Atako nge kezolaka Yehova mingi mpe nge kesalaka ngolo samu na kumanga kusala yina kesala yandi mpasi na ntima, bantangu yankaka yakekumina nge nge sala banzimbala. Kasi, masumu yankaka kele ya nene kuluta yankaka. (1 Bakorinto 6:9, 10) Kana nge mesala disumu ya nene, kuzimbakana ve ti Yehova kezolaka nge kaka; yandi zola kunlemvukila nge mpe kusadisa nge.

1. Yinki beto fueti sala samu Yehova nlemvukila beto?

Bantu yina kezolaka Yehova kekumaka na kiadi mingi ntangu bakebakusaka ti bamesala disumu mosi ya nene. Kasi bau kebakaka ngolo na nsilulu yina Yehova pesaka na bisadi na yandi ti: ‘Atako masumu na beno kele mbuaki lokola menga, yakekuma mpembe lokola neje.’ (Yezaya 1:18) Kana beto mebalula ntima mpenza, Yehova diaka kenlemvukila beto na ntima na yandi ya mvimba. Yinki mutindu beto lenda balula ntima? Kuvuanda na kiadi ya ngolo na ntima samu na diambu ya yimbi yina beto salaka mpe kulomba Yehova yandi nlemvukila beto. Na manima beto kesala ngolo samu na kusoba makanisi ya yimbi to bikadulu yina ketindaka beto beto sala disumu, mpe kusala ngolo samu na kuzinga na nguizani na minsiku ya kuvedila ya Yehova.—Tanga Yezaya 55:6, 7.

2. Yinki mutindu Yehova kesadilaka bankulutu samu na kusadisa beto kana beto mesala disumu?

Kana beto mesala disumu mosi ya nene, Yehova metubila beto beto ‘bokila bankulutu ya kimvuka.’ (Tanga Yakobo 5:14, 15.) Babakala yango yina meponama kezolaka Yehova mpe mameme na yandi. Bamepesaka bau formasion samu basadisa beto beto vutusa nguizani na beto na Yehova.—Bagalatia 6:1.

Yinki mutindu bankulutu kesadisaka beto kana beto mesala disumu mosi ya nene? Bankulutu zole to tatu kesadila Masonukua samu na kumonisa beto ti diambu yina beto salaka kele yimbi. Bakepesaka beto diaka malongi ya mfunu mpe balukindusu yina kesadisa beto beto bika diaka kusala disumu. Bantangu yankaka balenda pekisa beto kusala bisalu na beto yankaka ya Buklisto samu na mua ntangu tii mavimpi na beto ya kimpeve kekuma diaka ngolo. Kana mpangi mosi mesala disumu ya nene yandi balula ve ntima, bankulutu lenda bimisa yandi na kimvuka samu yandi bika kubebisa bayankaka na kimvuka.

 KOTA NA MPINDA

3. Kutubila bankulutu disumu na beto kesadisaka beto vutukila nguizani na beto na Yehova

Konso disumu yina beto mesala kepesaka Yehova mpasi, na yau beto fueti fungunina yandi masumu na beto. Tanga Nkunga 32:1-5, mpe na manima tadila kiuvu yayi:

• Samu na yinki yakele mbote kufunguna masumu na beto na Yehova na kisika ya kusueka yau?

 4. Mutindu kubimisa muntu na kimvuka kesadisaka

Kana muntu yina mesala disumu ya nene memanga kulanda minsiku ya Yehova, yandi lenda bikana ve na kati ya kimvuka. Yandi kebimisama na kimvuka, mpe beto kesala diaka ve kinkundi na yandi to ata mpe kusolola na yandi. Tanga 1 Bakorinto 5:6, 11 mpe 2 Yoane 9-11, mpe na manima tadila kiuvu yayi:

• Kaka mutindu levire kevimbisaka farine, yinki mutindu kusangana na nsumuki yina memanga kubalula ntima lenda vuanda na bupusi na kimvuka?

 BUNKUFI

Kana beto mesala disumu mosi ya nene mpe beto memona mpenza kiadi mpe beto mebaka nzengolo ya kubika kusala mambu ya yimbi, Yehova kenlemvukila beto.

Mvutukulu

• Samu na yinki yakele mbote samu na beto kufunguna masumu na beto na Yehova?

• Yinki beto fueti sala samu Yehova nlemvukila masumu na beto?

• Kana beto mesala disumu mosi ya nene, samu na yinki beto fueti sosa lusadusu ya bankulutu?