Awˬ lawn 57
Nawˬ venˇ baˆ uiˍ jaˇ ve htaꞈ te ve kʼo ga laˇ ve htaꞈ gʼa tuˬ hkʼaˬ hkʼe gʼa te ve le?
Nawˬ Yaˬhoˉvaˬ htaꞈ haꞈ jaˇ leh yawˇ nyi ma luˬ tuˬ maˇ te piˇ gaˇ ve pa taw, maˇ te yaꞈ tuˬ coˇ caˇ leh jaw kʼai ve htawˇ, teˇ pawˆ pawˆ kʼo nawˬ kaꞈ te yaꞈ puiˉ ve yoˬ. Yaꞈ hkʼaˇ, venˇ baˆ teˇ ceuˬ ceuˬ kʼo awˬ nu ve aꞈ kehˉ uiˍ ve yoˬ. (1 Kawˇrenˍhtuˆ 6:9, 10) Nawˬ venˇ baˆ uiˍ jaˇ ve htaꞈ te ve kʼo, Yaˬhoˉvaˬ nawˬ htaꞈ haꞈ chehˇ sheˍ ve tehꞈ tawnˇ taˍ sheˍ. Leh yawˇ nawˬ htaꞈ venˇ baˆ hpehˇ laˇ gaˇ leh ga laˇ gaˇ ve yoˬ.
1. Yaˬhoˉvaˬ venˇ baˆ hpehˇ laˇ tuˬ ngaˬ hui hkʼaˬ hkʼe gʼa te ve le?
Yaˬhoˉvaˬ htaꞈ haꞈ ve chaw venˇ baˆ uiˍ jaˇ ve htaꞈ te ve tehꞈ shiˍ la htaˇ, nyi ma luˬ jaˇ ve yoˬ. Yaꞈ hkʼaˇ, Yaˬhoˉvaˬ yawˇ ve chaw htaꞈ ka tiꞈ te piˇ ve, “nawˬ hui lehˬ venˇ baˆ htaꞈ pa taw nyiˉ˗ehˍ hpehꞈ chehˇ taˍ ve htawˇ, vaˇ meu˗e hkʼa shuˍ kʼawꞈ hpu la tuˬ ngaˬ tsuhˇ baˬ laˇ tuˬ yoˬ” tehꞈ, kʼoˆ ve htaꞈ yawˇ hui kaꞈ awˬ gʼaˇ gʼa ve yoˬ. (Iˉsaˍyaˆ 1:18) Ngaˬ hui venˇ baˆ dawˇ hpfuhˆ ve kʼo, Yaˬhoˉvaˬ awˬ tehˬ awˬ na venˇ baˆ hpehˇ laˇ tuˬ yoˬ. Ngaˬ hui hkʼaˬ hkʼe gʼa te ve le? Ngaˬ hui te ve awˬ ceuˬ htaꞈ nyi ma luˬ jaˇ leh maˇ kʼawꞈ te˗o ve, leh Yaˬhoˉvaˬ geh venˇ baˆ hpehˇ laˇ tuˬ lawˬ cawˇ ve yoˬ. Peuˬ leh ngaˬ hui ve maˇ daꞈ ve te hkʼaˇ dawˇ hkʼaˇ pa tuˬ coˇ caˇ leh, Yaˬhoˉvaˬ ve daꞈ kehˬ ve awˬ liˇ awˬ hkʼaˇ htaꞈ gʼaꞈ te cawˇ ve yoˬ.—Iˉsaˍyaˆ 55:6, 7 gʼaw sheˍ.
2. Ngaˬ hui te yaꞈ htaˇ Yaˬhoˉvaˬ lehˬ nyi haꞈ shaˉ paˍ htaꞈ cuˇ leh hkʼaˬ hkʼe ga laˇ tcuh ve le?
Ngaˬ hui venˇ baˆ uiˍ jaˇ ve htaꞈ te ve kʼo, Yaˬhoˉvaˬ ngaˬ hui htaꞈ kʼoˆ laˇ ve, ‘Hkriꞈ yaˇ awˬ moˍ hkʼaw nyi haꞈ shaˉ paˍ teˇ hpaˍ htaꞈ kuˬ cawˇ ve yoˬ.’ (Yaˍkoˆ 5:14, 15 gʼaw sheˍ.) Nyi haꞈ shaˉ paˍ chi teˇ hpaˍ lehˬ Yaˬhoˉvaˬ leh yawˇ ve yawˬ htaꞈ haꞈ jaˇ ve yoˬ. Ngaˬ hui Yaˬhoˉvaˬ geh teˇ pawˆ kʼawꞈ meuˆ daꞈ tuˬ yawˇ hui hkʼaˬ hkʼe ga laˇ tuˬ shiˍ ve yoˬ.—Gaˍlaˍtiˆ 6:1.
Ngaˬ hui venˇ baˆ uiˍ jaˇ ve htaꞈ te ve kʼo, nyi haꞈ shaˉ paˍ teˇ hpaˍ hkʼaˬ hkʼe ga laˇ tuˬ le? Yawˇ hui 2 gʼaˇ maˇ heˆ leh 3 gʼaˇ ngaˬ hui venˇ baˆ te yaꞈ ve awˬ ceuˬ htaꞈ hpeuꞈ maˍ laˇ tuˬ Liꞈ hpu htaꞈ cuˇ ve yoˬ. Leh ngaˬ hui venˇ baˆ maˇ kʼawꞈ te tuˬ beˆ maˍ laˇ leh awˬ gʼaˇ peꞈ laˇ ve yoˬ. Ngaˬ hui Yaˬhoˉvaˬ geh teˇ pawˆ kʼawꞈ meuˆ daꞈ la htaˇ hkʼa gaˬ, Hkriꞈ yaˇ awˬ moˍ hkʼaw ve awˬ vuiˬ teˇ tcuhˉ teˇ yanˇ maˇ te tcuh laˇ tuˬ yawˇ hui dawˇ cheˆ ve yoˬ hehˉ. Chaw teˇ gʼaˇ venˇ baˆ uiˍ jaˇ ve htaꞈ te leh maˇ dawˇ hpfuhˆ ve kʼo, Hkriꞈ yaˇ awˬ moˍ hkʼaw ve chaw htaꞈ maˇ daꞈ ve maˇ gʼa heuˆ la tuˬ, nyi haꞈ shaˉ paˍ yawˇ htaꞈ tawˆ cheˆ piˇ tuˬ yoˬ.
Henˇ shiˍ maˇ la tuˬ
Ngaˬ hui venˇ baˆ uiˍ jaˇ ve htaꞈ te ve kʼo, Yaˬhoˉvaˬ ga laˇ ve htaꞈ awˬ hpfuhˇ shiˍ ve tehꞈ hkʼaˬ hkʼe hpeuꞈ maw piˇ gʼa ve le, teˇ geh henˇ sheˍ.
3. Ngaˬ hui venˇ baˆ dawˇ hpfuhˆ htaˇ Yaˬhoˉvaˬ geh kʼawꞈ meuˆ daꞈ gʼa ve
Ngaˬ hui te yaꞈ ve teˇ ceuˬ le le Yaˬhoˉvaˬ nyi ma luˬ tuˬ te piˇ ve yoˬ. Chi htaꞈ pa taw, ngaˬ hui te yaꞈ htaˇ Yaˬhoˉvaˬ htaꞈ laꞈ haˉ kʼoˆ piˇ cawˇ ve yoˬ. Chiˇ mvuh ve liꞈ 32:1-5 gʼaw leh na hkawˇ chi htaꞈ tawˇ yaw daꞈ sheˍ:
-
Ngaˬ hui te yaꞈ ve htaꞈ faˉ taˍ ve aꞈ kehˉ, Yaˬhoˉvaˬ htaꞈ laꞈ haˉ kʼoˆ piˇ ve lehˬ aˬ htoꞈ ma te daꞈ jaˇ ve le?
Ngaˬ hui te yaꞈ ve venˇ baˆ Yaˬhoˉvaˬ htaꞈ kʼoˆ piˇ˗oˬ ve awˬ hkʼoˆ kaꞈ, nyi haꞈ shaˉ paˍ geh ga laˇ tuˬ lawˬ ve kʼo, nyi ma sha la tuˬ yoˬ. VDO hpaw leh na hkawˇ chi htaꞈ tawˇ yaw daꞈ sheˍ:
-
VDO chi hkʼaw, Hkeh˗nawn Yaˬhoˉvaˬ geh kʼawꞈ la tuˬ, nyi haꞈ shaˉ paˍ hkʼaˬ hkʼe ga piˇ ve le?
Ngaˬ hui te ve awˬ ceuˬ hkʼa peu˗eˬ nyi haꞈ shaˉ paˍ htaꞈ gʼa kʼoˆ maˍ piˇ ve yoˬ. Awˬ lawn kʼo, yawˇ hui ngaˬ hui htaꞈ ga laˇ gaˇ ve yoˬ. Yaˍkoˆ liꞈ 5:16 gʼaw leh na hkawˇ chi htaꞈ tawˇ yaw daꞈ sheˍ:
-
Ngaˬ hui te yaꞈ ve awˬ ceuˬ hkʼa peu˗eˬ nyi haꞈ shaˉ paˍ htaꞈ kʼoˆ maˍ piˇ ve kʼo, aˬ htoꞈ ma te yawˇ hui ngaˬ hui htaꞈ ga laˇ tuˬ sha ve le?
Nawˬ te yaꞈ ve tehꞈ Yaˬhoˉvaˬ htaꞈ kʼoˆ piˇ ve, nyi haꞈ shaˉ paˍ htaꞈ hkʼa peu˗eˬ kʼoˆ piˇ, leh Yaˬhoˉvaˬ haꞈ pehnˇ ve hkʼaw ga laˇ ve htaꞈ haꞈ yuˬ sheˍ
4. Tawˆ cheˆ ve lehˬ awˬ bon hkʼaˬ hkʼe cawˬ ve le?
Chaw teˇ gʼaˇ venˇ baˆ uiˍ jaˇ ve htaꞈ te leh, Yaˬhoˉvaˬ ve awˬ liˇ awˬ hkʼaˇ htaꞈ maˇ gʼaꞈ te ve kʼo, yawˇ lehˬ Hkriꞈ yaˇ awˬ moˍ hkʼaw ve chaw teˇ gʼaˇ maˇ kʼawꞈ hpehꞈ˗o. Yawˇ htaꞈ tawˆ cheˆ piˇ leh, ngaˬ hui kaꞈ yawˇ geh tawˇ maˇ kʼawꞈ yaw daꞈ˗o. 1 Kawˇrenˍhtuˆ liꞈ 5:6, 11 leh 2 Yoˇhanˬ liꞈ 9-11 gʼaw leh na hkawˇ chi htaꞈ tawˇ yaw daꞈ sheˍ:
-
Diˇ a ciˉ ceh tiˉ hkaoˍ monˇ teˇ diˬ hkʼa peu˗eˬ htaꞈ ciˇ la piˇ puiˉ ve hkʼe, te yaꞈ leh venˇ baˆ maˇ dawˇ hpfuhˆ ve chaw htaꞈ tawˇ yaw piˇ ve lehˬ Hkriꞈ yaˇ awˬ moˍ htaꞈ heuˆ la kuiˬ hkʼaˬ hkʼe cawˬ ve le?
Tawˆ cheˆ piˇ jaw ve laiˉ gʼaˇ Hkriꞈ yaˇ awˬ moˍ hkʼaw kʼawꞈ kʼawꞈ la ve yoˬ. Aˬ htoꞈ ma pa taw le? Tawˆ cheˆ piˇ ve lehˬ yawˇ hui nyi ma naˬ tuˬ te piˇ ve htawˇ, yawˇ hui te ve lehˬ yaꞈ ve tehꞈ shiˍ tuˬ ga piˇ ve yoˬ. (Chiˇ mvuh ve 141:5) VDO hpaw leh na hkawˇ chi htaꞈ tawˇ yaw daꞈ sheˍ:
-
VDO chi hkʼaw, yaˇ miˇ chi teˇ gʼaˇ htaꞈ tawˆ cheˆ piˇ ve lehˬ, yawˇ htaꞈ hkʼaˬ hkʼe ga piˇ ve le?
-
Aˬ htoꞈ ma te tawˆ cheˆ piˇ ve lehˬ, Yaˬhoˉvaˬ ve awˬ meh htaꞈ awˬ meꞈ awˬ hponˇ gʼa tuˬ te piˇ ve le?
-
Aˬ htoꞈ ma te tawˆ cheˆ piˇ ve lehˬ, Yaˬhoˉvaˬ hteˇ ve cawˇ ve Gʼuiˬ sha hpehꞈ leh ngaˬ hui htaꞈ haꞈ ve tehꞈ hpeuꞈ maw laˇ ve le?
5. Ngaˬ hui venˇ baˆ dawˇ hpfuhˆ htaˇ Yaˬhoˉvaˬ venˇ baˆ hpehˇ laˇ ve
Chaw teˇ gʼaˇ venˇ baˆ dawˇ hpfuhˆ htaˇ Yaˬhoˉvaˬ hkʼaˬ hkʼe dawˇ ve htaꞈ na gʼa tuˬ, Yeˍsuˆ tawˇ pa haˉ teˇ maˬ tehˆ maˍ laˇ ve yoˬ. Luˉkaꞈ liꞈ 15:1-7 gʼaw leh na hkawˇ chi htaꞈ tawˇ yaw daꞈ sheˍ:
-
Awˬ lawn chi Yaˬhoˉvaˬ htaꞈ caˉ daꞈ ve nawˬ htaꞈ aˬ htoꞈ ma maˍ laˇ ve le?
Yeˍsaˍkeˍlaˆ liꞈ 33:11 gʼaw leh na hkawˇ chi htaꞈ tawˇ yaw daꞈ sheˍ:
-
Ngaˬ hui awˬ tehˬ awˬ na venˇ baˆ dawˇ hpfuhˆ ve tehꞈ hpeuꞈ maw piˇ tuˬ, hkʼaˬ hkʼe gʼa te ve le?
Yawˬ hawˉ shehˍ hpaˇ hkʼa shuˍ, Yaˬhoˉvaˬ lehˬ yawˇ ve yawˬ htaꞈ dawˇ haˍ jaˇ
Chaw teˇ hpaˍ kʼoˆ ve: “Hkriꞈ yaˇ awˬ moˍ hkʼaw tawˆ cheˆ laˇ ve htaꞈ ngaˬ kawˆ ve pa taw, ngaˬ ve yaꞈ kuiˬ nyi haꞈ shaˉ paˍ htaꞈ kʼoˆ piˇ maˇ haˆ.”
-
Chaw teˇ hpaˍ chi hkʼe dawˇ ve kʼo, nawˬ yawˇ htaꞈ hkʼaˬ hkʼe kʼoˆ piˇ tuˬ le?
A yeˇ uiˍ ve awˬ lawn
Ngaˬ hui venˇ baˆ uiˍ jaˇ ve htaꞈ te leh awˬ tehˬ awˬ na nyi ma luˬ leh maˇ daꞈ ve awˬ ceuˬ maˇ kʼawꞈ te˗o ve kʼo, Yaˬhoˉvaˬ ngaˬ hui htaꞈ venˇ baˆ hpehˇ laˇ tuˬ yoˬ.
Kʼawꞈ gʼaꞈ na ve
-
Ngaˬ hui te yaꞈ ve Yaˬhoˉvaˬ htaꞈ kʼoˆ piˇ ve lehˬ aˬ htoꞈ ma te daꞈ jaˇ ve le?
-
Yaˬhoˉvaˬ venˇ baˆ hpehˇ laˇ tuˬ ngaˬ hui aˬ htoꞈ ma gʼa te ve le?
-
Ngaˬ hui venˇ baˆ uiˍ jaˇ ve htaꞈ te ve kʼo, aˬ htoꞈ ma te nyi haꞈ shaˉ paˍ geh ga laˇ tuˬ lawˬ cawˇ ve le?
Kʼawꞈ caˉ nyi gʼa ve
Iˉsaˍyaˆ liꞈ 1:18 hkʼaw kʼoˆ ve hkʼe, Yaˬhoˉvaˬ hawˉ hkʼaˆ teˇ gʼaˇ htaꞈ ha kʼaˉ ve tehꞈ hkʼaˬ hkʼe hpeuꞈ maw piˇ ve htaꞈ, nyi sheˍ.
Yaˬhoˉvaˬ ha kʼaˉ laˇ ve htaꞈ htawˇ dawˇ nawˬ dawˇ maˇ cawˬ (5:02)
Chaw teˇ gʼaˇ htaꞈ tawˆ cheˆ piˇ htaˇ, yawˇ htaꞈ caˉ daꞈ ve chaw teˇ gʼaˇ le le htaꞈ hkʼaˬ hkʼe ga piˇ gʼa ve le?
Tawˆ cheˆ piˇ ve awˬ lawn nawˬ Shaˉhkiˆhkanˍ ve chaw maˇ heˆ ve htaꞈ hkʼaˬ hkʼe kʼoˆ maˍ piˇ tuˬ le?
Awˬ tehˬ ve htaꞈ baˬ taˉ ve hawˉ hkʼaˆ teˇ gʼaˇ, aˬ htoꞈ ma pa taw Yaˬhoˉvaˬ lehˬ yawˇ htaꞈ shiˍ kʼawꞈ la ve tehꞈ yawˇ dawˇ ve le? “Ngaˬ Yaˬhoˉvaˬ geh kʼoꞈ˗e cawˇ ve” htaꞈ gʼaw nyi sheˍ.
“Liꞈ hpu a shaꞈ htaꞈ pa gʼa ve” (Shaw nyi kuiˬ Taꞈ yehˬ 2012 hkʼawꞈ ha pa 4 maˬ 1 nyi)
You May Also Like
NGAˬ HUI HTAꞈ CAˉ DAꞈ VE AWˬ LAWN
Yaˬhoˉvaˬ ve Shaˉhkiˆhkanˍ ve chaw geh Liꞈ hpu henˇ ve hk’aˬ hk’e te henˇ ve le?
Yaˬhoˉvaˬ ve Shaˉhkiˆhkanˍ ve chaw geh Liꞈ hpu henˇ tuˬ nawˬ Liꞈ hpu hk’aˬ ve teˇ maˬ yehˇ ve kaꞈ hpehꞈ ve yoˬ. Awˬ chawˇ maˇ heˆ leh yehˬ k’a hk’aw ve chaw htaꞈ Liꞈ hpu teˇ geh henˇ tuˬ jehˬ piˇ kaꞈ g’a ve yoˬ.
