ບົດທີ 57

ເຈົ້າຈະເຮັດແນວໃດຖ້າເຮັດຜິດຮ້າຍແຮງ?

ເປີດ

ເຖິງເຈົ້າຈະຮັກພະເຢໂຫວາຫຼາຍແລະຕັ້ງໃຈຈະບໍ່ເຮັດໃຫ້ເພິ່ນເສຍໃຈ ແຕ່ບາງຄັ້ງເຈົ້າກໍອາດເຮັດຜິດພາດ. ຄວາມຜິດບາງຢ່າງກໍເປັນພຽງເລື່ອງເລັກໆນ້ອຍໆ ແຕ່ບາງຢ່າງກໍເປັນຄວາມຜິດຮ້າຍແຮງ. (1 ໂກຣິນໂທ 6:9, 10) ເຖິງວ່າເຈົ້າຈະເຮັດຜິດຮ້າຍແຮງ ຂໍໃຫ້ຈື່ໄວ້ວ່າພະເຢໂຫວາກໍຍັງຮັກເຈົ້າ ເພິ່ນພ້ອມຈະໃຫ້ອະໄພແລະຊ່ວຍເຈົ້າ.

1. ເຮົາຕ້ອງເຮັດຫຍັງເພື່ອພະເຢໂຫວາຈະໃຫ້ອະໄພເຮົາ?

ຄົນທີ່ຮັກພະເຢໂຫວາຄືຊິຮູ້ສຶກເສຍໃຈຫຼາຍເມື່ອເຂົາເຈົ້າໄດ້ເຮັດຜິດຮ້າຍແຮງ. ແຕ່ເຂົາເຈົ້າຈະໄດ້ກຳລັງໃຈຈາກຄຳສັນຍາຂອງພະເຢໂຫວາທີ່ໃຫ້ໄວ້ກັບຄົນຂອງເພິ່ນ ທີ່ບອກວ່າ: “ເຖິງບາບຂອງພວກເຈົ້າຈະແດງກ່ຳ ເຮົາຈະເຮັດໃຫ້ຂາວຄືກັບຫິມະ.” (ເອຊາອີ 1:18, ລ.ມ.) ຖ້າເຮົາກັບໃຈແທ້ໆ ເຮົາກໍໝັ້ນໃຈໄດ້ວ່າພະເຢໂຫວາຈະໃຫ້ອະໄພເຮົາແນ່ນອນ. ເຮົາຕ້ອງເຮັດແນວໃດແດ່ເພື່ອສະແດງວ່າເຮົາກັບໃຈ? ເຮົາຕ້ອງຮູ້ສຶກເສຍໃຈແທ້ໆກັບສິ່ງທີ່ເຮົາໄດ້ເຮັດແລະເຊົາເຮັດສິ່ງນັ້ນ ແລະຂໍໃຫ້ພະເຢໂຫວາຍົກໂທດໃຫ້ເຮົາ. ຈາກນັ້ນ ເຮົາຕ້ອງພະຍາຍາມປ່ຽນຄວາມຄິດຫຼືນິດໄສທີ່ບໍ່ດີທີ່ອາດເຮັດໃຫ້ເຮົາກັບໄປເຮັດຜິດອີກ ແລະເຮົາຕ້ອງພະຍາຍາມສຸດຄວາມສາມາດທີ່ຈະໃຊ້ຊີວິດຕາມມາດຕະຖານຂອງພະເຢໂຫວາ.—ອ່ານເອຊາອີ 55:6, 7

2. ພະເຢໂຫວາໃຫ້ຜູ້ດູແລຊ່ວຍເຮົາແນວໃດເມື່ອເຮົາເຮັດຜິດ?

ຖ້າເຮົາເຮັດຜິດຮ້າຍແຮງ ພະເຢໂຫວາບອກເຮົາໃຫ້ “ເຊີນພວກຜູ້ດູແລໃນປະຊາຄົມມາຫາ.” (ອ່ານຢາໂກໂບ 5:14, 15) ຜູ້ດູແລເຫຼົ່ານີ້ຮັກພະເຢໂຫວາແລະຮັກຄົນທີ່ຮັບໃຊ້ເພິ່ນ. ເຂົາເຈົ້າໄດ້ຮັບການຝຶກຢ່າງດີເພື່ອຈະຮູ້ວິທີຊ່ວຍເຮົາໃຫ້ກັບມາສະໜິດກັບພະເຢໂຫວາອີກຄັ້ງ.—ຄາລາເຕຍ 6:1

ຖ້າເຮົາເຮັດຜິດຮ້າຍແຮງ ຜູ້ດູແລຈະຊ່ວຍເຮົາແນວໃດ? ອາດມີການມອບໝາຍຜູ້ດູແລສອງຫຼືສາມຄົນໃຫ້ຊ່ວຍເຮົາ. ເຂົາເຈົ້າຈະໃຫ້ຄຳແນະນຳຈາກຄຳພີໄບເບິນແລະກະຕຸ້ນໃຫ້ເຮົາປ່ຽນແປງໂຕເອງເພື່ອເຮົາຈະບໍ່ກັບໄປເຮັດຜິດຊ້ຳອີກ. ແລະຜູ້ດູແລອາດຕັດສິນບໍ່ໃຫ້ເຮົາເຮັດກິດຈະກຳບາງຢ່າງໃນປະຊາຄົມຄລິດສະຕຽນໄລຍະໜຶ່ງຈົນກວ່າເຮົາຈະມີຄວາມເຊື່ອເຂັ້ມແຂງອີກເທື່ອໜຶ່ງ. ຖ້າຄົນໜຶ່ງເຮັດຜິດຮ້າຍແຮງແລະບໍ່ກັບໃຈ ຜູ້ດູແລຈະຕ້ອງຕັດສຳພັນລາວ ເພື່ອບໍ່ໃຫ້ຄົນນັ້ນມີອິດທິພົນທີ່ບໍ່ດີຕໍ່ພີ່ນ້ອງຄົນອື່ນໆໃນປະຊາຄົມ.

ຮຽນຮູ້ຫຼາຍຂຶ້ນ

ເມື່ອເຮົາເຮັດຜິດຮ້າຍແຮງ ເຮົາຈະເຂົ້າໃຈແລະເຫັນຄ່າການຊ່ວຍເຫຼືອຂອງພະເຢໂຫວາຫຼາຍຂຶ້ນໄດ້ແນວໃດ.

3. ເຮົາຈະກັບມາສະໜິດກັບພະເຢໂຫວາໄດ້ອີກຄັ້ງຖ້າເຮົາສາລະພາບຄວາມຜິດ

ຖ້າເຮົາເຮັດຜິດ ເຮົາກໍກຳລັງເຮັດໃຫ້ພະເຢໂຫວາເສຍໃຈ ດັ່ງນັ້ນ ເຮົາຕ້ອງຂ້ຽວສາລະພາບຄວາມຜິດຕໍ່ເພິ່ນທັນທີ. ອ່ານຄຳເພງ 32:1-5 ແລ້ວລົມກັນກ່ຽວກັບຄຳຖາມຕໍ່ໄປນີ້:

ແທນທີ່ຈະພະຍາຍາມປົກປິດຄວາມຜິດຂອງເຮົາ ເປັນຫຍັງຈຶ່ງເປັນເລື່ອງດີທີ່ເຮົາຈະຂ້ຽວສາລະພາບຄວາມຜິດຕໍ່ພະເຢໂຫວາ?

ນອກຈາກການສາລະພາບຄວາມຜິດຕໍ່ພະເຢໂຫວາແລ້ວ ອີກສິ່ງໜຶ່ງທີ່ຈະຊ່ວຍເຮົາໃຫ້ດີຂຶ້ນ ກໍຄືການຂໍຄວາມຊ່ວຍເຫຼືອຈາກຜູ້ດູແລ. ເປີດວິດີໂອ ແລ້ວລົມກັນກ່ຽວກັບຄຳຖາມຕໍ່ໄປນີ້:

ວິດີໂອ: “ພະເຢໂຫວາຮັກຜູ້ໃດ ພະອົງຈຶ່ງຕີສອນຜູ້ນັ້ນ” (3:01)

ໃນວິດີໂອ ຜູ້ດູແລຊ່ວຍເຄັນນ໋ອນແນວໃດໃຫ້ກັບມາຫາພະເຢໂຫວາ?

ຜູ້ດູແລພ້ອມຈະຊ່ວຍເຮົາ ດັ່ງນັ້ນ ຖ້າເຮົາເຮັດຜິດຮ້າຍແຮງ ໃຫ້ເຮົາບອກຄວາມຈິງທັງໝົດກັບຜູ້ດູແລ. ອ່ານຢາໂກໂບ 5:16 ແລ້ວລົມກັນກ່ຽວກັບຄຳຖາມຕໍ່ໄປນີ້:

ເປັນຫຍັງຜູ້ດູແລຈະຊ່ວຍເຮົາໄດ້ງ່າຍຂຶ້ນຖ້າເຮົາບອກຄວາມຈິງທັງໝົດກັບເຂົາເຈົ້າ?

ສາລະພາບຄວາມຜິດຂອງເຈົ້າ ເລົ່າຄວາມຈິງທັງໝົດໃຫ້ຜູ້ດູແລຟັງ ແລະຍອມຮັບຄວາມຊ່ວຍເຫຼືອຈາກພະເຢໂຫວາເພາະເພິ່ນຮັກເຈົ້າ

4. ການຕັດສຳພັນມີປະໂຫຍດແນວໃດ?

ຖ້າຄົນທີ່ເຮັດຜິດຮ້າຍແຮງບໍ່ຍອມກັບໃຈແລະບໍ່ຍອມເຮັດຕາມມາດຕະຖານຂອງພະເຢໂຫວາ ລາວຈະບໍ່ໄດ້ເປັນສ່ວນໜຶ່ງຂອງປະຊາຄົມອີກຕໍ່ໄປ. ລາວຈະຖືກຕັດສຳພັນແລະເຮົາຈະບໍ່ຫຍຸ້ງກ່ຽວຫຼືເວົ້າລົມກັບລາວ. ອ່ານ 1 ໂກຣິນໂທ 5:6, 11 ແລະ 2 ໂຢຮັນ 9-11 ແລ້ວລົມກັນກ່ຽວກັບຄຳຖາມຕໍ່ໄປນີ້:

ຄືກັບເຊື້ອເຂົ້າຈີ່ທີ່ເຮັດໃຫ້ແປ້ງຟູຂຶ້ນ ການຫຍຸ້ງກ່ຽວຫຼືເວົ້າລົມກັບຄົນທີ່ເຮັດຜິດແຕ່ບໍ່ຍອມກັບໃຈ ຈະມີຜົນແນວໃດຕໍ່ປະຊາຄົມ?

ຫຼາຍຄົນທີ່ເຄີຍຖືກຕັດສຳພັນໄດ້ກັບມາເປັນສ່ວນໜຶ່ງຂອງປະຊາຄົມອີກຄັ້ງ ເຖິງວ່າການຕັດສຳພັນຈະເຮັດໃຫ້ຮູ້ສຶກເຈັບປວດ ແຕ່ກໍຊ່ວຍໃຫ້ເຂົາເຈົ້າສຳນຶກຜິດ. (ຄຳເພງ 141:5) ເປີດວິດີໂອ ແລ້ວລົມກັນກ່ຽວກັບຄຳຖາມຕໍ່ໄປນີ້: