Naana nɛ a yihɔtu ku Ujehofa nɛhi nɛ a klla gē ceyitikwu o ya ɛɛ ku a hii ya ɔdā nōo géē kwu ɔ iyē ŋ ma a, ekoohi a gē biya íne kpɔ. Amáŋ, íne ō biya ōhī kē bɔbi nɛɛnɛhi fiyɛ ɔhá. (1 Ācɛ Ukɔ́rīnti 6:9, 10) Ɔdaŋ ku a lɛ íne nɛhi éyi biya, bla ka Ujehofa i lɛ abɔ ci ō yɔ i yihɔtu ku uwɔ ŋ, ó le tutu ō je ya uwɔ ɛhi klla ta uwɔ abɔ.

1. Ɔdi nɛ alɔ cika ō ya o ya ɛɛ ku Ujehofa kóō je ya alɔ ɛhi a?

Ɔtu gē biya lɛ ācɛ nōo yihɔtu ku Ujehofa a nɛhi, eko duuma néē má kéē lɛ íne nɛhi éyi biya. Amáŋ, é gē lɛ ɔtu ō tu kwu ɔtu ŋma okonu nɛ Ujehofa ce lɛ ācɛ ɔlɛ nu nōo kahinii: “Nááná nɛ̄ óbíipú nɛ̄ aá bī ā le aá iyē bīyā dúúdú ā. N géē je yá aá ɛhi dúúdu, cɛ́ɛ́ aá kwú yá yēŋēē bɛ̄ɛka owú otutú ā.” (Ayisáya 1:18) Ɔdaŋ ku alɔ le piyabɔ ɔkwɔɔkwɛyi, Ujehofa géē je ya alɔ ɛhi. Ɛgɛnyá nɛ alɔ gē piyabɔ a? Ɔdobɔbi nɛ alɔ ya a cika ō kwu alɔ iyē nɛɛnɛhi, cɛɛ alɔ kwu abɔ ci ɔdobɔbi ɔɔma klla gbɔɔkɔ lɛ Ujehofa kóō kwu ya alɔ ɛhi. Oŋma ɔɔma a, alɔ klla géē ceyitikwu lɔfu lɔfu ō kwu ɛlá ō gbo amāŋ uce obɔbi nōo bi alɔ gā ipu íne ō biya ɔɔma i piyabɔ klla lā oyeeyi nōo cɛtɔha mla ɔwɛ okpaakpa ku Ujehofa.—Jé Ayisáya 55:6, 7.

2. Ɛgɛnyá nɛ Ujehofa gē bi anyakwɔcɛ ku ujɔ le ta alɔ abɔ eko nɛ alɔ lɛ íne biya a?

Ɔdaŋ ku alɔ lɛ íne nɛhi biya, Ujehofa da alɔ ku alɔ lɛ “ɛhɔ̄ tū fu anyākwɔ́cɛ kú [ujɔ].” (Jé Ujɛ́mīsi 5:14, 15.) Anyakwɔcɛ ku ujɔ a yihɔtu Ujehofa mla ācɛ nōo gē gba ɔ ɛ̄gbā a duu. É le nwu uwa ɛgɛ néē géē ta alɔ abɔ o ya ɛɛ ku alɔ gáā lɛ ɛma olɔhi lɛ mla Ujehofa kpɔ.—Ācɛ Ugalésīya 6:1.

Ɛgɛnyá nɛ anyakwɔcɛ ku ujɔ a gē ta alɔ abɔ eko duuma nɛ alɔ lɛ íne nɛhi éyi biya a? Anyakwɔcɛ ku ujɔ a ɛpa amāŋ ɛta géē bi ukɔ́ ku Ubáyíbu le na alɔ ta ɔwɛ. É géē ta alɔ ukɔ́ klla ta alɔ ɔtu kwu ɔtu nōo géē ta alɔ abɔ ku alɔ hii biya íne nɛhi igbo ɔhá gɛ ŋ. É lɔfu miya kóō lɛ ɔdā ōhī ipu ujɔ nɛ alɔ i gáā ya ɛ ŋ jaa gbeeko nɛ ɛma ku alɔ mla Ujehofa kwu lɔfu iyē kpɔ. Ɔdaŋ ka ɔcɛ nōo biya íne nɛhi a i piyabɔ ŋ, anyakwɔcɛ ku ujɔ a géē je ɔcɛ ɔɔma taajɛ ŋma ipu ujɔ o ya ɛɛ kóō lɛ abɔ kwu ācɛ ɔhá nōo yɔ ipu ujɔ a iyē ŋ.

 JÉ GƆBU

3. Ɔdaŋ ku alɔ lɛ íne nɛ alɔ biya a ka tɛɛcɛ, ó géē ya ku alɔ lɛ ɛma mla Ujehofa kpɔ

Íne duuma nɛ alɔ biya a gē kwu Ujehofa iyē, ohigbu ɔɔma alɔ gē ka íne nɛ alɔ biya a tɛɛcɛ lɛ ɔ. Jé Aíjē Kú Ɛ̄gbā 32:1-5, cɛɛ ku aa kɔka lɛyikwu ɔka nyā:

• Ɔdiya nōó lɔhi ō ka aíne ō biya ku alɔ tɛɛcɛ lɛ Ujehofa, ikɔkɔ ō je uwa tayinu a?

 4. Itene nōo gē bɛɛcɛ ŋma ō je ɔcɛ taajɛ ŋma ipu ujɔ

Ɔdaŋ ka ɔcɛ nōo le íne nɛhi biya, nɛ ó klla ta ō yɛce ɔwɛ ku Ujehofa, ó gáā wɛ ipu ujɔ ku nu ɛ gɛ ŋ. É géē je ɔcɛ ɔɔma taajɛ ŋma ipu ujɔ, alɔ i klla gáā piyatɔha amāŋ kɛla mla ɔcɛ ɔɔma gɛ ŋ. Jé 1 Ācɛ Ukɔ́rīnti 5:6, 11; mla 2 Ujɔ́ni 9-11, cɛɛ ku aa kɔka lɛyikwu ɔka nyā:

• Ɛgɛ nɛ ɔdā ō nu igbo gē ya ku igbo kóō nu nɛɛnɛhi a, ɛgɛnyá nɛ ō piyatɔha mla ɔcɛ nōo biya íne nōo ta ō ya opiyabɔ géē lɛ abɔ kwu ujɔ a iyē a?

 ƆDI NƐ A NWU A?

Ɔdaŋ ku alɔ lɛ íne nɛhi éyi biya, amáŋ ɔdā nɛ alɔ ya a kwu alɔ iyē nɛhi nɛ alɔ kē le miya ō kwu abɔ i ci ɔdobɔbi ɔɔma, Ujehofa géē je ya alɔ ɛhi.

Aɔka ō tu alɔ ɛlá kwu ɔdā nɛ alɔ nwu

• Ɔdiya nōó lɔhi ku alɔ ka íne ō biya ku alɔ tɛɛcɛ lɛ Ujehofa a?

• Ɔdi nɛ alɔ cika ō ya, o ya ɛɛ ka Ujehofa kóō kwu íne ō biya ku alɔ i ya alɔ ɛhi a?

• Ɔdaŋ ku alɔ lɛ íne nɛhi éyi biya, ɔdiya nɛ alɔ cika ō dɔka otabɔ ŋma ɛgiyi anyakwɔcɛ ku ujɔ a?