Finne kom luhngse na pwacye Jeova ac kom kwacfeacng in tiac oruh ma ac ahkahsoryacl, kom srackna oruh ma tahfonglac kais kuhtuh pacl. Tuhsruhktuh, kuhtuh ma tahfonglac uh upac liki ma sahyac uh. (1 Corinth 6:9, 10) Kom fin oruh sie ma koluk upac, esam lah Jeova el srackna luhngse kom; ac el luhngse in nuhnak muhnahs nuh sum ac kahsre kom.

1. Meac kuht enenuh in oruh tuh fah eis nuhnak muhnahs luhn Jeova?

Ke pacl se mwet suc luhngse Jeova uh oruh ma koluk upac, elos arlacna ahsor. Tuhsruhktuh, sie mwe ahkkweye ma Jeova el wuhlelah inge nuh sin mwet lal uh: “Kowos tuhn sruhsrahlah ke ma koluk lowos, tuhsruhktuh nga fah oulkowosla in fasrfasr oacna snow.” (Isaiah 1:18) Kuht fin auliyak na pwacye, Jeova el ac fah nuhnak muhnahs nuh sesr. Kuht ac ahkkahlwemye fuhkah lah kuht auliyak? Kuht fin ahsor yohk na pwacye ke ma kuht oruh, kuht ac tui in oruh ma koluk ac siyuck nuhnak muhnahs sin Jeova. Kuht kwacfeacng pac in ekuhllah nuhnak koluk kuh orekma ma kol nuhke ma koluk lasr, ac kuht kwacfeacng in moulkihn moul fal nuhke oakwuck fuhlwact luhn Jeova ke moul nwacsnwacs.​—Riti Isaiah 55:6, 7.

2. Jeova el orekmakihn fuhkah mwet elder uh in kahsre kuht ke pacl kuht oruh ma koluk?

Kuht fin oruh sie ma koluk upac, Jeova el fahk nuh sesr in “pahngon mwet elder ke congregation.” (Riti James 5:14, 15, NW.) Mwet elder inge luhngse Jeova ac luhngse mwet suc kuhlwacnsuhpwacl. Elos kuh in kahsre kuht in sifwilpac ahkwoye fototo wo lasr nuh sin Jeova, mweyen elos lutiyuck in oruh ma inge.​—Galatia 6:1.

Mwet elder uh kahsre kuht fuhkah kuht fin oruh sie ma koluk upac? Elder luo kuh tolu ac fah orekmakihn Bible in ahksuwohsye kuht. Elos ac fah acse nuh sesr kahs in ahkkweye ac kahs in kahsruh ke ma kuht kuh in oruh in tiac sulpac oruh ma koluk lasr. Elos ac kuh in sulaclah lah kuht tiac kuh in oruh kuhtuh ma ke congregation ke lusen pacl se, nwe ke fototo lasr nuh sin Jeova sifwilpac kuhi. Fin sie mwet suc oruh ma koluk upac el tiacna auliyak, mwet elder uh ac fah sisuhllah tuh elan tiac ahkkulukye mwet sahyac ke congregation.

 AHKYOHKYE LUTLUT LOM

3. Yohk kahsruh kuht fin fahkwacng ma koluk lasr uh

Jeova el ngalyak kuht fin oruh ma koluk, pwacnacng fal kuht in fahkwack nuh sel kac. Riti Psalm 32:1-5, ac tohkohyang sramsramkihn kihsen siyuck se inge:

• Efuh arlacna wo nuh sesr in fahkwack nuh sin Jeova ma koluk lasr liki na in srihke in okanlah ma inge?

 4. Oakwuck in sisilac ac kahsruh fuhkah

Fin sie mwet suc oraclah ma koluk upac el srackna sruhnga in ahkos oakwuck luhn Jeova, el tiac sifwil oacoac muh el srackna wi congregation. El ac fah sisilac, ac kuht ac tilac asruoki nuh sel, kuh kuht tiac pac sramsram nuh sel. Riti 1 Corinth 5:6, 11 ac 2 John 9-11, ac tohkohyang sramsramkihn kihsen siyuck se inge:

• In oacna mwe ahkpulohl oruh bread se in pulohlwack, asruoki yurin mwet suc oruh ma koluk suc tiac auliyak kuh in ahkkulukye congregation fuhkah?

 MA KUHT LOTWELAH

Kuht fin oruh ma koluk upac, Jeova el ac nuhnak muhnahs nuh sesr kuht fin auliyak na pwacye ac kwacfeacng in tiac sifwil oruh ohinge.

Kalweni

• Efuh arlacna wo nuh sesr in fahkwack ma koluk lasr nuh sin Jeova?

• Meac kuht enenuh in oruh tuh Jeova elan nuhnak muhnahs ke ma koluk lasr uh?

• Kuht fin oruh ma koluk upac, efuh kuht enenuh in suk kahsruh sin mwet elder uh?