuv ntshai tsam yog kuv qhia cov txwj laus txog kuv tej kev txhaum ces lawv yuav muab kuv rho tawm.”
-
Yog muaj ib tug hais li ntawd rau koj no, koj yuav hais li cas rau nws?
KOJ KAWM TAU DAB TSI
Thaum peb mus ua txhaum loj lawm los Yehauvas yuav zam txim rau peb yog hais tias peb yeej tu siab tiag tiag rau tej peb ua thiab txiav txim siab tuag nthi tias peb yuav tsis ua ntxiv lawm.
Rov Tham Dua
-
Vim li cas thiaj zoo rau peb lees peb tej kev txhaum rau Yehauvas?
-
Yog peb xav kom Yehauvas zam txim rau peb, peb yuav tau ua li cas?
-
Vim li cas peb thiaj yuav tau mus cuag cov txwj laus pab peb thaum peb ua txhaum loj?
TSHAWB NTXIV
Saib seb Yehauvas zam txim rau ib tug txiv neej li hais hauv Yaxayas 1:18 li cas.
Thaum lub koom txoos muab tus ua txhaum loj rho tawm pab tau sawv daws li cas?
“Txoj Kev Raug Rho Tawm Pab Tau Qhov Zoo Xwb” (Phau Tsom Faj lub 4 Hlis tim 1 xyoo 2015)
Kawm kom koj paub piav rau cov uas tsis yog Yehauvas Cov Tim Khawv tias yog vim li cas thiaj yuav tau muab cov ua txhaum loj rho tawm.
Nyeem zaj “Kuv Yuav Tau Rov Qab Mus Cuag Yehauvas” seb ua cas ib tug txiv neej uas tso qhov tseeb tseg lawm thiaj hais tias Yehauvas yog tus uas rub nws rov qab los.
“Vajlugkub Kho Tau Lub Neej” (Phau Tsom Faj lub 4 Hlis tim 1 xyoo 2012)
Tej Yam No Yuav Pab Tau Koj Thiab
TEJ UAS COOB TUS NUG TXOG
Kev Kawm Vajlugkub Nrog Yehauvas Cov Tim Khawv Zoo Li Cas?
Yehauvas Cov Tim Khawv qhia Vajlugkub dawb xwb. Koj xav siv phau Vajlugkub twg los kawm los yeej tau. Koj yeej caw tau tag nrho koj tsev neeg thiab koj tej phooj ywg tuaj nrog koj kawm.
