Pan ɔl we yu rili lɛk Jiova ɛn yu de tray tranga wan fɔ avɔyd ɛnitin we go mek i fil bad, wan wan tɛm yu go mek mistek dɛn. Bɔt sɔm sin dɛn de we siriɔs pas ɔda wan dɛn. (1 Kɔrintians 6:​9, 10) If yu kɔmit siriɔs sin, mɛmba se dat nɔ min se Jiova nɔ lɛk yu igen; i rɛdi fɔ fɔgiv yu ɛn ɛp yu.

1. Wetin wi fɔ du fɔ mek Jiova fɔgiv wi??

Di wan dɛn we lɛk Jiova kin rili fil bad we dɛn kɔmit siriɔs sin. Bɔt dɛn kin gɛt kɔrej frɔm wetin Jiova bin prɔmis in pipul dɛn fɔ se: “Ilɛk una sin dɛn rɛd lɛk blɔd, dɛn go wayt lɛk shatin.” (Ayzaya 1:18) If wi ripɛnt fɔ tru, Jiova go rili fɔgiv wi. Aw wi go ripɛnt? Wi go du dat bay we wi sho se wi rili sɔri fɔ di bad we wi dɔn du, lɛf fɔ du di bad ɛn beg Jiova fɔ fɔgiv wi. Dɔn wi fɔ tray tranga wan fɔ chenj di rɔng we aw wi de tink ɔ lɛf di bad abit dɛn we mek wi sin, ɛn wi fɔ tray fɔ liv wi layf di klin we aw Jiova want.​—Rid Ayzaya 55:​6, 7.

2. Aw Jiova de yuz di ɛlda dɛn fɔ ɛp wi we wi sin?

If wi kɔmit siriɔs sin, Jiova se wi fɔ “kɔl di ɛlda dɛn na di kɔngrigeshɔn.” (Rid Jems 5:​14, 15.) Dɛn man dɛn ya lɛk Jiova ɛn di wan dɛn we de sav am. Dɛn dɔn tich dɛn aw fɔ ɛp wi so dat wi go gɛt tayt padi biznɛs wit Jiova bak.​—Galeshians 6:​1.

Aw di ɛlda dɛn go ɛp wi if wi kɔmit siriɔs sin? Tu ɔ tri ɛlda dɛn go yuz skripchɔ dɛn frɔm di Baybul fɔ kɔrɛkt wi. Dɛn go ɛnkɔrej wi ɛn gi wi advays we go ɛp wi fɔ mek wi nɔ sin bak. Dɛn go mek wi nɔ tek pat pan sɔm tin dɛn na di kɔngrigeshɔn fɔ sɔm tɛm te wi gɛt tayt padi biznɛs wit Jiova bak. If pɔsin kɔmit siriɔs sin ɛn i nɔ gri fɔ ripɛnt, di ɛlda dɛn go disfɛloship am so dat i nɔ go mek ɔda pipul dɛn bigin du bad na di kɔngrigeshɔn.

 LAN MƆ

3. We wi kɔnfɛs, dat go ɛp wi

Ɛni sin we wi kɔmit de mek Jiova fil bad, so wi fɔ kɔnfɛs to am. Rid Sam 32:1-5, dɔn una tɔk bɔt dis kwɛstyɔn:

• Wetin mek i fayn fɔ mek wi kɔnfɛs wi sin dɛn to Jiova ɛn nɔ tray fɔ ayd dɛn?

 4. Aw disfɛloship de ɛp?

If pɔsin kɔmit siriɔs sin ɛn nɔ gri fɔ fala wetin Jiova se rayt ɔ rɔng, i nɔ go de pat ɔf di kɔngrigeshɔn igen. Dɛn go disfɛloship am ɛn wi nɔ go de kip kɔmpin wit da pɔsin de igen ɔ ivin tɔk to am. Rid 1 Kɔrintians 5:​6, 11 ɛn 2 Jɔn 9-​11, dɔn una tɔk bɔt dis kwɛstyɔn:

• Jɔs lɛk aw yist de mek flawa rayz, we wi spɛn tɛm wit pipul dɛn we nɔ gri fɔ ripɛnt, aw dat go afɛkt di kɔngrigeshɔn?

 WETIN YU DƆN LAN?

If wi kɔmit siriɔs sin bɔt wi rili sɔri ɛn wi mekɔp wi maynd fɔ lɛf fɔ du bad, Jiova go fɔgiv wi.

Rivyu

• Wetin mek i fayn fɔ mek wi kɔnfɛs wi sin dɛn to Jiova?

• Wetin wi nid fɔ du fɔ mek Jiova go fɔgiv wi sin dɛn?

• If wi kɔmit siriɔs sin, wetin mek wi fɔ go to di ɛlda dɛn fɔ ɛp wi?