DERS 57

Eger Ez Gunehekî Giran Bikim, Gerek Ez Çi Bikim?

LÊDE

Bê guman tu ji Yehowa pir hez dikî û qet naxwazî bi kirinên xwe dilê wî biêşînî. Dîsa jî em însan in û carinan gunehan dikin. Lê hin guneh ji gunehên din girantir in (1. Korîntî 6:9, 10). Eger te gunehekî giran kiribe, bîne bîra xwe ku Yehowa hê jî ji te hez dike. Ew hazir e ku te efû bike û alî te bike.

1. Ji bo ku Yehowa gunehên me efû bike, gerek em çi bikin?

Yê ku ji Yehowa hez dike, gava gunehekî giran dike, pir xemgîn dibe. Lê Yehowa bi van gotinên xweş êşa dilê me sivik dike: “Gunehên we bi xwînê sor jî bûbin, wê wekî berfê spî bibin” (Îşaya 1:18, Mizgînî). Eger em ji dil tobe bikin, Yehowa wê me bi temamî efû bike. Gelo tobekirin çi ye? Gava em tobe dikin, em ji kirinên xwe yên xerab ji dil poşman dibin, dev ji wan berdidin û ji Yehowa rica dikin ku ew me efû bike. Dû re, em pir xîret dikin ku dev ji fikrên şaş û adetên xerab berdin, çimkî ew bûne sebeb ku em guneh bikin. Wekî din, em xîret dikin ku dîsa li gor qanûnên Yehowa bimeşin (Îşaya 55:6, 7 bixwîne).

2. Gava em guneh dikin, Yehowa çawa bi destê rîspiyan alî me dike?

Eger me gunehekî giran kiribe, Yehowa dixwaze ku em gazî rîspiyên civatê bikin (Aqûb 5:14, 15 bixwîne). Rîspî ji Yehowa û xizmetkarên wî pir hez dikin. Wan perwerdehî standiye ku alî me bikin. Bi alîkariya wan, em dikarin dîsa li Yehowa vegerin û bibin dostên wî (Galatî 6:1).

Eger em gunehekî giran bikin, rîspî wê çawa alî me bikin? Du yan sê rîspî wê me bi destê Kitêba Pîroz serrast bikin. Ewê şîretên baş bidin me û dilê me xurt bikin ku em eynî gunehî dîsa nekin. Heta ku dostaniya me ya bi Yehowa re dîsa ava bibe, belkî rîspî qerarê bidin ku em ji bo wextekê di civatê de hin wezîfeyan nekin. Ji bo ku civat ji tesîreke xerab bê parastin, rîspî kesên ku gunehekî giran dikin û tobe nakin ji civatê derdixin.

HÛR Û KÛR BIFIKIRE

Eger em gunehekî giran bikin, gelo Yehowa wê çawa destê alîkariyê dirêjî me bike?

3. Îtirafkirin dermanê dilê me ye

Her gunehê ku em dikin, dilê Yehowa diêşîne. Loma gerek em gunehên xwe ji wî re îtiraf bikin. Zebûr 32:1-5 bixwîne û li ser vê pirsê sohbetê bikin:

Çima baştir e ku em gunehên xwe veneşêrin û ji Yehowa re îtiraf bikin?

Piştî ku em gunehên xwe ji Yehowa re îtiraf dikin, çima muhîm e ku em alîkariyê ji rîspiyan bixwazin? VÎDEOYÊ vêxe û li ser vê pirsê sohbetê bikin:

VÎDEO: “Xudan Wî Yê ku Jê Hez Dike, Edeb Dike” (3:01)

Rîspiyan çawa alî birayê me kir ku ew li Yehowa vegere?

Ji bo ku rîspî bikarin alî me bikin, gerek em bi wan re rast û durist bin. Aqûb 5:16 bixwîne û li ser vê pirsê sohbetê bikin:

Rîspî, ji bo ku bikarin bi awayekî baş alî me bikin, çima gerek em bi wan re rast rûnin û rast xeber bidin?

Gunehê xwe îtiraf bike, bi rîspiyan re rast û durist be û alîkariya Yehowa qebûl bike

4. Derxistina ji civatê ji bo xêra her kesî ye

Eger kesek gunehekî giran bike û nexwaze li gor qanûnên Yehowa bimeşe, ew nikare wek ferdekî civatê bimîne. Yanî ew ji civatê tê derxistin. Loma em wexta xwe pê re derbas nakin û pê re xeber nadin jî. 1. Korîntî 5:6, 11 û 2. Yûhenna 9-11 bixwîne û li ser vê pirsê sohbetê bikin:

Piçek hevîrtirş temamiya hevîr tirş dike. Bi eynî awayî, gunehkarekî ku tobe nake tesîreke çawa li civatê dike?

Gelek kesên ku ji civatê hatibûn derxistin dîsa vegeriyan civatê. Gelo çima? Çimkî terbiye her çi qas dilêş bû jî, alî wan kir ku ew werin ser hişê xwe (Zebûr 141:5). VÎDEOYÊ vêxe û li ser van pirsan sohbetê bikin: