LUFUNJISHO 57
Mwafwainwa Kuba Byepi Inge Mwalenga Mambo Akatampe?
Nangwa kya kuba Yehoba mwamutemwa kabiji mwibikako bingi kubula kuba bintu byatama byafwainwa kumukozha ku muchima, bimye bimo mukalubankanyanga. Nangwa byonkabyo, mambo amo abayisha kukila akwabo. (1 Kolinda 6:9, 10) Inge mwalenga mambo akatampe, vulukai’mba Yehoba kechi waleka kwimutemwa ne, aye wipana kwimulekelako mambo enu ne kwimukwasha.
1. Ñanyi bintu byo twafwainwa kuba pa kuba’mba Yehoba etulekeleko mambo?
Bantu batemwa Yehoba kibakola bingi ku muchima inge balenga mambo akatampe. Pano bino, Yehoba wibatekenesha bingi na uno mulaye wa kuba’mba: “Nangwa kya kuba mambo enu achilatu ngee nobe mashi, akatokatu too nobe mabebe.” (Isaya 1:18) Inge twalapila na muchima yense, Yehoba uketulekelako mambo etu kikupu. Nanchi tulapila byepi? Twafwainwa kumvwa kutama ku muchima pa kintu kyo twauba ne kuja nyenye ne kulomba kwi Yehoba kwitulekelako mambo. Inge twauba bino, twafwainwa kupimpula byubilo byetu nangwa kusankilapo muteeto umo witulengejile kulenga mambo. Kabiji twafwainwa kulondelanga mizhilo yaoloka ya Yehoba mu bwikalo bwetu.—Tangai Isaya 55:6, 7.
2. Yehoba wingijisha byepi bakulumpe mu kipwilo kwitukwasha inge twalenga mambo?
Inge twalenga mambo akatampe, Yehoba witubuula’mba ‘twite bakulumpe mu kipwilo.’ (Tangai Yakoba 5:14, 15.) Abano bakulumpe mu kipwilo batemwa bingi Yehoba kabiji batemwa ne boba bamwingijila. Bebafunjisha byo bafwainwa kwitukwasha pa kuba’mba twikale jibiji na bulunda bwawama ne Yehoba.—Ngalatiya 6:1.
Nanchi bakulumpe mu kipwilo betukwasha byepi inge twalenga mambo akatampe? Bakulumpe mu kipwilo babiji nangwa basatu baketukwasha kwingijisha Binembelo ne kwitulumbulwila kuba’mba kintu kyo twaubile kyatama bingi. Kabiji baketubuula mashinda awama ne kwitujimunako pa kuba’mba tukabule kubwezhapo kulenga mambo. Bakonsha kufuukulapo kuba’mba tuleke kwingilangako mingilo imo mu kipwilo posotu ne byo tukakosesha jibiji bulunda bwetu ne Yehoba. Kabiji inge muntu walenga mambo akatampe wabula kulapila, bakulumpe mu kipwilo bakamupanga mu kipwilo pa kuba’mba abule kongola bakwabo bashala.
FUNJILAIPO BIKWABO
Sanchilainga Yehoba pa byo etukwasha inge twalenga mambo akatampe.
3. Kuswa’mba twalenga mambo kwitukwasha kuwamisha jibiji bulunda bwetu ne Yehoba
Mambo onse o tulenga akozha bingi Yehoba ku muchima. Onkao mambo, twafwainwa kwiasolola kwi aye. Tangai Salamo 32:1-5, ne kwisamba buno bwipuzho:
-
Mambo ka o kyawamina atweba kusolola mambo etu kwi Yehoba kukila kufya?
Inge twasolola mambo etu kwi Yehoba ne ku bakulumpe mu kipwilo, tukekala na jiwi ja mu muchima jatooka. Tambai VIDYO, ne kwisamba buno bwipuzho.
-
Mu vidyo ye mwatamba, bakulumpe mu kipwilo bakwashishe byepi Canon kubwela kwi Yehoba?
Kechi twafwainwa kufya bakulumpe mu kipwilo mambo onse o twalenga ne. Abo baikelako kwitukwasha. Tangai Yakoba 5:16, ne kwisamba buno bwipuzho:
-
Mambo ka o kipeelela bakulumpe mu kipwilo kwitukwasha inge twibabuula byonsetu byo twaubile kwa kubula kufya?
Sololai mambo o mwalenga ne kubuula bakulumpe mu kipwilo bintu byonsetu kabiji swai bukwasho bwa Yehoba
4. Kupanga muntu mu kipwilo kumukwasha ne kipwilo pamo
Inge muntu walengele mambo akatampe wakana kulondela mikambizho ya Yehoba, ko kuba’mba kechi wafwainwa kwikala mu kipwilo ne. Bafwainwa kumupanga mu kipwilo kabiji kechi twafwainwa kupwanañananga nanji nangwatu kwisamba nanji ne. Tangai 1 Kolinda 5:6, 11 ne 2 Yoano 9-11, ne kwisamba buno bwipuzho:
-
Byonkatu mbizho byo itutumusha muvuba wa shinkwa, kupwanañana na muntu wabula kulapila kwakonsha kutamisha byepi kipwilo?
Bantu bavula bo bapangapo kala mu kipwilo babwela mu kipwilo. Nangwa kibakolele bingi ku muchima pa kwibapanga, kino kibakwasha kuyuka’mba kintu kyo baubile kyatamine bingi. (Salamo 141:5) Tambai VIDYO, ne kwisamba buno bwipuzho:
-
Mu uno vidyo ye mwatamba, kupanga Sonja mu kipwilo kwamukwashishe byepi?
Nanchi kupanga muntu mu kipwilo . . .
-
kuzhijika jizhina ja Yehoba nyi?
-
kumwesha’mba Yehoba wawama kabiji wa butemwe nyi?
5. Yehoba witulekelako mambo inge twalapila
Yesu waingijishe kishimpi kitukwasha kuyuka Yehoba byo omvwa ku muchima inge muntu walapila. Tangai Luka 15:1-7, ne kwisamba buno bwipuzho:
-
Akino kimufunjishapo ñanyi kintu pe Yehoba?
Tangai Ezikyo 33:11, ne kwisamba buno bwipuzho:
-
Twafwainwa kuba byepi kumwesha’mba kine twalapila?
Byonkatu byuba kafunga, Yehoba wata bingi muchima mikooko yanji
BANTU BAMO BAMBA’MBA: “Amiwa naakamwa bingi mambo inge mbuule bakulumpe mu kipwilo mambo o nalenga, basakumpanga.”
-
Mwafwainwa kukwasha byepi muntu ulanguluka bino?
ÑANYI BISHINKA BYO MWAFUNDA?
Inge twalenga mambo akatampe kabiji twalapila ne kubula kubwezhapo, Yehoba uketulekelako mambo etu.
Mepuzho a kupitulukamo
-
Mambo ka o kyawamina atweba kusolola mambo etu kwi Yehoba?
-
Ñanyi kintu kyo twafwainwa kuba pa kuba’mba Yehoba etulekeleko mambo etu?
-
Mambo ka o twafwainwa kwisolwela ku bakulumpe mu kipwilo inge twalenga mambo akatampe?
KEBAI BISHINKA BIKWABO
Monai mwanamulume umo byo bamubijile lusa kwi Yehoba byonkatu byaamba Isaya 1:18.
Kupanga muntu walenga mambo mu kipwilo kumukwasha byepi?
“Kupanga Muntu mu Kipwilo Kumwesha Byepi Butemwe?” (Kyamba kya Usopa, April 15, 2015)
Yukai byo mwafwainwa kulumbulwila muntu wabula Kamonyi ene mambo muntu walenga mambo o bamupangila mu kipwilo.
“Nanchi Muchinuzhuka bo Mwajinga Nabo mu Bupopweshi Nyi?” (Kibaaba kiji pa jw.org)
Mu jishimikila ja kuba’mba “Nakebeshe Bingi Kubwela kwi Yehoba,” monai kyalengejile mwanamulume umo wafumine mu bukine kwamba’mba Yehoba wamubwezha.
“Baibolo Upimpula Bwikalo bwa Bantu” (Kyamba kya Usopa, April 1, 2012)
Mwakonsha Kutemwa
MEPUZHO O BEPUZHA JAVULA
Lufunjisho lwa Baibolo lo lu ka?
Tanai mikumbu ya mepuzho epuzha bantu javula pa mutanchi wetu wa kufunjisha Baibolo.
