Nbóra bu ta ama Jeová txeu i bu ta sforsa pa bu ka faze un kuza ki pode magua-l, alvês bu pode faze algun kuza mariadu. Má, alguns pekadu é más gravi di ki otus. (1 Coríntios 6:9, 10) Si bu faze un pekadu gravi, lenbra ma Jeová ka ta dexa di ama-u. El sta prontu pa purdua-u i pa djuda-u.

1. Kuzê ki nu debe faze pa Jeová purdua-nu?

Kes algen ki ta ama Jeová ta xinti rei di tristi óras ki es da kónta ma es faze un pekadu gravi. Má, Jeová ta konsola-s ku kel promésa li: ‘Sikrê nhos pekadu é sima skarlati, es ta biradu branku sima névi’. (Isaías 1:18) Si nu rapende di korason, Jeová ta purdua-nu. Modi ki nu ta mostra ma nu rapende? Nu ta xinti rei di tristi pamodi kel kuza mariadu ki nu faze. Pur isu, nu ta para di faze kel kuza i nu ta pidi Jeová pa purdua-nu. Dipôs, nu ta sforsa pa nu muda kel manera di pensa mariadu ô kes ábitu ki pô-nu ta faze kel pekadu. Tanbê nu ta tenta vive di akordu ku kes lei di Jeová. — Lé Isaías 55:6, 7.

2. Modi ki Jeová ta uza ansions pa djuda-nu óras ki nu faze un pekadu?

Si nu faze un pekadu gravi, Jeová ta fla-nu pa nu ‘txoma ansions di kongregason’. (Lé Tiago 5:14, 15.) Ansions ta ama Jeová i es ta ama kes algen ki ta sirbi-l. Es sta kualifikadu pa djuda-nu rekupera nos amizadi ku Jeová. — Gálatas 6:1.

Modi ki ansions ta djuda-nu si nu faze un pekadu gravi? Dôs ô três ansion ta uza testus di Bíblia pa djuda-nu odja ma kel kuza ki nu faze é mariadu. Tanbê, es ta da-nu alguns sujiston i konsedjus pa djuda-nu ka faze kel pekadu otu bês. Es pode disidi ma nu ka ta faze alguns kuza na kongregason timenti nos amizadi ku Jeová ka sta fórti. Pa proteje kongregason di kes influensia mariadu, ansions ta dizasôsia kalker algen ki faze un pekadu gravi i ki ka rapende.

 SABE MÁS

3. Konfesa nos pekadu ta djuda-nu rekupera nos amizadi ku Jeová

Kalker pekadu ki nu ta faze ta mágua Jeová. Pur isu, nu debe fla-l kuzê ki nu faze. Lé Salmo 32:1-5, i dipôs pâpia sobri kel pergunta li:

• Pamodi ki nu debe konfesa nos pekadu pa Jeová envês di tenta sukundi-s?

 4. Modi ki dizasosiason ta djuda kel algen i kongregason

Si un algen faze un pekadu gravi i el nega sigi leis di Jeová, el ka pode faze párti di kongregason más. El ta dizasosiadu i nu ka debe konvive ku el i nen pâpia ku el. Lé 1 Coríntios 5:6, 11 i 2 João 9-11, i dipôs pâpia sobri kel pergunta li:

• Sima fermentu ta fermenta masa di pon, modi ki konvive ku un algen ki peka i ki ka rapende ta influensia kongregason?

 REZUMU

Si nu faze un pekadu gravi, má nu rapende di korason i nu sta disididu na ka faze kel kuza mariadu más, Jeová ta purdua-nu.

Perguntas di rezumu

• Pamodi ki é bon nu konfesa nos pekadu pa Jeová?

• Kuzê ki nu ten ki faze pa nos pekadu purduadu?

• Si nu faze un pekadu gravi, pamodi ki é inportanti djobe ajuda di ansions?