TIMEƔRI TIS 57
I ma txedmeḍ ddnub ameqran?
Ɣas ma tḥemmleḍ mliḥ Yahwa yerna txeddmeḍ lmeǧhud iwakken ur t-tesseḥzaneḍ ara, tikwal yezmer lḥal aţ-ţɣelṭeḍ. Acu kan, kra n ddnubat meqqrit akteṛ ɣef wiyaḍ (1 Ikurintiyen 6:9, 10). Ma txedmeḍ ddnub ameqran, ur s-qqar ara belli dayen Yahwa ur k-iḥemmel ara. Ur teţţu ara belli yezmer a k-isemmeḥ yerna a k-iɛiwen.
1. D acu i glaq a nexdem bac a ɣ-isemmeḥ Yahwa?
Wid i gḥemmlen Yahwa ḥezznen mliḥ m’ara d-rren s lexbaṛ belli xedmen ddnub ameqran. Meɛna yeţṣebbir-iten lweɛd-agi n Yahwa: “Ma yella ddnubat-nwen zeggwaɣit, ɣman, ad imlulen am wedfel” (Icɛaya 1:18). Ma tuben seg wul, Yahwa a sen-isemmeḥ, a sen-yesfeḍ akk ddnub-nni. Acu i d lmeɛna-s a ntub? Lmeɛna-s a nendem seg wul. Nndama-yagi a ɣ-tdemmer a neǧǧ ayen akken n diri i nxeddem, yerna a nḥellel Yahwa a ɣ-isemmeḥ. Mbeɛd, a nexdem kullec iwakken a nexḍu i ixemmimen akk-d ṭṭbayeɛ i ɣ-yewwin ɣer ddnub-nni, yerna a nexdem lmeǧhud iwakken a neddu ɛlaḥsab n lumuṛ yeṣfan n Yahwa (ɣer-ed Icɛaya 55:6, 7).
2. Amek i gessexdam Yahwa lecyux n tejmaɛt iwakken ad ɛiwnen albeɛḍ i gdenben?
Atan d acu i d-yenna Yahwa ɣef win i gxedmen ddnub ameqran: ‘Ad yessiwel i imeqranen n tejmaɛt’ (ɣer-ed Yeɛqub 5:14, 15). Lecyux ḥemmlen Yahwa, ḥemmlen daɣen ulli-ines. Sɛan ṣṣifat ilezmen iwakken ad ɛiwnen amednub ad yemṣalaḥ akk-d Yahwa (Igalatiyen 6:1).
Amek ara ɛiwnen lecyux n tejmaɛt amasiḥi i gxedmen ddnub ameqran? Sin neɣ tlata n lecyux ad ssexdmen Adlis Iqedsen bac a s-ssefhmen ayɣer d ayen n diri i gexdem. A s-fken daɣen lewṣayat ara t-iɛiwnen iwakken ur yeţţuɣal ara ɣer ddnub-nni. Ahat a s-ḍelben ur yeţcarak ara di kra n leqdic n tejmaɛt, i kra n lweqt, alamma yuɣal yesseǧhed lɛalaqa-ines akk-d Yahwa. Ma yugi ad itub umasiḥi idenben, a t-ssufɣen lecyux si tejmaɛt iwakken ad ḥarben ɣef tejmaɛt axaṭer yezmer a s-d-yawi lemḍerra.
A NNADI A NEFHEM AKTEṚ
A nwali amek i ɣ-yeţɛawan Yahwa ma nexdem ddnub ameqran, d wamek ara s-d-nbeggen ccekṛan ɣef lemɛawna-ines.
3. Ma nesteɛṛef s ddnub i nexdem, a nesseǧhed tadukli-nneɣ akk-d Yahwa
M’ara nedneb, nesseḥzan Yahwa. Ɣef wayagi i glaq a nesteɛṛef zdat-es s ddnub i nexdem w’a s-t-nini. Ɣret-ed Ahellil 32:1-5, mbeɛd hedṛet ɣef westeqsi-yagi:
-
Ayɣer ur ilaq ara a nţeffer ddnubat-nneɣ, meɛna a nesteɛṛef yis-sen zdat n Yahwa?
Akken ad yethedden lxaṭer-nneɣ, neḥwaǧ a nesteɛṛef zdat n Yahwa s ddnubat-nneɣ yerna a neḍleb lemɛawna i lecyux. Walit BIDYU-YAGI, mbeɛd hedṛet ɣef westeqsi i d-iţeddun.
-
Amek i ɛawnen lecyux gma-tneɣ Canon akken a d-yuɣal ɣer Yahwa?
Ilaq a sen-neqqar tideţ i lecyux axaṭer ţţuwekklen iwakken a ɣ-ɛiwnen. Ɣret-ed Yeɛqub 5:16, mbeɛd hedṛet ɣef westeqsi-yagi:
-
Ayɣer i sen-yeshel akteṛ i lecyux a ɣ-ɛiwnen ma neqqar-asen tideţ?
Steɛṛef s ddnub-ik, ur ţeffer acemma ɣef lecyux n tejmaɛt yerna eǧǧ Yahwa a k-iɛiwen s leḥmala.
4. Asufeɣ si tejmaɛt yeţɛawan amednub, yeţɛawan daɣen tajmaɛt
Albeɛḍ i gxedmen ddnub ameqran yerna yugi ad yetbeɛ lumuṛ n Yahwa ur yezmir ara ad yeqqim di tejmaɛt. Ɣef wayagi ara t-ssufɣen lecyux si tejmaɛt. Daɛneţţa, ur t-neţxalaḍ ara yerna ur s-nheddeṛ ara. Ɣret-ed 1 Ikurintiyen 5:6, 11 a (Ṭrejma n ddunit tajdiṭ, s tṛumit) akk-d 2 Yuḥenna 9-11, mbeɛd hedṛet ɣef yesteqsiyen-agi:
-
D acu i gḍerrun m’ara nernu iɣes n temtunt i urekti? Acu n lemḍerra i gezmer a d-yawi i tejmaɛt umednub ur ntub ara?
Aṭas i geffɣen si tejmaɛt mbeɛd uɣalen-d. Ahat qerriḥet ţṛebga-yagi i sen-yeţţunefken, meɛna tɛawen-iten akken a d-uɣalen s abrid (Ahellil 141:5). Walit BIDYU-YAGI, mbeɛd hedṛet ɣef westeqsi i d-iţeddun.
-
Asufeɣ si tejmaɛt iɛawen Sonja. Amek?
M’ara ssufɣen albeɛḍ si tejmaɛt, amek...
-
i geţɛuzzu wayagi isem n Yahwa?
-
i d-yeţbeggin wayagi belli Yahwa d aḥeqqi yerna yeččuṛ d leḥmala?
5. Yahwa yeţsemmiḥ i win ituben
Ɛisa yeḥka-d yiwet n temɛayt akken a d-yessefhem d acu i geţḥussu Yahwa m’ara itub walbeɛḍ. Ɣret-ed Luqa 15:1-7, mbeɛd hedṛet ɣef westeqsi-yagi:
-
D acu i ɣ-tesselmad temɛayt-agi ɣef Yahwa?
Ɣret-ed Ḥizqiyal 33:11, mbeɛd hedṛet ɣef westeqsi-yagi:
-
D acu i d-yesskanayen belli itub s ṣṣeḥ walbeɛḍ?
Akken i d-yeţţelhay umeksa d wulli-ines i d-yeţţelhay yid-neɣ Yahwa.
KRA QQAREN: “Lukan a sen-iniɣ i lecyux d acu i xedmeɣ, a yi-ssufɣen si tejmaɛt.”
-
D acu ara s-terreḍ i walbeɛḍ ara k-d-yinin akka?
AYEN I D-NELMED
Ma nexdem ddnub ameqran meɛna nendem seg wul yerna neṭṭef leqrar ur neţţuɣal ara a nexdem ayen n diri, Yahwa a ɣ-isemmeḥ.
A d-nesmekti
-
Ayɣer i glaq a nesteɛṛef s ddnubat-nneɣ zdat n Yahwa?
-
D acu i glaq a nexdem iwakken ad ţwasemmḥen ddnubat-nneɣ?
-
Ayɣer i glaq a neḍleb i lecyux n tejmaɛt a ɣ-ɛiwnen ma nexdem ddnub ameqran?
TZEMREḌ AŢ-ŢWALIḌ DAƔEN
Taqsiṭ n yiwen wergaz umi i d-ibeggen Yahwa ṛṛeḥma-ines akken i t-yewɛed di Icɛaya 1:18.
Asufeɣ si tejmaɛt ur yenfiɛ ara kan win akken idenben. Anwa i genfeɛ daɣen?
Pourquoi l’excommunication est une disposition pleine d’amour (La Tour de Garde, 15 avril 2015)
Kra n ixemmimen ara k-iɛiwnen a d-tessefhmeḍ i walbeɛḍ ur nelli ara d Inigi n Yahwa d acu i d asufeɣ si tejmaɛt.
“Eɛni Inagan n Yahwa ɛezzlen wid i ssufɣen neɣ yettaxxṛen si tejmaɛt?” (di jw.org)
Taqsiṭ n yiwen wergaz i gessebɛden iman-is ɣef tideţ, meɛna yuɣal ijbed-it-id Yahwa ɣur-es (wali taḥkayt Il fallait que je revienne vers Jéhovah [Ilaq-iyi a d-uɣaleɣ ɣer Yahwa]).
La Bible transforme des vies (La Tour de Garde, 1er avril 2012)
a 1 Ikurintiyen 5:6, 11 Ṭrejma n ddunit tajdiṭ, s tṛumit: Afir 6: “Ur tesɛim ara ayen swayes ara tzuxxem. Ur teẓrim ara belli cwiṭ kan n yiɣes n temtunt yessalay arekti meṛṛa?” Afir 11: “Meɛna tura uriɣ-awen bac ur teţxalaḍem ara albeɛḍ umi i tessawalem gma-tneɣ, neţţa ixeddem lɛaṛ, d aṭemmaɛ, yeţɛebbid lmeṣnuɛat, ireggem, d asekṛan neɣ d amakar, yerna ula d učči ur teţţet ara d wergaz am wagi.”
Tzemreḍ aţ-ţwaliḍ daɣen…
ISTEQSIYEN I D-IŢŢUƔALEN DIMA
Amek i sɣarayen Inagan n Yahwa Adlis Iqedsen?
M’ara teɣreḍ baṭel Adlis Iqedsen akk-d Inagan n Yahwa, tzemreḍ aţ-ţessexdmeḍ adlis-ik iqedsen w’a d-tɛerḍeḍ iɛeggalen n twacult-ik neɣ leḥbab-ik.
