Iivn duo yu lov Jeuova wid aal a yu aat an yu riili chrai aad fi no du notn we yu nuo a-go ort im, som a di taim yu stil a go du som tingz we rang. Bot som tingz wos dan som. (1 Korintiyan 6:9, 10) Ef yu fain se yu du sitn we riili bad, memba se Jeuova stil lov yu an im wel waahn fi figiv yu an elp yu fi du wa rait.

1. Ef wi waahn Jeuova fi paadn wi, wa wi fi du?

Di piipl dem we lov Jeuova, wen dem si se dem du sitn we Jeuova iet, dat mek dem sad bad. Bot wen dem tingk bout wa Jeuova se tu im piipl dem iina Aizaiya 1:18, it mek dem fiil beta. Im se: “Iivn duo unu sin dem red laka blod, dem gweehn get wait laka sunuo.” Ef wi shuo se wi riili sari fi di bad sitn dem we wi du an wi tap dwi’it, Jeuova a-go paadn wi. Bot wa a-go shuo se wi riili riili sari? Wi afi tap du di bad sitn we wi a du an beg Jeuova fi paadn wi. Den wi afi wok riili aad fi tap tingk di wie ou wi did a tingk, an tap du di sitn dem we wi aalwiez a du we did kaaz wi fi sin iina di fos plies. An wi afi du wi bes fi liv di wie ou Jeuova waahn wi fi liv.​—Riid Aizaiya 55:6, 7.

2. Wen wi sin, a ou Jeuova yuuz di elda dem fi elp wi?

Ef wi fain se wi du sitn we riili bad, Jeuova tel wi se wi fi “aks di choch liida dem”​—dat a di elda dem, fi kom elp wi. (Riid Jiemz 5:14, 15.) Dem man ya we Gad pik fi tek kier a wi, dem lov Jeuova an dem lov di piipl dem we a sorv im tu. Dem kyan elp wi so dat wi an Jeuova kyan bi gud gud fren agen kaaz Jeuova chrien dem fi mek wi nuo wa fi du.​—Gyalieshan 6:1.

So ef wi du sitn we riili bad, a ou di elda dem kyan elp wi? Ier wa dem wuda du: Tuu ar chrii elda a-go miit wid wi, an dem a-go yuuz di Baibl fi karek wi an shuo wi ou fi liv rait. Dem mait-a tap wi fram du sortn tingz we wi did a du iina di kanggrigieshan til wi an Jeuova gud agen, an wi get bak chrang iina wa wi biliiv iina an kyan staat du dem sitn de agen. Enibadi we du sitn we rang an no shuo se dem sari bout di wikid sitn we dem du, di elda dem a-go put dem outa di kanggrigieshan. Di elda dem afi du dis fi kip di ada breda an sista dem sief, so dat dem no staat du dem bad sitn de tu.

 LORN SOM MUO

3. Wen wi tel Jeuova an di elda dem bout sitn riili bad we wi du, dat kyan elp wi fi du wa rait agen

Enitaim wi sin wi ort Jeuova, so a im wi fi tel bout di bad sitn dem we wi du. Riid Saam 32:1-5, an den wi a-go taak bout da kwestiyan ya:

• Wa mek it gud fi tel Jeuova bout di bad sitn dem we wi du an no bada chrai aid dem fram im?

 4. Wa gud it du wen sumadi get put outa di kanggrigieshan?

Sumadi naa go get fi tan iina di kanggrigieshan ef dem du sitn wikid an dem a shuo se dem no waahn fi du wa Jeuova se dem fi du. So da sumadi de a-go get put outa di kanggrigieshan, an wi naa go a chat tu dem ar av notn fi du wid dem. Riid 1 Korintiyan 5:6, 11 an 2 Jan 9-11, an den wi a-go taak bout da kwestiyan ya:

• Wen sumadi a mek bred, a jos likl bit a yiis dem niid fi mek di uol duo swel op. So ef wi spen taim wid sumadi we du sitn wikid an naa shuo se dem sari bout it, wa dat kyan du tu di res a wi we iina di kanggrigieshan?

 DIS A WA YU FI MEMBA

Ef wi du wan bad sitn we Jeuova iet an wi shuo se wi riili sari bout it an wi mek op wi main fi tap dwi’it, Jeuova wi paadn wi.

Wa yu did lorn iina da lesn ya?

• Wa mek it gud fi wi tel Jeuova bout di bad sitn dem we wi du?

• Ef wi waahn Jeuova fi paadn wi, wa wi afi du?

• Ef wi du sitn we riili bad we Jeuova iet, wa mek wi fi go tu di elda dem fi dem elp wi?