Jehová aneakmesha tura tunaanum iniaraij tusam kakakmesha urutainsha awajirminiaitme. Tunaa ti yajauchisha awai (1 Kurintiunam 6:9, 10). Ti yajauch najanawakmincha Jehovaka tuke anenmattawai. Ninkia tsankurkartiniaiti tuma asa yainmaktatui.

1. Jehová tsankurturat takurkia wari turatniuitiaj?

Yaksha Yuusan enentaimtin ti tunaamkamtainkia kuntuts enentaimniuiti. Tumaitkiusha Jehová Israel aentsun timiania nui enentaimsamniaiti. Jehová junis timiayi: “Tura atumí tunaarí̱ ti kapa̱a̱kuitkiuisha murikiú ure̱ya imianú puju awajtústatjarme” (Isayas 1:18). Nekas enentaijiai ene enentaimia ajasakrinkia Jehovasha tsankurtameaji. Ene enentaimia ajasrikia wari turatniuitiaj? Nekas ene enentaimia ajasar yajauchia nuka atakka najanashtiniaitji nuya Jehová tsankurturta tu titiniaitji. Nuya ii enentaimmiasha yapajiattsar kakartiniaitji tura tunaanum ujunmarminiaitiajnia nuka iniaisatniuitji nuya Jehová tana nu umikir wetiniaitji (Isayas 55:6, 7 aujsata).

2. Ti yajauch najanawakrincha Jehová uuntri anairamu ainiajaisha itiura yainmaj?

Ti yajauch najaneana nuna Jehová junis tawai: “Uuntri ainiana nuna untsukti” (Santiago 5:14, 15 TNM aujsata). Nu aishman uuntri anairamuka Kristu aents ainian tura Jehovancha anenawai. Awajiakrincha Jehovan ataksha umirkarat tusar jintinkratin ainiawai (Karaseanam [Gálatas] 6:1).

Ti yajauch najanawakrin uuntri anairamu ainiana nusha itiura yainmakarminiaitiaj? Uuntri anairamu jimiar turutskesha menain, ii ti yajauch najanamu urukamtai penkerchait nuna Yuusa chichamejai jintintramawartatji. Ataksha tunaamkain tusar jintintramawartatji nuyasha ikiakatmarartatji. Yuusna warinma yaimkiashminiaitiaj nunasha turamiartatji. Yuus penker umirmam nuinkia yaimkiashtatme turamiartatji. Yaksha ti yajauch najanman iniaisatniun nakitiakuinkia uuntri anaikiamu ainiana nu ameka yamaikia testigo de Jehovachuitme tiartatui. Chikich Kristu aents nijiai nawamnainiak tunaamkarain tusar nunaka turawartatui.

 PENKER NEKAATAI

3. Ataksha Yuus umirkattsarkia ii tunaa najanamu etserkatniuitji

Ti yajauch najanawakrinkia Jehová kuntuts enentaimniuiti tuma asamtai ii tunaa najanamu ujaktiniaitji. Yus Kanta [Salmo] 32:1-5 aujsarum juna aujmattsatarum:

• Tunaamkarsha uutsuk Jehová urukamtai ujaktiniaitiaj?

 4. Tunaa najana ene enentaimia ajasat tusar jin ainiawai

Yaksha ti yajauchin najana Yuusan umirkatniun nakitiakuinkia testigo de Jehová achamniaiti. Tuma asamtai yamaikia testigo de Jehovachuitme tutainti. Nijiai nawamnaikiatin tura aujmattsatniusha iniaiyaji. 1 Kurintiunam 5:6, 11 tura 2 Juaṉ 9-11 aujsarum juna aujmattsatarum:

• Karin yuminnium enkeam mashiniu karimtikiana nunisan tunaamka ene enentaimia ajachujai tsaniakrikia iisha yajauch ajasminiashitiaj? Urukamtai tu enentaimiam?

 WARI NEKAAM

Ti yajauch najanar ene enentaimia ajasar atakka turashtatjai tu enentaimiakrinkia Jehová tsankurtamprattaji.

Awakeasrik nekaatin

• Tunaamkar urukamtai Jehová ujaktiniaitiaj?

• Jehová ii tunaamkamun tsankurturat tusar wari turatniuitiaj?

• Ti yajauch najanarkia uuntri anairamu ainiana nu urukamtai ujakartiniaitiaj?