Ata nge ke zolaka Yehowa mingi mpenza mpi ke salaka yonso sambu nge sala ve ata kima mosi ya ta pesa yandi mpasi, bantangu ya nkaka nge lenda sala mpi masumu. Kansi masumu ya nkaka ke vandaka nene kuluta ya nkaka. (1 Bakorinto 6:9, 10) Kana nge me sala disumu ya nene, kuyindula ve nde pana imene Yehowa ta zola nge diaka ve. Yandi kele ya kuyilama sambu na kulolula nge mpi kusadisa nge.

1. Inki beto fwete sala sambu Yehowa kulolula masumu na beto?

Bantu yina ke zolaka Yehowa ke waka mpasi mingi kana bo me sala disumu ya nene. Kansi mambu yai ya Yehowa songaka bansadi na yandi ke pesaka bo kikesa: “Ata masumu na beno kele mbwaki bonso menga, yo ta kuma mpembe bonso neige.” (Yezaya 1:18, noti na nsi ya lutiti) Kana beto me balula ntima na masonga yonso, Yehowa ta lolula beto na ntima ya mvimba. Inki beto fwete sala sambu na kubalula ntima? Beto fwete wa mawa mingi sambu na disumu ya beto me sala, kuyambula kusala disumu yango mpi kubondila Yehowa na kulolula beto. Na nima, beto fwete sala yonso sambu na kuyambula bangindu to bikalulu ya mbi yina nataka beto na kusala disumu yango mpi beto fwete sala bikesa sambu na kuzitisa bansiku ya Yehowa.—Tanga Yezaya 55:6, 7.

2. Kana beto me sala disumu ya nene, nki mpila Yehowa ke sadisaka beto na nzila ya bankuluntu?

Kana beto me sala disumu ya nene, Yehowa ke lombaka beto na ‘kubinga bankuluntu ya dibundu.’ (Tanga Yakobo 5:14, 15.) Babakala yai ya Yehowa me ponaka ke zolaka yandi mpi mameme na yandi. Bo ke zabaka mbote mutindu ya kusadisa beto na kuvutukila kinduku na beto ti Yehowa.—Bagalatia 6:1.

Inki mutindu bankuluntu ke sadisaka beto kana beto me sala disumu ya nene? Bankuluntu zole to tatu ke sadilaka Biblia sambu na kusadisa beto na kubakisa mbi yina beto me sala. Diaka, bo ke pesaka beto bandongisila ya mfunu mpi ke songaka beto mambu ya beto fwete sala sambu beto sala diaka ve disumu yango. Bo lenda buyisa beto na kusala mambu ya nkaka na dibundu tii ntangu kinduku na beto ti Yehowa ta kuma diaka ngolo. Bankuluntu ke basisaka na dibundu muntu yina me sala disumu ya nene mpi me balula ve ntima sambu yandi pusa ve bampangi ya nkaka na dibundu na kusala mpi masumu.

 LONGUKA MAMBU MINGI

3. Kufunguna masumu ke yidikaka kinduku na beto ti Yehowa

Konso disumu yina beto ke salaka ke pesaka Yehowa mpasi, yo yina beto fwete funguna yo na yandi. Beno tanga Nkunga 32:1-5 mpi na nima beno pesa mvutu na ngiufula yai:

• Sambu na nki beto fwete funguna masumu na beto na Yehowa kansi ve kusosa kubumba yo?

 4. Sambu na nki kubasisa muntu na dibundu kele mfunu?

Kana muntu mosi ya me sala disumu ya nene ke buya kuzitisa bansiku ya Yehowa, bo fwete basisa yandi na dibundu. Kana bo me basisa yandi na dibundu, beto fwete lutisa diaka ve ntangu ti yandi mpi beto fwete solula diaka ve ti yandi. Beno tanga 1 Bakorinto 5:6, 11 mpi 2 Yoane 9-11. Na nima beno pesa mvutu na ngiufula yai:

• Kaka mutindu levire ke vimbisaka pate ya mampa, mutindu mosi mpi kulutisa ntangu ti muntu yina me sala disumu mpi me balula ve ntima kele kibeni kigonsa sambu na dibundu. Sambu na nki?

 NA BUNKUFI

Kana beto me sala disumu ya nene kansi beto me wa mpenza mawa mpi beto me baka lukanu ya kusala yo diaka ve, Yehowa ta lolula beto.

Inki Nge Me Simba?

• Sambu na nki beto fwete funguna masumu na beto na Yehowa?

• Inki beto fwete sala sambu Yehowa kulolula masumu na beto?

• Kana beto me sala disumu ya nene, sambu na nki beto fwete sosa lusadisu na bankuluntu?