CIIYO 57
Ino Inga Mwacita Buyani na Mwaciita Cilubo Cinene?
Nabi kwaamba ayi mulisuni Yehova abuumbi alimwi inga mweelesha cankusu kuleya kucita cili coonse ceenga camukalasha, cimwi ciindi inga mwaciita cilubo. Nacibi boobo, shilubo shimwi shilaba shinene kwiinda shimwi. (1 Bene Kolinto 6:9, 10) Na mwaciita cilubo cinene, mutaluubi kwaamba ayi Yehova taakwe kucileka kumusuna; alisuni kumulekelela akumucafwa.
1. Ino nciinshi ncotweelete kucita kwaamba ayi Yehova atulekelele?
Abo basuni Yehova balalinyumfwa cibiibi abuumbi na bashiba ayi bacita cilubo cinene. Nacibi boobo, Yehova alabayuminisha kwiinda mumaswi ngaakashomesha bantu bakwe ayi: “Nabi shibiibi shanu shilibo pyupyupyu anga ngumuswa malowa, shilaakuboolabo tuu anga mbutonje.” (Isaya 1:18) Na twaana kuswa panshi lya moyo, Yehova inga watulekelela. Ino kwaana cilaamba nshi? Cilaamba kulinyumfwa cibiibi pacilubo ncotwacita, kucileka kucita cibiibi ico, alimwi akusenga Yehova kwaamba ayi atulekelele. Lyalo tulyeelete kusebensa cankusu kwaamba ayi tucileeke kuyeeya na kucita sheesho shakapa kwaamba ayi tucite cibiibi. Kwiilikaawo, tulyeelete kweelesha cankusu kukonkela njiisho shakwe Yehova shiluleme.—Amubelenge Isaya 55:6, 7.
2. Ino Yehova alabasebensesha buyani bamanene kutucafwa na twabiisha?
Na twaciita cilubo cinene, Yehova alatulwiita ayi tulyeelete “kwiita bamanene bamulibungano.” (Amubelenge Jemusi 5:14, 15, NWT.) Basankwa aba bakasalwa balisuni Yehova ambelele shakwe. Bakaiishikwa bwakutucafwa kwaamba ayi tubooshe bushicibusa bwesu a Yehova alimwi.—Bene Galatiya 6:1.
Ino bamanene balatucafwa buyani na twaciita cilubo cinene? Bamanene bobilo na botatwe balesa mukutululika, kwiinda mukusebensesha Malembo. Alimwi balatulwiita ansheenga twaciita kwaamba ayi tuleye kubooshawo alimwi kucita cilubo. Inga basala kwaamba ayi tutanookwaabanamo lubasu mukucita shintu shimwi mulibungano kwakaciindi, kushikila bushicibusa bwesu a Yehova ndyeshi bukayume alimwi. Na muntu wacita cilubo cinene taasuniiwo kwaana, bamanene balamukusha mulibungano kwaamba ayi atayungi bamwi mulibungano.
AMWIIYILEWO ASHIMWI
Amwiiye mbweenga mwanyumfwishisha kabotu akulumba Yehova mbwaatucafwa na twaciita cilubo cinene.
3. Kulyaambilila cilubo ncetwacita inga kwatucafwa kuboosha bushicibusa bwesu a Yehova
Cilamucisa Yehova na twaciita cilubo, aboobo tulyeelete kulyaambilila kuli nguwe. Amubelenge Kulumbaisha 32:1-5, akubandika mwiipusho uyu:
-
Ino nceebonshi cili kabotu kulyaambilila shilubo shesu kuli Yehova muciindi cakusisa?
Kwiilika pakulyaambilila kuli Yehova, inga twalinyumfwa kabotu na twasenga lucafwo kubamanene. Amweebele VIDYO, akubandika mwiipusho utokonkelaawo.
-
Kweelana anshomweebela muvidyo, ino bamanene bakamucafwa buyani mukwesu Canon kuboolela kuli Yehova?
Tulyeelete kwaamba sha lushinisho bamanene ndyebatootwiipusha mukwiinga balisuni kutucafwa. Amubelenge Jemusi 5:16, akubandika mwiipusho uyu:
-
Ino nceebonshi ncuubu bamanene kutucafwa na katwaamba sha lushinisho ndyebatootwiipusha?
Amulyaambilile cilubo canu, amwaambe lushinisho kubamanene alimwi akutambula lucafwo lwakwe Yehova
4. Bubaambo bwakukusha muntu mulibungano bulacafwa
Na muntu wacita cilubo cinene wakaka kukonkela njiisho shakwe Yehova, inga taatoleleli kuba lubasu lwa libungano. Alakushikwa mulibungano, alimwi taakuwo kucatanaakwe na kubandikaakwe. Amubelenge 1 Bene Kolinto 5:6, 11 a 2 Joni 9-11, akubandika mwiipusho uyu:
-
Bweenka isti mboifutumusha fulaulo, ino kunyumfwana amuntu utasuni kwaana inga kwaleta lipenshi nshi mulibungano?
Baanji bakalinga bakushikwa mulibungano bakaboolela alimwi ceebo cakululikwa. Nabi kwaamba ayi cakalinga cabacisa, kukushikwa kwakabacafwa kushiba kwaamba ayi ncobakalinga bacita cakalinga cibiibi. (Kulumbaisha 141:5) Amweebele VIDYO, akubandika mwiipusho utokonkelaawo.
-
Kweelana anshomweebela muvidyo yacitondesho iyi, ino kukushikwa mulibungano kwakamucafwa buyani Sonja?
Ino bubaambo bwakukusha muntu mulibungano . . .
-
bulalengesha buyani liina lyakwe Yehova kulemekwa?
-
bulatondesha buyani ayi Yehova ngushilusuno alimwi taatulangili kucita nsheenga tatucikoonshi?
5. Yehova alatulekelela na twaana
Yesu wakaamba cikoshanyo citucafwa kunyumfwishisha Yehova mbwaalinyumfwa na muntu waana. Amubelenge Luka 15:1-7, akubandika mwiipusho uyu:
-
Ino ici citoomwiisha nshi pali Yehova?
Amubelenge Esekelo 33:11, akubandika mwiipusho uyu:
-
Ino nciinshi ciyandika abuumbi muntu ncaaelete kucita kwaamba ayi atondeshe ayi waana?
Bweenka mbuli mweembeshi, Yehova alashibikila maano abuumbi mbelele shakwe
BANTU BAMWI BALAAMBA AYI: “Ntooloonda kwaamba ayi na ndwiite bamanene ayi ndakacita cilubo batoonkusha mulibungano.”
-
Ino inga mwamucafwa buyani muntu utoyeeya boobo?
CITEENTE CINENE
Na twaciita cilubo cinen sombi twasenga kulekelelwa akushinisha kucileka kucita shibiibi, Yehova inga watulekelela.
Kwiindulukaamo
-
Ino nceebonshi tulyeelete kulyaambilila shibiibi shesu kuli Yehova?
-
Ino nciinshi ncotweelete kucita kwaamba ayi Yehova atulekelele shibiibi shesu?
-
Ino nceebonshi tulyeelete kusenga lucafwo kubamanene na twaciita cilubo cinene?
AMULANGWETEEWO ASHIMWI
Amubone Yehova mbwakatondesha musankwa umwi inkumbu shaambwa pa Isaya 1:18.
Ino bubaambo bwakukusha muntu mulibungano bulabacafwa buyani abo boonse beelikitweemo?
Amwiiye mbweenga mwasansulwiita muntu uteshi Kamboni bubaambo bwakukusha muntu mulibungano.
“Sa Bakamboni Bakwe Yehova Balasuula Bantu Mbobakalinga Kubunganaabo?” (Makani acanika pa jw.org)
Amubelenge makani atoocanika pamutwi utokwaamba ayi “Ndakalinga Kuyandika Kuboolela Kuli Yehova,” akwiiya cakapa kwaamba ayi musankwa wakalinga waswa mucancine alinyumfwe ayi Yehova wakamuboosha.
“Baibo Ilaalula Buumi bwa Muntu” (Njashi Yamulindilishi, April 1, 2012)
You May Also Like
MIIPUSHO LIINJI BANTU NJOBEPUSHA
Ino Nshiinshi Nsheenga Mweeya Ndyemutokwiiya Baibo a Bakamboni Bakwe Yehova?
Ndyemutokwiiya Baibo a Bakamboni Bakwe Yehova kwakubula kulipila, inga mwasebensesha Baibo ili yoonse. Mulyangulukite kwiitako bamumukwashi wanu na beshicibusa banu bali boonse mbweenga mwasuna kucanikaawo paciiyo.
