Even if you love Jehovah plenny, an you try hard fo no do anyting dat would make him sad, you goin make mistakes sometimes. But some sins is moa worse den oddas. (1 Fo Da Corint Peopo 6:9, 10) If you do someting really bad, rememba dat Jehovah neva stop loving you; he like let you go an help you.

1. Wat we gotta do so Jehovah goin let us go?

Da guys who love Jehovah stay supa sad wen dey figga dey wen do someting really bad. But dey can res inside fo know wat Jehovah wen promise his peopo: “No matta all da bad kine stuff you wen do look jalike one big red spot now, but dey goin come white jalike da snow.” (Isaiah 1:18) If we feel fo real kine sorry, den Jehovah goin let us go fo real kine. How we show we fo real kine sorry? Cuz we feel supa bad about wat we wen do, we stop doing wat stay bad, an ask Jehovah fo please let us go. Den we work hard fo change da way we wen tink, an wat we was doing dat wen make us start fo sin. We try live in one clean way, da way Jehovah like.​—Read um Isaiah 55:6, 7.

2. How Jehovah use da eldas fo help us wen we sin?

If we do someting really bad, Jehovah tell us fo “call da eldas of da local hui.” (Read um From James 5:14, 15.) Dese eldas love Jehovah an dey love da guys who serve him. Dey wen learn how fo help us so we can come tight wit Jehovah again.​—Fo Da Galatia Peopo 6:1.

How da eldas help us if we do someting really bad? Two o three eldas goin use da scripchas from da Bible fo show us how come wat we wen do was wrong. Dey goin give us tings we can do an good kine words fo help us no sin again. Dey might tell we no can do some tings in da local hui fo litto while, till we stay tight wit Jehovah again. If somebody who do someting really bad no stay sorry fo wat he stay doing, da eldas goin hemo him from da local hui so oddas no copy him.

 DIG MOA DEEP

3. Telling wat we wen do help us fo get betta

Any time we do someting wrong, dat hurt Jehovah. Dass how come we gotta fess up to him. Read um Songs Fo God 32:1-5, an den talk story about dis question:

• How come is good fo us tell Jehovah oua sins an not try fo hide um?

 4. Wen gotta hemo somebody from da local hui, how dat help?

If somebody who wen do someting really bad no like do wat Jehovah tell, he no can be part of da local hui anymoa. He no goin be one Witness Fo Jehovah anymoa, an we no hang out, o even talk wit him. Read um 1 Fo Da Corint Peopo 5:6, 11 an 2 From John 9-11, an den talk story about dis question:

• Jalike yeast make da bread dough come big, if we hang out wit somebody who wen do someting bad an no like change, how dat goin affeck da local hui?

 WAT WE WEN TALK ABOUT

If we do someting really bad, but stay fo real kine sorry an really like no do um anymoa, Jehovah goin let us go.

Wat You Wen Learn

• How come az good fo us tell Jehovah oua sins?

• Wat we gotta do so dat Jehovah goin let us go fo oua sins?

• If we do someting really bad, how come we gotta get help from da eldas?