TZOLOM 57
Kʼaru tkʼulmanq wi tattʼaneʼq saʼ jun li nimla maak?
Usta qʼaxal naqara li Jehobʼa ut naqayal qaqʼe re naq inkʼaʼ tqarahobʼtesi xchʼool wank sut nokoomaakobʼk chiru. Abʼan jalan jalanq xnimal ru li maak (1 Corintios 6:9, 10). Wi xaabʼaanu jun li nimla maak misach saʼ laachʼool naq moko xbʼaan ta aʼin li Jehobʼa inkʼaʼ chik tatxra, naraj bʼan aatenqʼankil ut xkuybʼal aamaak.
1. Kʼaru tento tqabʼaanu re naq li Jehobʼa tixkuy qamaak?
Naq junaq li naxra li Jehobʼa naxbʼaanu jun li nimla maak qʼaxal nayotʼeʼk xchʼool. Abʼan li Jehobʼa naxkʼojobʼ xchʼool rikʼin li aatin li kixye re li xtenamit: «Us ta kaqebʼ leemaak kamaʼ […] li kaqi bʼon, abʼan saq chik teʼkanaaq joʼ […] li ratzʼamke» (Isaías 1:18). Wi relik chi yaal naqayotʼ qachʼool li Jehobʼa tixkuy qamaak. Kʼaru naraj xyeebʼal xyotʼbʼal qachʼool? Naraj xyeebʼal naq tqakanabʼ xbʼaanunkil li maak li xqabʼaanu ut tqatzʼaama re li Jehobʼa naq tixkuy qamaak. Tqayal qaqʼe chi xjalbʼal qakʼaʼuxl, xkanabʼankil li yibʼ aj naʼlebʼ li xooxkʼam chi maakobʼk ut xyuʼaminkil li naxye li Jehobʼa (yaabʼasi Isaías 55:6, 7).
2. Chanru naroksi li Jehobʼa ebʼ li cheekel winq re naq tooʼeʼxtenqʼa naq nokoomaakobʼk?
Li Jehobʼa naxye re li kimaakobʼk: «Chixbʼoqaqebʼ chaq li nekeʼjolomink re li Iklees» (yaabʼasi Santiago 5:14, 15). Ebʼ li winq aʼin xaqabʼanbʼilebʼ xbʼaan li santil musiqʼej, nekeʼxra li Jehobʼa ut li xtenamit. Ut kawresinbʼilebʼ re qatenqʼankil re naq toowanq saʼ amiiwil rikʼin li Jehobʼa (Gálatas 6:1).
Chanru tooʼeʼxtenqʼa ebʼ li cheekel winq wi naqabʼaanu junaq li nimla maak? Wiibʼebʼ malaj oxibʼebʼ tooʼeʼxtenqʼa rikʼin li Santil Hu re rilbʼal naq nimla maak li xqabʼaanu. Teʼxkʼe ajwiʼ qanaʼlebʼ ut teʼxkawresi qachʼool re naq inkʼaʼ chik toomaakobʼq. Maare ebʼ li cheekel winq teʼxye qe naq inkʼaʼ chik tootzʼaqonq saʼ wiibʼ oxibʼ li naʼlebʼ li nabʼaanumank saʼ li chʼuut toj reetal tkawuuq wiʼ chik li qapaabʼal. Wi li kimaakobʼk inkʼaʼ naxyotʼ xchʼool t-isiiq saʼ qayanq re xkolbʼal li chʼuut.
QASIKʼAQ XCHAMAL LI NAʼLEBʼ
Taw ru chiʼus li naxbʼaanu li Jehobʼa re aatenqʼankil wi xatmaakobʼk ut oxloqʼaq chaawu.
3. Wi naqaye li xqabʼaanu toowanq wiʼ chik choʼq ramiiw li Jehobʼa
Yalaq kʼaru li maak naqabʼaanu naxtochʼ xchʼool li Jehobʼa joʼkan naq tento tqaye re li xqabʼaanu. Cheeyaabʼasi Salmo 32:1-5 ut chexʼaatinaq chirix li patzʼom aʼin:
-
Kʼaʼut us naq tqaye re li Jehobʼa li xqabʼaanu ut inkʼaʼ tqayal xmuqbʼal?
Naq ak xqaye re li Jehobʼa li xqabʼaanu tooxtenqʼa ajwiʼ aatinak rikʼinebʼ li cheekel winq. Cheerilaq li BʼIDEO ut chexʼaatinaq chirix li patzʼom aʼin:
-
Chanru kitenqʼaak laj Canon xbʼaanebʼ li cheekel winq re naq twanq wiʼ chik saʼ amiiwil rikʼin li Jehobʼa?
Aajel ru naq maakʼaʼ tqamuq chiruhebʼ li cheekel winq xbʼaan naq xaqabʼanbʼilebʼ re qatenqʼankil. Cheeyaabʼasi Santiago 5:16 ut chexʼaatinaq chirix li patzʼom aʼin:
-
Kʼaʼut moko tchʼaʼajkoʼq ta chiruhebʼ li cheekel winq qatenqʼankil wi maakʼaʼ naqamuq chiruhebʼ?
Ye li maak li xaabʼaanu, maakʼaʼ chaamuq chiruhebʼ li cheekel winq ut kʼulubʼa li xtenqʼ li Jehobʼa.
4. Ani aj e li usilal naq naʼisiik laj maak saʼ li chʼuut?
Wi junaq namaakobʼk ut inkʼaʼ naxjal xnaʼlebʼ moko naru ta chik nawank saʼ li chʼuut, joʼkan naq naʼisiik. Joʼkan ajwiʼ, naqakanabʼ rochbʼeninkil ut inkʼaʼ chik nokooʼaatinak rikʼin. Cheeyaabʼasi 1 Corintios 5:6, 11 ut 2 Juan 9-11 ut chexʼaatinaq chirix li patzʼom aʼin:
-
Wi bʼayaq li yu naxpoʼ chixjunil li qʼem, kʼaru tkʼulmanq saʼ li chʼuut wi inkʼaʼ naqakanabʼ rochbʼeninkil li inkʼaʼ naraj xjalbʼal xnaʼlebʼ? Kʼaʼut?
Naabʼalebʼ li xeʼisiik saʼ li chʼuut xeʼsutqʼiik wiʼ chik, kʼaʼut? Xbʼaan naq usta ra li qʼuseʼk li xeʼxkʼul aʼin kitenqʼank rehebʼ re naq teʼxtaw wiʼ chik xnaʼlebʼ (Salmo 141:5). Cheerilaq li BʼIDEO ut chexʼaatinaq chirix ebʼ li patzʼom aʼin:
-
Chanru kitenqʼaak li xSonia naq kiʼisiik saʼ li chʼuut?
Chanru naq risinkil li namaakobʼk saʼ li chʼuut...
-
... naxkʼe xloqʼal li xkʼabʼaʼ li Jehobʼa?
-
... naxkʼutbʼesi naq li Jehobʼa chaabʼil ut nokooxra?
5. Wi naqayotʼ qachʼool li Jehobʼa tixkuy qamaak
Li Jesús kiroksi jun li jaljokil ru aatin re xkʼutbʼesinkil kʼaru narekʼa li Jehobʼa naq jun laj maak naxyotʼ xchʼool. Cheeyaabʼasi Lucas 15:1-7 ut chexʼaatinaq chirix li patzʼom aʼin:
-
Kʼaru naqatzol chirix li Jehobʼa saʼ li jaljokil ru aatin aʼin?
Cheeyaabʼasi Ezequiel 33:11 ut chexʼaatinaq chirix li patzʼom aʼin:
-
Kʼaru li naʼlebʼ tento tqabʼaanu re xkʼutbʼal naq xqayotʼ qachʼool?
Joʼ laj ilol ketomq li Jehobʼa naxkʼe ajwiʼ xchʼool chirixebʼ li xkarneer.
WIIBʼ OXIBʼ NEKEʼXYE: «Ninxiwak xyeebʼal rehebʼ li cheekel winq li xinbʼaanu xbʼaan naq maare tineʼrisi saʼ li chʼuut».
-
Kʼaru raj taaye re li nakʼoxlak chi joʼkan?
LI AK XQATZOL
Wi xqabʼaanu junaq li nimla maak abʼan naqayotʼ qachʼool ut chʼolchʼo chiqu naq inkʼaʼ chik tqabʼaanu li Jehobʼa tixkuy qamaak.
Qajultikaq
-
Kʼaʼut us naq tqaye re li Jehobʼa li maak li xqabʼaanu?
-
Kʼaru tento tqabʼaanu re naq li Jehobʼa tixkuy qamaak?
-
Wi xqabʼaanu junaq li nimla maak, kʼaʼut tento tqapatzʼ qatenqʼ rehebʼ li cheekel winq?
SIKʼ XKOMON LI NAʼLEBʼ
Kʼe reetal chanru li Jehobʼa kiruxtaana ru jun li winq joʼ naxye saʼ Isaías 1:18.
Kʼaru rusilal naxkʼam chaq naq naʼisiik junaq saʼ li chʼuut?
«Nakʼutbʼesimank li rahok naq naʼisiik junaq saʼ li chʼuut» (Laj Kʼaakʼalehom, 15 re abril 2015)
Tzol chanru xchʼolobʼankil chiru junaq li maawaʼ aj Testiiw kʼaʼut naʼisimank junaq saʼ li chʼuut.
Kʼe reetal chanru jun li winq kirekʼa naq li Jehobʼa yook wiʼ chik chi xbʼoqbʼal saʼ li yaal saʼ li resil xyuʼam «Aajel ru naq tinsutqʼiiq wiʼ chik rikʼin li Jehobʼa».
«Li Santil Hu kixjalebʼ xyuʼam» (Laj Kʼaakʼalehom, 1 re abril 2012)
Maare twulaq ajwiʼ chaawu
LI NAPATZʼMANK CHI RAJLAL
Chanru nekeʼxkʼe li tzolok chirix li Santil Hu ebʼ laj testiiw re li Jehobʼa?
Rikʼin li tzolok li nekeʼxkʼe ebʼ laj Testiiw naru nakaawoksi yalaq kʼaru chi Santil Hu. Naru nakateʼrochbʼeni ebʼ laawamiiw malaj ebʼ laakomon.
