LONGI DIA 57
Adieyi Ofwete Vanga avo Ovolele Sumu Diampwena?
Kanele vo otoma zolanga Yave yo vanga ngolo za venga konso diambu dilenda kunkendeleka, vekala kaka ye ntangwa ovanga diambu diambi. Kansi, vena ye masumu mampwena ye masumu makete. (1 Korinto 6:9, 10) Avo ovolele sumu diampwena, sungamena dio vo Yave ke yambula kuzola ko ye ozolele kuloloka yo kusadisa.
1. Adieyi tufwete vanga kimana Yave katuloloka?
Awana bezolanga Yave, betoma kendalalanga vava bebakulanga vo sumu diampwena bavolele. Kansi, befiaulwiswanga muna nsilu Yave kasia kwa nkangu andi: “Kana una vo masumu meno mambwaki nga menga, mepembeswa nga mvul’a mpembe.” (Yesaya 1:18) Avo tuvilukidi kieleka o ntima, Yave okutuloloka emvimba. Aweyi tulenda songela vo tuvilukidi kieleka o ntima? Tufwete kendalala kikilu, yambula mavangu mambi yo dodokela Yave katuloloka. I bosi, tufwete vanga ngolo mu soba ngindu yovo yambula mavangu mambi matufididi mu sumuka yo vanga ngolo za lemvokela diaka nsiku mia Yave.—Tanga Yesaya 55:6, 7.
2. Yave aweyi kesadilanga akuluntu muna kutusadisa avo tusumukini?
Avo tuvolele sumu diampwena, Yave okutuvovesanga vo ‘twabokela akuluntu a nkutakani.’ (Tanga Yakobo 5:14, 15.) Mpangi zazi zasolwa, bezolanga Yave ye mameme mandi. Besadilanga e Diambu dia Nzambi muna kutusadisa mu vutulwisa ngwizani eto yo Yave.—Ngalatia 6:1.
Aweyi akuluntu bekutusadisila avo tuvolele sumu diampwena? Akuluntu wole yovo atatu bemokena yeto yo sadila malongi ma Bibila. Bekutuvana mpe tuludiku twamfunu yo lukasakeso lukutusadisa mu lembi bwa diaka muna sumu. Balenda baka nzengo za kutukatula yiyekwa yankaka muna nkutakani mu fikolo, yavana tusiamisa diaka ngwizani eto yo Yave. Kansi, akuluntu adieyi bafwete vanga avo muntu ovolele sumu diampwena kavilukidi ntima ko? Muna lembi vukumuna akaka muna nkutakani, akuluntu bafwete vaikisa muntu ndioyo muna nkutakani.
ZAYA DIAKA MANKAKA
Tala una Yave kalenda kutusadisila avo tuvolele sumu diampwena.
3. O funguna e sumu dikutusadisa mu vutulwisa ngwizani eto yo Yave
Vava tusumukanga, Yave tukendelekanga. Muna kuma kiaki, tufwete funguna sumu dieto kwa yandi. Tanga Nkunga 32:1-5, i bosi, vana e mvutu za kiuvu eki:
-
Vana fulu kia swekanga masumu meto, ekuma dinina diambote mu fungunanga mo kwa Yave?
Avo tufungwini sumu dieto kwa Yave yo lomba lusadisu kwa akuluntu, dikututwasila luvuvamu lwa ntima. Tala e VIDEO, i bosi, vana e mvutu za kiuvu kilende.
-
Nze una omwene muna video, aweyi akuluntu basadisila mpangi Canon mu vutuka kwa Yave?
Tufwete ziula ntim’eto yo zayisa mawonso kwa akuluntu kadi bazolele kutusadisa. Tanga Yakobo 5:16, i bosi, vana e mvutu za kiuvu eki:
-
Ekuma ke dikadila diampasi ko kwa akuluntu mu kutusadisa avo tubazayisi mawonso?
Funguna sumu diaku, zayisa mawonso kwa akuluntu, tambulwila lusadisu lwa Yave
4. O vaikisa muntu muna nkutakani nluta ditwasanga
Avo muntu sumu diampwena kavolele ye kazolele lemvokela nsiku mia Yave ko, kafwete vaikiswa muna nkutakani. Ampangi ke bafwete kala diaka akundi andi ko ngatu mokena yandi. Tanga 1 Korinto 5:6, 11 ye 2 Yoane 9-11, i bosi, vana e mvutu za kiuvu eki:
-
Nze una mfuna yakete ifunisinanga o mbumba a mfumfu, o kala nkundi a muntu olembi viluka ntima, nkia mfwilu dilenda twasa muna nkutakani?
Ndonga bavaikiswa muna nkutakani, kuna kwalanda bavutuka. Ekuma? Kadi babakula vo kanele vo e tumbu bavewa ntantu zayingi kiabatwasila, kiabasadisa mu tambulwila e mbi bavanga yo yambula yo. (Nkunga 141:5) Tala e VIDEO, i bosi, vana e mvutu za kiuvu kilende.
-
Nze una omwene muna video, o vaikiswa muna nkutakani, aweyi diasadisila Sonia?
E nkubika yavaikisa muntu muna nkutakani aweyi . . .
-
itwasilanga zitu muna nkumbu a Yave?
-
isongelanga unsongi yo zola kwa Yave?
5. Yave okutuloloka avo tuvilukidi o ntima
Yesu wata kingana kimosi kikutusadisanga mu bakula una Yave kemonanga avo muntu ovilukidi ntima. Tanga Luka 15:1-7, i bosi, vana e mvutu za kiuvu eki:
-
E kingana kiaki, adieyi kilongele mu kuma kia Yave?
Tanga Yezekele 33:11, i bosi, vana e mvutu za kiuvu eki:
-
Adieyi tufwete vanga muna songa vo tuvilukidi kieleka o ntima?
Nze mvungudi, Yave olunga-lunganga mameme mandi
AVO MUNTU UVOVESE VO: “Wonga ngina wau wazayisa e sumu diame kwa akuluntu, kadi se yavaikiswa muna nkutakani.”
-
Adieyi olenda vovesa kwa muntu una ye ngindu za mpila yayi?
MAMBU MASINA MA LONGI DIADI
Avo tuvolele sumu diampwena, Yave olenda kutuloloka. Kansi tufwete viluka kieleka o ntima yo baka nzengo za yambula vanga diaka mambu mambi.
Nkia Mambu Olongokele?
-
Ekuma dinina diambote twafungunanga masumu meto kwa Yave?
-
Adieyi tufwete vanga kimana Yave kaloloka masumu meto?
-
Avo sumu diampwena tuvolele, ekuma tufwete vavila lusadisu lwa akuluntu?
TALA MPE OMA MALENDE
Tala una Yave kasongela kwa muntu mosi e nkenda ziyikwanga muna Yesaya 1:18.
O vaikisa muntu muna nkutakani, nkia nluta dilenda twasa?
“E Nkubika ya Vaikisa Muntu mu Nkutakani Ekuma Inina ya Zola?” (Eyingidilu dia 15 dia Mayu, 2015)
Tala una olenda sasila kwa muntu una vo ke Mbangi a Yave ko, e nkubika yavaikisa muntu olembi viluka ntima mu nkutakani.
“Nga Mbangi za Yave Bebembolanga Wantu Ana Bakala Muna Dibundu Diau?” (Longi dina muna jw.org)
Muna zaya una muntu mosi ona wayambula e ludi kamwena vo Yave wazola vo kavutuka kwa yandi, tanga lunsansu “Mfwete Vutuka kwa Yave.”
“Nkand’a Nzambi Zingu kia Wantu Usobanga” (Eyingidilu dia 1 dia Abidi, 2012)
Nanga Oyangalela Mpe Malongi Mama
YUVU ITOMA YUVULWANGA
Ameyi Mevangamanga Muna Longi dia Bibila ye Mbangi za Yave?
Muna programa yayi ya ngovo ya longokela isadilwanga kwa Mbangi za Yave, olenda sadila kwaku konso nsekola ya Bibila. Olenda kwaku bokelesa esi nzo aku yawonso yovo akundi aku ana ozolele.
