SUƐI LEBOLII 57
Te o Yɔŋ Pɛ Ma Tosa Haki Wɔɔŋ Wɔɔŋndo
Mi che bɛɛ a kaala Chɛhowa tau ma wa kindiŋndo le sɔɔŋ tɛɛmbuu ndu kɔllo woŋ fafaŋndo, kɛ a koŋ kpou, teleŋndaŋ lapum ma tosa hakioo. Kɛ o kpeekpei niŋ, hakilaŋ lapum la cho hakila bɛɛŋ bɛɛŋ te. (1 Kɔliŋtiaŋ 6:9, 10) Te a tosa pɛ haki wɔɔŋ wɔɔŋndo, loonuŋ maa Chɛhowa kaala wɔ num kɛ. O cho o bɛɛndiaŋ le num malɔɔ haki nduyɛ mbo mala num.
1. Yɛɛ naŋ nɔ yɛ miŋ tosa le mi Chɛhowa mal naa haki?
Te wanaa kaala Chɛhowa wa tosa pɛ haki wɔɔŋ wɔɔŋndo, ma tambu kɔllo tau le nyɛ nda tosa koŋ ndo. Kɛ ma sɔla kɔl dɛɛniaa o nyɛ Chɛhowa dimul hoo wanaa nduaa wo niŋ. “Mi che bɛɛ mi yɔŋnda nyala wɔɔŋndaŋ la diu maa muufu, kɛ I cho laŋ tɔɔ, mi la dendu maa feŋgbɛ.” (Aisaya 1:18) Te ŋ tambu pɛ kɔl le nyɛ naŋ tosa wo, Chɛhowa nɔla mbo mal naa haki fasɛi. Vɛɛ naŋ chɔm yɛ maa ŋ tambu kɔl? Ŋ chɔm maa ŋ tambu kɔl te ŋ pɛŋgi pɛ suɛi wɔɔŋii keŋ tosaa, miŋ nyɔɔlu Chɛhowa le mbo mal naa haki. Okoŋ miŋ tosa wallo kalaŋ le yiyaŋndaŋ a nyɛ tosa miŋ luɛi o haki koŋ niŋndo soliŋndo o kɔl. Miŋ kindiŋ niko le hiouwɔɔ lachi a sawala Chɛhowalaŋ biyɔɔ.—Nuawɔ Aisaya 55:6, 7.
2. Vɛɛ Chɛhowa soliŋ yɛ bɛnduaa kpeku le naa malaa te ŋ tosa pɛ hakioo?
Te ŋ tosa pɛ haki wɔɔŋ wɔɔŋndo, Chɛhowa dimul naa maa naŋ “veelu bɛnduaa kundaa.” (Nuawɔ Chemisi 5:14, 15.) Puaa nda yulu haa isu wa kaala Chɛhowa a saa nduaa. A sina mɛɛ nda nɔla ma mala naa miŋ miiŋgu o chaŋyɛi kɛndɛi niŋ a Chɛhowa yɛ.—Kaleesiaŋnda 6:1.
Vɛɛ bɛnduaa kundaa mala yɛ naa te ŋ tosa pɛ haki wɔɔŋ wɔɔŋndo? Mi a ŋiɔɔŋ ɔɔ a yaa soliŋ Baabuiyo kpeku le naa malaa miŋ sina mɛɛ kpɛ suɛi naŋ tosa ve wɔu yɛ. Ma ke naa vɛlɛ kɔl dɛɛniaa a sila mala naa miŋ fafaŋ haki koŋ tosaa wo. Lepum, ma kuuna naa sɔɔŋ pum tosaa o kundaa niŋ haaa mi chaŋyɛi kɛndɛi miiŋgu naa tɛɛŋ a Chɛhowa. Kɛ mi bɛnduaa a soli vɛlɛ waŋndo o kundaa niŋ, te a che pɛ maa o kɛɛ le yɔŋ ndɔ wɔɔŋndo malɔɔ. Ma tosa hei le kundaa mandaa yɔŋii kaa ndɔ wɔɔŋndo tiu.
CHƆƆLU YAASIAA
Pɛɛku ma sina nduyɛ ma chɔɔlu balika melaa nɔ a mɛɛ Chɛhowa mala naa yɛ, te ŋ tosa pɛ haki wɔɔŋ wɔɔŋndo.
3. Hakila naalaŋ chɔɔmuuwo mala naa miŋ miiŋgu o chaŋyɛi niŋ a Chɛhowa
Mi Chɛhowa tambu kɔl te ŋ tosa pɛ haki kɛ kɛ. Lelaŋ, o ndu lo naŋ nɔ ni miŋ chɔɔmuu yɔŋ naa wɔɔŋndo. Nuawɔ Sam 32:1-5, okoŋ mi la suukaŋ o nyunaa hoo choo:
-
Le yɛɛ o bɛnda yɛ miŋ chɔɔmuu hakila naalaŋ o Chɛhowa lo, nduyɛ miŋ fafaŋ kindiŋndo le laŋ vioŋɔɔ?
O cho ko o Chɛhowa lo le naŋ nɔ miŋ chɔɔmuu hakila naalaŋ te. Ŋ nɔla vɛlɛ miŋ sɔla kɔl nyuloo te ŋ kuɛ pɛ o bɛnduaa lo le malaa. Handu VIDUEIYO, okoŋ mi la suukaŋ o nyunaa hoo choo:
-
O vidueiyo hoo niŋ, vɛɛ bɛnduaa ndaa mala yɛ Kanɔŋ?
Te ŋ kuɛ pɛ o bɛnduaa lo, ŋ nɔ miŋ sandu a nda, nduyɛ miŋ dimul nda nyɛ o nyɛ naŋ tosa. Kanifuule, le naa malaa nda cho ni. Nuawɔ Chemisi 5:16, okoŋ mi la suukaŋ o nyunaa hoo choo:
-
Te ŋ sandu pɛ a bɛnduaa, vɛɛ keŋ tosa yɛ ndi tɛtɛlɛ le ma mala naa?
Chɔɔmuu yɔŋ num wɔɔŋndo, ma dimul bɛnduaa nyɛ o nyɛ ŋ tosa, nduyɛ ma chɛl mala Chɛhowaa
4. Tɔnɔ cho le waŋndo solioo o kundaa niŋndo
Te wana tosa haki wɔɔŋ wɔɔŋndo wo kɛɛ pɛ le sila Chɛhowaa dɔwɔɔ o wali niŋ, o nɔ lɛ mbo wa o kundaa niŋ te. O nɔ mbo sɔla solioo. Nduyɛ te a soli ndu pɛ, ŋ nɔ lɛ miŋ holnuŋ ndu ɔɔ miŋ suukaŋ a ndu le. Nuawɔ 1 Kɔliŋtiaŋ 5:6, 11 a 2 Chɔŋ 9–11, okoŋ mi la suukaŋ o nyunaa hoo choo:
-
Mɛɛ yiisiiyo tosa mi kpeyaŋ nda luam beediiyo wo hindu yɛ, vɛɛ holiaŋndo a wana kɛɛ le haki ndɔɔ malɔɔ wo paaliaŋ yɛ kundaa?
Wanaa sɔla solioo wa a bɔɔbɔɔ miiŋgu niŋ o kundaa niŋ le sila nda sɔla koŋ ndo. Mi che bɛɛ silaa hoo ve bɛɛŋ te, kɛ mbo mala nda le sinaa maa, Chɛhowa niŋ kɔl a kaa nda wa choo wo le. (Sam 141:5) Handu VIDUEIYO, okoŋ mi la suukaŋ o nyunalaŋ ndaŋ choo:
-
O vidueiyo hoo niŋ, vɛɛ soli Soya sɔla wo mala yɛ ndu?
Vɛɛ kɛɛsiaa cho le waŋndo solioo o kundaa niŋndo . . .
-
tosa yɛ mi diola Chɛhowalaŋ la sɔla bɛɛleŋ?
-
chɔm yɛ maa Chɛhowa nɔ sinapɛŋgoo a kaalaa?
5. Mi Chɛhowa mal naa haki te ŋ mal pɛ yɔŋ naa wɔɔŋndo
Mi Chiisu dimi taloo le naa malaa miŋ bii bila mɛɛ Chɛhowa sinaŋ yɛ, te waŋndo mal pɛ yɔŋ ndɔ wɔɔŋndo. Nuawɔ Luku 15:1-7, okoŋ mi la suukaŋ o nyunaa hoo choo:
-
Yɛɛ nyɛ bolle Baabuileŋ le dimi wo pɛɛku yɛ num a Chɛhowa okɔɔ?
Nuawɔ Isikiaa 33:11, okoŋ mi la suukaŋ o nyunaa hoo choo:
-
Yɛɛ waŋndo nɔ yɛ mbo tosa le chɔmndo maa o tambu kɔl le yɔŋ ndɔ wɔɔŋndo?
Maa wana mandaa lasaa, Chɛhowa buulaŋ tau a saa nduaa
TE WAŊNDO DIMI PƐ AA: “Siooŋnde cho ya le bɛnduaa dimullo a haki ya tosa wo okɔɔ. Kanifuule te I dimul nda pɛ, a cho ya soli.”
-
Te waŋndo yiyaŋ pɛ lende, yɛɛ ŋ cho yɛ ndu dimul?
SƆƆŊ KULLOŊ
Te ŋ tosa pɛ haki wɔɔŋ wɔɔŋndo kɛ miŋ wookuŋ nduyɛ miŋ mal haki koŋ tosaa, mi Chɛhowa mal naa haki.
Nyunala miiŋgaa choo laŋ
-
Le yɛɛ o bɛnda yɛ miŋ chɔɔmuu yɔŋ naa wɔɔŋndo o Chɛhowa lo?
-
Yɛɛ naŋ nɔ yɛ miŋ tosa le mi Chɛhowa mal naa haki?
-
Te ŋ tosa pɛ haki wɔɔŋ wɔɔŋndo, le yɛɛ naŋ nɔ yɛ miŋ kuɛ o bɛnduaa lo?
CHƆƆLU SƆƆŊ PUM TOFA
Tofawɔ ma che mɛɛ Chɛhowa chɔm po pilɛ nyiɛɛye yɛ, a mɛɛ Aisaya 1:18 dimi yɛ.
Vɛɛ kɛɛsiaa cho a solioo okɔɔ wo mala yɛ wana o wana?
“Le Sabu Kɛɛsiaa Cho a Solioo Okɔɔ Wo Bɛnda Wo” (Bandu Mɛŋgɛlaa, Nyaakuɛiyo 15, 2015)
Tofawɔ ma che mɛɛ ŋ tɛɛsial wana cho Chɛhowa piɛi le wo sabu nda soli wana wo yɛ.
“Baa Mi Seiyaa Chɛhowaa Kɛɛ Pa Wanaa Wa Paandu o Piɛile Ndaleŋ Niŋnda?” (Kɔ o tɛɛŋgei choo)
Mi po pilɛ dimi maa mɛɛ o mal tonyaa, mi Chɛhowa chɛl ndu mbo miiŋgu ndu o ibuŋ. Tofawɔ bundɛi hei, “Yaa Nɔ Mi Miiŋgu Chɛhowa o Ibuŋ.” Okoŋ, ma che le sabu o dimi lende wo.
“Baabuiyo Siŋga Yoomulaŋ” (Bandu Mɛŋgɛlaa, Nyaakuɛiyo 1, 2012)
Naapum a Yeema Dɔɔ Vɛlɛ
NYUNALA WAŊNDA NYUNA LƆƆLƆƆ LAŊ
Yɛɛ Cho yɛ Pɛɛku Baabuiyo?
Sɔla mulilaŋ o nyunala nyunaŋ a mɛɛ naŋ tosa pɛɛku Baabui ŋ paawa nyɛ o nyɛ le wo okɔɔ wo.
