EHONGWA 57
Ombatero iṋe ndji mo munu tji wa tjiti ouvi ounene?
Nandarire kutja wa suvera Jehova nomasa nu u kondja oukukutu kutja o he mu hihamisa, ove mape ya povikando o tjiti ozondataiziro. Posi ya, ozondataiziro tjiva ozombi tjinene. (1 Ovakorinte 6:9, 10) Indu tji wa tjiti ouvi ounene, zemburuka kutja Jehova ke ya isa okukusuvera nu u nonḓero yokukuisira nokukuvatera.
1. Ovikwaye mbi matu sokutjita kutja Jehova me tu isire?
Imba mba suvera Jehova ve kara nomuhihamwatima indu tji va munu kutja va tjiti ouvi ounene. Posi ya mave yenene okumuna omahuhumiṋino momakwizikiro Jehova nga tjita kotjiwaṋa tje, nge tja: “Omauvi weṋu nandi ye ri omaserandu pyu, Ami me ye yepaereke okurira omavapa twee tjimuna ovitutukende.” (Jesaja 1:18) Indu tji twe ritanaura tjiri, Jehova me tu isire oparukaze. Omomuano uṋe mu tu ritanaura? Omuhihamwatima wetu u tu hinga okuisa oviṋa ovivi mbi twa tjiti nokuningira ondjesiro ku Jehova. Okuzambo tu ungura oukukutu okurundurura omeripura novitjitwa vyetu ovivi mbya tjita kutja tu katuke, nu tu kondja okuhupa otja kozoveta za Jehova.—Lesa Jesaja 55:6, 7.
2. Jehova u ungurisa vi ovanene vombongo okutuvatera indu tji twa tjiti ouvi ounene?
Indu tji twa tjiti ouvi ounene, Jehova u tu raera kutja ngatu “isane ovanene vombongo.” (Lesa Jakobus 5:14, 15.) Ovarumendu mba zikwa mba, va suvera Jehova na imba mbe mu karera. Owo va hongwa omuano wokutuvatera kutja tu kare noupanga ouwa ku na Jehova rukwao.—Ovagalate 6:1.
Omomuano uṋe ovanene vombongo mu ve tu vatera indu tji twa tjiti ouvi ounene? Ovanene vombongo vevari poo vetatu ve ungurisa omatjangwa okuturaisira kutja imbi mbi twa tjiti vi ri posyo. Owo wina ve tu yanḓiparisa nokutupa ondunge ndji mai tu vatere kutja atu ha katuka rukwao. Owo mape ya ave tye kutja katu nokuyenena okutjita oviṋa tjiva mombongo oure woruveze kaaṋi, ngandu oupanga wetu ku na Jehova tji wa kara nomasa rukwao. Indu omundu ngwa tjiti ouvi ounene tje hi nokuritanaura, ovanene vombongo ve mu konda kombongo kutja a ha putarisa varwe mombongo.
KONḒONONA OUKOTO
Rihonga okukara nondangi komuano Jehova me tu vatera indu tji twa tjiti ouvi ounene.
3. Okurihepura omauvi wetu ku tu vatera
Ouvi ngamwa mbu twa tjiti u hihamisa Jehova, ku nao tu sokurihepura omauvi wetu ku ye. Lesa Epsalme 32:1-5, nu okuzambo hungirira kepuriro ndi:
-
Ongwaye tje ri nawa okurihepura omauvi wetu ku Jehova moruveze rwokukondja okuyehoreka?
Indu tji twa ningire ovanene vombongo okutuvatera kombunda yokuhepura omauvi wetu ku Jehova, eṱe wina tu kara nohange momuinyo. Nyanda OKAVIDIO, nu okuzambo hungirira kepuriro ndi mari kongorera mba.
-
Omomuano uṋe ovanene vombongo mokavidio mu va vatera Canon okukotoka ku Jehova?
Eṱe matu hepa okurira ovapaturuke nokuhungira ouatjiri ku novanene vombongo, mena rokutja owo ve ri mbo okutuvatera. Lesa Jakobus 5:16, nu okuzambo hungirira kepuriro ndi:
-
Ongwaye tje ri oupupu kovanene vombongo okutuvatera indu tji matu hungire ouatjiri?
Rihepura ouvi woye, kara nouatjiri ku novanene vombongo, nu yakura ombatero ya Jehova yorusuvero
4. Omomuano uṋe okukondwa kombongo mu ku vatera?
Indu omundu ngwa tjiti ouvi ounene tje hi nokukongorera omarakiza wa Jehova, eye ke nokuyenena okurira orupa rwombongo rukwao. Eye u kondwa kombongo, nu eṱe katu sokukara pu na ye poo nandarire okuhungira pu na ye. Lesa 1 Ovakorinte 5:6, 11 na 2 Johanes 9-11, nu okuzambo hungirira kepuriro ndi:
-
Tjimuna osure tji i surisa oruhere aruhe, omomuano uṋe okukara pu nomundu ngu hi nokuritanaura mu ku ṱuna kombongo?
Ovengi mba konderwe kombongo kombunda va kotoka. Omena raye? Nandarire kutja okukondwa kombongo katja ri otjiṋa otjipupu, okwo kwe ve vatera kutja ve mune kutja oviṋa mbi va tjita vya ri ovivi. (Ovaheberi 12:11) Nyanda OKAVIDIO, nu okuzambo hungirira kepuriro ndi mari kongorere mba.
-
Otja tji pa raisiwa mokavidio, okukondwa kombongo kwa vatera vi Sonja?
Omomuano uṋe okukondwa kombongo mu ku . . .
-
yandja ondjozikiro kena ra Jehova?
-
raisa kutja Jehova oMukuru wousemba norusuvero?
5. Indu tji twe ritanaura Jehova me tu isire
Jesus wa ungurisa omasasanekero nge tu vatera okuzuva nawa omuano Jehova mbwe fula indu omundu tje ritanaura. Lesa Lukas 15:1-7, nu okuzambo hungirira kepuriro ndi:
-
Hapo omasasanekero ngo maye ku hongo tjike ohunga na Jehova?
Lesa Esekiel 33:11, nu okuzambo hungirira kepuriro ndi:
-
Otjikwaye otjinanḓengu tji matu sokutjita okuraisa kutja tjiri twe ritanaura?
Jehova u rikendera tjinene kozonḓu ze, tjimuna omurise
OVANDU TJIVA VE TJA: “Ami me tira kutja tji mba raere ovanene vombongo ohunga nouvi mbu mba tjiti, me kondwa kombongo.”
-
Hapo ove mo tja vi komundu ngu ma tja nao?
OKUYARUKIRA PO OUSUPI
Indu tji twa tjiti ouvi ounene natu ningire ondjesiro okuza komutima, nokuisa okutjita oviṋa ovivi, Jehova me tu isire.
Okurizemburukisa
-
Ongwaye tje ri nawa ku eṱe okuhepura omauvi wetu ku Jehova?
-
Ovikwaye mbi matu hepa okutjita kutja Jehova me tu isire komauvi wetu?
-
Indu tji twa tjiti ouvi ounene, ongwaye tji tu sokupaha ombatero okuza kovanene vombongo?
RIHONGA OVINGI
Tara komuano Jehova ma raisira omurumendu umwe otjari tji tja tamunwa mu Jesaja 1:18.
Indu omundu tja kondwa kombongo, omomuano uṋe mu ku vatera ovandu avehe mba ṱunwa i ouvi mbwo?
“Ongwaye okukondwa kombongo tji ku raisa orusuvero?” (Oruhungu, 15 ku April, 2015)
Rihonga kutja mo yenene vi okukahururira omundu ngu he ri Omuhongonone wa Jehova, kutja ongwaye povikando tjiva omundu tje kondwa kombongo.
Mehungi ndi “Ami ee hepa okukotoka ku Jehova,” rihonga kutja ongwaye omurumendu ngwa isa ouatjiri tjaa munu kutja Jehova aa vanga kutja ma kotoke ku ye.
“Ombeibela i rundurura omiinyo vyovandu” (Oruhungu, 1 ku April, 2012)
Mo yenene okutara ku imbi wina
OMAPURIRO NGE PURWA i yovandu OVENGI
Ovahongonone va Jehova ve yandja omerihongero wOmbeibela momuano uṋe?
Ove mo yenene okuungurisa Ombeibela ngamwa aihe indu tji mo rihongo Ombeibela otjari pu nOvahongonone va Jehova. Mo yenene okuṋanga eṱunḓu roye arihe poo omapanga woye okukara pomerihongero woye wOmbeibela.
