Meskipun sayang Yéhuwah lan ora péngin nggawé Yéhuwah sedhih, isa waé awaké dhéwé nggawé kesalahan. Malah, isa waé nggawé dosa sing gedhé. (1 Korintus 6:​9, 10) Tapi meskipun kaya ngono, Yéhuwah tetep sayang karo awaké dhéwé. Terus, péngin ngampuni lan péngin mbantu bèn awaké dhéwé ora dosa manèh.

1. Piyé bèn isa diampuni Yéhuwah?

Nèk ngerti wis nggawé dosa gedhé mesthi rasané sedhih banget. Tapi, Yéhuwah ngomong, ”Senajan dosamu abang banget kaya getih, kuwi bakal dadi putih kaya salju.” (Yésaya 1:​18) Nèk bener-bener mertobat, Yéhuwah gelem ngampuni. Mertobaté piyé? Kudu ngrasa gela, ora mbalèni manèh dosané, lan kudu njaluk ampun karo Yéhuwah. Kuwi ya berarti aja nganti mikir utawa nglakoni kebiasaan sing isa marahi nggawé dosa manèh. Bar kuwi, kudu terus manut pathokané Yéhuwah.​—Wacanen Yésaya 55:​6, 7.

2. Piyé carané pinituwa mbantu wong sing nggawé dosa?

Nèk wis nggawé dosa gedhé, awaké dhéwé kudu ”ngundang para pinituwa ing jemaat”. (Wacanen Yakobus 5:​14, 15.) Para pinituwa sayang Yéhuwah lan umaté. Para pinituwa kuwi isa mbantu bèn wong sing dosa isa cedhak manèh karo Yéhuwah.​—Galatia 6:1.

Piyé carané pinituwa mbantu? Ana pinituwa loro utawa telu sing bakal ngandhani nèk menurut Alkitab perbuatan kuwi salah. Terus, para pinituwa ya bakal ngekèki naséhat lan saran bèn ora mbalèni kesalahan kuwi manèh. Bar kuwi, mungkin para pinituwa mutuské nèk beberapa kegiatané wong kuwi ing jemaat bakal dibatesi sik sementara. Nèk ana sing nggawé dosa gedhé tapi ora mertobat, bakal ditokké saka jemaat bèn sedulur liyané ora mèlu-mèlu.

 SINAU LUWIH AKÈH

3. Kudu ngakoni dosa bèn isa dibantu

Nggawé dosa kuwi marahi Yéhuwah sedhih. Mulané, kudu njaluk ampun karo Dhèwèké. Wacanen Mazmur 32:​1-5, terus rembugen pertanyaan iki:

• Apa manfaaté nèk ora nutup-nutupi, tapi ngakoni dosa karo Yéhuwah?

 4. Manfaaté nèk sing dosa ditokké saka jemaat

Nèk nggawé dosa gedhé lan ora gelem manut pathokané Yéhuwah, bakal ditokké saka jemaat. Sedulur liyané ora éntuk bergaul karo dhèwèké, malah omongan waé ya ora éntuk. Wacanen 1 Korintus 5:​6, 11 lan 2 Yohanes 9-​11, terus rembugen pertanyaan iki:

• Kaya ragi sithik isa nyebar ing kabèh adonan, apa akibaté nèk wong dosa sing ora mertobat tetep ana ing jemaat?

 KESIMPULAN

Meskipun wis nggawé dosa sing gedhé, nèk bener-bener mertobat lan ora mbalèni manèh dosané, Yéhuwah gelem ngampuni.

Jawaben

• Apa manfaaté nèk ngakoni dosa karo Yéhuwah?

• Bèn dosané diampuni kudu piyé?

• Nèk wis nggawé dosa gedhé, ngapa kok kudu njaluk bantuané para pinituwa?