နအဲၣ်ယဟိဝၤယွၤဒိၣ်မး ဒီးဒ်သိး နသုတမၤဘၣ် တၢ်တမံၤမံၤလၢ အမၤဘၣ်ဒိအသးတဂ့ၤအဂီၢ် နဂုာ်ကျဲးစၢးလၢအဂ့ၤကတၢၢ်လံ. သနာ်က့ တဘျီတခီၣ်န့ၣ် နကမၤဘၣ်တၢ်ကမၣ် ဒီးတၢ်ကမၣ်တနီၤန့ၣ် အဒိၣ် ဒီးတနီၤန့ၣ်အဆံး. (၁ ကရံၣ်သူး ၆:​၉, ၁၀) နမ့ၢ်မၤဘၣ် တၢ်ကမၣ်ဖးဒိၣ် သနာ်က့ သ့ၣ်နီၣ်ထီၣ်လၢ ယဟိဝၤယွၤအဲၣ်နၤဒံး. အသးအိၣ်ပျၢ်နတၢ်ကမၣ် ဒီးအသးအိၣ် မၤစၢၤနၤ.

၁. ဒ်သိး ယဟိဝၤယွၤ ကပျၢ်ကွံာ် ပတၢ်ကမၣ်အဂီၢ် ပကဘၣ်မၤဒ်လဲၣ်.

ပှၤလၢအအဲၣ် ယဟိဝၤယွၤန့ၣ် ဖဲအဝဲသ့ၣ် သ့ၣ်ညါလီၤအသးလၢ အမၤဘၣ် တၢ်ကမၣ်ဖးဒိၣ်အခါ အဝဲသ့ၣ် သးအုးဒိၣ်မး. ဘၣ်ဆၣ် ကစၢ်ယွၤ မၤမုာ်ထီၣ် အဝဲသ့ၣ်အသးခီဖျိ အၢၣ်လီၤအဝဲသ့ၣ်လၢ “သုတၢ်ဒဲးဘးတဖၣ် မ့ၢ်ဂီၤဆှုၣ်ကလာ် ဘၣ်ဆၣ် အကဝါထီၣ်က့ၤဒ် မူခိၣ်ဖီအသိး.” (ယၡါယၤ ၁:၁၈) ပမ့ၢ်ပီၢ်ယၢ်လီၤက့ၤပသး နီၢ်ကီၢ်ကီၢ်န့ၣ် ယဟိဝၤယွၤ ကပျၢ်ကွံာ် ပတၢ်ကမၣ် လၢာ်လၢာ်ဆ့ဆ့. ပပီၢ်ယၢ်လီၤက့ၤပသးန့ၣ် ပပာ်ဖျါထီၣ် ကသ့ဒ်လဲၣ်. ပပာ်ဖျါထီၣ်သ့ခီဖျိ ပသးအုးဒိၣ်မး, ပတမၤ တၢ်ကမၣ်တဖၣ်န့ၣ်လၢၤဘၣ် ဒီးပဃ့ကညး ယဟိဝၤယွၤလၢ ကပျၢ်ကွံာ်ပတၢ်ကမၣ်. ဝံၤဒီးပဂုာ်ကျဲးစၢး ဆီတလဲ ပတၢ်ဆိကမိၣ် ဒီးပာ်တ့ၢ်ကွံာ်လုၢ်လၢ်လၢ အကထိၣ်ဟူးထိၣ်ဂဲၤထီၣ်ပှၤလၢ ပကမၤကဒီးတၢ်ကမၣ်. ဒီးပဂုာ်ကျဲးစၢး အိၣ်မူက့ၤဒ် ယဟိဝၤယွၤ အတၢ်သိၣ်တၢ်သီ အိၣ်ဝဲအသိး.​—ဖး ယၡါယၤ ၅၅:​၆, ၇.

၂. ပမ့ၢ်မၤကမၣ်တၢ်န့ၣ် ယဟိဝၤယွၤ သူဝဲတၢ်အိၣ်ဖှိၣ်သးပှၢ်တဖၣ် လၢကမၤစၢၤပှၤဒ်လဲၣ်.

ပမ့ၢ်မၤဘၣ် တၢ်ကမၣ်ဖးဒိၣ်န့ၣ် ယဟိဝၤယွၤ တဲဘၣ်ပှၤလၢ “ကိး တၢ်အိၣ်ဖှိၣ်သးပှၢ်တဖၣ်တက့ၢ်.” (ဖး ယၤကိာ် ၅:​၁၄, ၁၅.) တၢ်အိၣ်ဖှိၣ်သးပှၢ်တဖၣ် အဲၣ်ယဟိဝၤယွၤ ဒီးအသိတဖၣ်. တကးဒံးဘၣ် အဝဲသ့ၣ်ဒိးန့ၢ်ဘၣ်တၢ်သိၣ်လိ လၢအဝဲသ့ၣ် ကမၤစၢၤပှၤဒ်သိး ပကမၤဂ့ၤထီၣ်က့ၤ ပတၢ်ရ့လိာ်သးဒီး ယဟိဝၤယွၤအဂီၢ်.​—ကလၤတံ ၆:၁.

ပမ့ၢ်မၤဘၣ် တၢ်ကမၣ်ဖးဒိၣ်န့ၣ် တၢ်အိၣ်ဖှိၣ်သးပှၢ်တဖၣ် ကမၤစၢၤပှၤဒ်လဲၣ်. တၢ်အိၣ်ဖှိၣ်သးပှၢ် ခံဂၤ မ့တမ့ၢ် သၢဂၤ ကသူဝဲလံာ်စီဆှံ ဒ်သိးကဘှီဘၣ်ထီၣ်က့ၤပှၤ. အဝဲသ့ၣ် ကဟ့ၣ်ဂံၢ်ဟ့ၣ်ဘါပှၤ ဒီးဟ့ၣ်ပှၤတၢ်ဟ့ၣ်ကူၣ်တနီၤ လၢကမၤစၢၤပှၤ ဒ်သိးပသုတမၤ တၢ်ကမၣ်ဖးဒိၣ်လၢၤတဂ့ၤ. ဒီးဘၣ်သ့ၣ်သ့ၣ် အဝဲသ့ၣ် ကပာ်ပတုာ်ဝဲ ပမူဒါတမံၤမံၤ တုၤလၢ ပတၢ်ရ့လိာ်သးဒီး ယဟိဝၤယွၤ ဂ့ၤထီၣ်က့ၤဝဲ. ဘၣ်ဆၣ် ပှၤတဂၤ မ့ၢ်မၤဘၣ် တၢ်ကမၣ်ဖးဒိၣ် ဒီးမ့ၢ်တပီၢ်ယၢ်လီၤက့ၤ အသးဘၣ်န့ၣ် ဒ်သိးကဒီသဒၢ ပှၤလၢ တၢ်အိၣ်ဖှိၣ်ပူၤအဂီၢ် တၢ်အိၣ်ဖှိၣ်သးပှၢ်တဖၣ် ကထုးထီၣ်ကွံာ်အီၤ လၢတၢ်အိၣ်ဖှိၣ်အပူၤ.

 ဃုသ့ၣ်ညါအါထီၣ်

၃. ပမ့ၢ်တဲဖျါထီၣ် ပတၢ်ကမၣ်န့ၣ် ကကဲထီၣ်တၢ်မၤစၢၤ လၢပတၢ်ရ့လိာ်သးဒီး ယဟိဝၤယွၤ ကဂ့ၤထီၣ်က့ၤ

ပမ့ၢ်မၤဘၣ် တၢ်ကမၣ် တမံၤဂ့ၤတမံၤဂ့ၤန့ၣ် အမၤဘၣ်ဒိ ယဟိဝၤယွၤအသး အဃိ ပကဘၣ်အၢၣ်လီၤ ပတၢ်ကမၣ်လၢအအိၣ်. ဖး စံးထီၣ်ပတြၢၤ ၃၂:​၁-၅ ဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ–

• ပမ့ၢ်တပာ်ခူသူၣ် ပတၢ်ကမၣ်ဘၣ် ဒီးပမ့ၢ်အၢၣ်လီၤ ပတၢ်ကမၣ် လၢယဟိဝၤယွၤအအိၣ်န့ၣ် ဘၣ်မနုၤအဃိ အဂ့ၤဝဲလဲၣ်.

 ၄. တၢ်ထုးထီၣ်ကွံာ်ပှၤလၢ တၢ်အိၣ်ဖှိၣ် အပူၤန့ၣ် ကဲဘျုးဝဲ

ပှၤလၢအမၤဘၣ် တၢ်ကမၣ်ဖးဒိၣ်တဂၤ မ့ၢ်တအဲၣ်ဒိး မၤထွဲယဟိဝၤယွၤ အတၢ်သိၣ်တၢ်သီလၢၤဘၣ်န့ၣ် အကဲတၢ်အိၣ်ဖှိၣ်ဖိ တသ့လၢၤဘၣ်. ပှၤကထုးထီၣ်ကွံာ်အီၤ လၢတၢ်အိၣ်ဖှိၣ်ပူၤ ဝံၤဒီး ပရ့ဒီးအီၤ ဒီးတဲတၢ်ဒီးအီၤ တန့ၢ်လၢၤဘၣ်. ဖး ၁ ကရံၣ်သူး ၅:​၆, ၁၁ ဒီး ၂ ယိၤဟၣ် ၉-၁၁ ဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ–

• ဒ်ကိၣ်မံၣ် မၤပွးထီၣ် ကိၣ်တလိၣ်အသိး ပမ့ၢ်ရ့ဒီး ပှၤလၢအမၤကမၣ်တၢ် လၢအတပီၢ်ယၢ်လီၤက့ၤသးဘၣ်တဂၤန့ၣ် အကမၤဘၣ်ဒိ တၢ်အိၣ်ဖှိၣ်ဒ်လဲၣ်.

 တၢ်ဂ့ၢ်လၢအရ့ဒိၣ်

ပမ့ၢ်မၤဘၣ် တၢ်ကမၣ်ဖးဒိၣ် သနာ်က့ ပမ့ၢ်ပီၢ်ယၢ်လီၤက့ၤသး နီၢ်ကီၢ် ဒီးပာ်လီၤသးလၢ ပတမၤကဒီး တၢ်လၢအတဂ့ၤဘၣ်တဖၣ်န့ၣ် ယဟိဝၤယွၤ ကပျၢ်ကွံာ်ပတၢ်ကမၣ်.

တၢ်ကွၢ်ကဒါက့ၤ

• ပမ့ၢ်အၢၣ်လီၤ ပတၢ်ကမၣ် လၢယဟိဝၤယွၤ အအိၣ်န့ၣ် ဘၣ်မနုၤအဃိ ကဂ့ၤဝဲလဲၣ်.

• ဒ်သိး ယဟိဝၤယွၤ ကပျၢ်ကွံာ် ပတၢ်ကမၣ်အဂီၢ် ပကဘၣ်မၤမနုၤလဲၣ်.

• ပမ့ၢ်မၤဘၣ် တၢ်ကမၣ်ဖးဒိၣ်န့ၣ် ဘၣ်မနုၤအဃိ ပကဘၣ်ဃ့ တၢ်မၤစၢၤလၢ တၢ်အိၣ်ဖှိၣ်သးပှၢ်တဖၣ် အအိၣ်လဲၣ်.