ERISOMO 57
Kandi Ibwa Wamakolha Erilholho Erikalire?
Nomwakine indi wanzire Yehova ya kutsibu kandi wukalengaho eriyihighulha okw’ikolha ekyosi-kyosi ekyanga muhithania, okwa bundi buthuku wangana halya. Aliwe, awandi malholho akalire okwa wandi. (1 Abanya Korinto 6:9, 10) Wamakolha erilholho erikalire, ambi iwibuka ngoku Yehova akinakwanzire; anayitheghekire erikughanyira n’erikuwathikya.
1. Thutholere ithwakolhaki Yehova erithughanyira?
Abanzire Yehova bakayowa nabi kutsibu bakaminya ku babirikolha erilholho erikalire. Aliwe bakabana erihumulikanibwa omwa kya Yehova alhaghanisaya abandu biwe: ‘Nomo ebibi byenyu byangabya ng’engulha, byasyabya byeru ng’enzururu.’ (Isaya 1:18) Thwamayisubamo erilhua okwa muthima, Yehova iniakendi thughanyira ndeke. Thukayisubamo thuthi? Busana n’eriyikubya bwomo, thukaleka ekibi kandi ithwalemba-lemba Yehova thuthi athughanyire. Neryo thukalengaho kutsibu erihindulha amalengekania kutse emitse mibi eyaleka ithwakolha erilholho, n’erilengaho erighendera okwa bihano bya Yehova ebihenirye.—Soma Isaya 55:6, 7.
2. Yehova akakolesaya athi abasyakulhu erithuwathikya thwamakolha erilholho?
Thwamakolha erilholho erikalire, Yehova akathubwira athi ‘thubirikire abakulhu [abasyakulhu] b’ekanisa.’ (Soma Yakobo 5:14, 15.) Abalhume abasombwerwe aba banzire Yehova n’esyombuli siwe. Babirithendekwa ndeke erithuwathikya erisuba-subania obughuma bwethu na Yehova.—Abanya Galatia 6:1.
Abasyakulhu bakathuwathikaya bathi thwamakolha erilholho erikalire? Abasyakulhu babiri kutse basathu ibakendi thuhengulha, omw’ikolesya erihabulha eriseghemere okwa Masako. Kandi ibakendi thuha amenge n’erihabulha ebyanga thuwathikya eriyihighulha okw’ithasyakolha erilholho. Bangana thw’imania okw’isangira omwa mibiiri mirebe y’Ekikristayo ahabw’obuthuku bulebe erihika aho thukendi lhamira bunyakirimu. Abasyakulhu bakahighitha owosi-wosi oyukakolha erilholho erikalire, oyukaghana eriyisubamo, nuku syatsandaye abandi omwa kithunga.
THASYIGHA BINGYI
Ongera erisima emibere Yehova akathuwathikirayamo thwamakolha erilholho erikalire.
3. Eribisulha erilholho lyethu kikathuwathikaya erilhama
Erilholho lyosi-lyosi erya thukakolha likahamba oku Yehova, neryo kihikire erimubwiralyo. Soma Esyonyimbo 32:1-5, mwanakania okwa kibulyo kino:
-
Busana naki ni kibuya ithwe eribwira Yehova y’amalholho wethu omwakanya k’erianza eribisiriragho?
Eryongera okw’ibwira Yehova y’amalholho wethu, thukabana erithekana thwamasondya obuwathikya okwa basyakulhu. Mubughaye EVIDIYO, mwanakania okwa kibulyo ekikakwamako.
-
Omo vidiyo, abasyakulhu mubawathikya bathi Canon erisuba oku Yehova?
Thutholere ithwabya b’okwenene n’eribwira abasyakulhu b’ebyosi; baliho erithuwathikya. Soma Yakobo 5:16, mwanakania okwa kibulyo kino:
-
Eribya b’okwenene kikaleka kithi ikyolhobera abasyakulhu erithuwathikya?
Bisulha erilholho lyawu, ibya w’okwenene embere sy’abasyakulhu, kandi ligha obuwathikya bwa Yehova obw’olhwanzo
4. Ngoku erihighitha likawathikaya
Oyuwabirikolha erilholho erikalire amaghana erighendera okwa bihano bya Yehova, iniakendi lhusibwa omwa kithunga. Akahighithawa, kandi sithwanga thasyakolongana nayu kutse nibya erikania nayu. Soma 1 Abanya Korinto 5:6, 11 na 2 Yoane 9-11, mwanakania okwa kibulyo kino:
-
Ngoku ekihamya kikanabimbaya omukanyu w’omuggati, erikolongana n’omukolha-nabi oyutheyisubamo kyanga hamba kithi okwa kithunga?
Abangyi ababirihighithwa babirisuba omwa kithunga busana n’erikungwa, kandi nomwakine indi mulyabalethera obulhumi, mulyaleka ibayisubamo. (Esyonyimbo 141:5) Mubughaye EVIDIYO, mwanakania okwa kibulyo ekikakwamako.
-
Omo vidiyo, erihighithwa mulyawathikya lithi Sonja?
Endegheka y’erihighitha . . .
-
yikaha yithi erina lya Yehova ly’ekitsumbi?
-
yikakanganaya yithi ngoku Yehova ni w’obuyitheghererya kandi ow’olhwanzo?
5. Yehova akathubuyira thukayisubamo
Yesu mwakolesya omusyo owakathuwathikaya eriyitheghererya Yehova ng’akayowa athi omundu akayisubamo. Soma Luka 15:1-7, mwanakania okwa kibulyo kino:
-
Eki kikakweghesayaki oku Yehova?
Soma Ezekieli 33:11, mwanakania okwa kibulyo kino:
-
Ni kiika kyahi kikulhu ekikayithaghisibawa omw’iyisubamo?
Ng’omulisya, Yehova akatsomana kutsibu esyombuli siwe
ABANDI BAKABUGHA BATHI: “Ngasagha indi namabwira abasyakulhu b’erilholho lyaghe, iningendi highithwa.”
-
Ni kyahi ekya wanga bwira omundu oyukayowa athya?
OMWA BIKUHI
Thwamakolha erilholho erikalire aliwe thukayikubyabwomo thukathwamu erileka ekibi ekyo, Yehova iniakendi thughanyira.
Eriyibukya
-
Busana naki ni kibuya ithwe eribwira Yehova y’amalholho wethu?
-
Ni byahi ebya thutholere ithwakolha nuku ebibi byethu bighanyirawe?
-
Thwamakolha erilholho erikalire, busana naki thutholere ithwasondya obuwathikya bw’abasyakulhu?
MINYA BINGYI
Lebaya ngoku omulhume mughuma ayilhangirira erighanyira lya Yehova eriri omu Isaya 1:18.
Endegheka y’erihighitha yanga wathikya yithi obuli mundu oyuhambirweko?
“Ekikaleka Erihighithwa Iyabya Ini Mitheghekere y’Olhwanzo” (Akaleberyo, Okwakani 1, 2015)
Minya ngoku wanga soborera oyuthe Mwema endegheka y’erihighitha.
“Mbwino Abema ba Yehova Bakayihighulha Okwa Banabya omo Dini Yabu?” (Omwatsi okwa muthahulha)
Omo mwatsi “Munayithagha Erisuba oku Yehova,” minya ekyaleka omulhume oyuwayisununulha okwa kwenene iniayowa Yehova iniabirithasyamuletha okw’iyo.
“E Biblia Yikahindulha Esyongebe” (The Watchtower, Okwakani 1, 2012)
